Pathau mik va song tong abih gauk!  Xã Hồ Thị Kỷ (huyện Thới Bình, tinh Cà Mau), labik hu rilo urang Khmer daok, yaom lac rai duik  dok rilo kan kandah, min bruk iek glang “ akhar haroh” hu karja palei song bhap bini di labik ni biak caik hatai sangka. Rilo thun tapa, “ bhum taneh bac” ni tuk halei jeng ba akaok nao dahlau dalam bruk pachreih bac di tỉnh.  Khánh Hưng – urang pambuak bruk song rayo sap ndom VN daok di bhum taneran krong CL hu kadha vak ndom ka bhum taneh ini.      

Sang saai Huỳnh Thị Lến lac sang kan kathaot di palei, khol hulin vaih tame rivang tuk pasang likei di saai dok nao duah mek hàu di dom ribong piah pablei duah jien. Mbaok meta biak duh hatai, tangin dok pok anek likei taluac sit oh ka tal 2 thun, saai Lến brei thau: Meng di tuk ndih tapui anek hadei, jar var haong bruk sang danaok nan ye oh dong hu hagait ka pasang likei dalam bruk ngak mbang duah jien. Abih bruk dalam sang caik tagok 2 gah bra sa-ai Tín - lac pasang likei di saai. Abih di nyu nan lac, dok dalam tuk caga brei anek tame bac nan ye naong trak jang piah brei anek hu thau akhar haroh.

Tui panuac khan di saai Lến, saai Tín tok bac hu abih tal 9, sang oh hu taneh pala drak nan ye rai duik di saai kak kajap song bruk ngak mbang pah. Jeng mai meng rambah rambeip yau nan bo duik pasang saai khang hatai brei anek nao bac piah yam tagok. Pasang likei di saai khin daok dalam rambah rambup, yaom lac nao ngak hồ, kak vah atau nao duah mek hàu jeng kham merat rong anek ka pahu yau hatai khin di anek drei. Saai Huỳnh Thị Lến lac:

Nyu bac meng sit tal prong lac anek saih naih joi . Anek nyu takre bac drei jeng kham merat brei ka nyu mbang bac. Pasang likei di drei dahlau deih bac tal tal 9 kayua kan kathaot padeih bac, urak ni anek drei bac tal halei pasang likei di drei kuhria tal nan. Thei pah hagait ngak nan, duah jien brei anek mbang bac.

Pabak veik hatai caong di amaik ame, adei Tú Vân meng di tuk nao bac hu 4 thun gam mek hu angan anek saih naih joi. Jeng mai meng hatai kham bac nan ye Tú Vân tuk halei jeng hu palei sangka, dong brei tuk thun bac bahrau tal mai. Pan angaok tangin 20 baoh siphau bahrau hu alin brei, adei Tú Vân ndom lac: Anek daok hu brei sa sruh radaih juak, cặp , tapuk siphau song mbut kalam. Adei cong khin jeng menuac siam yau dom adei saai dalam palei piah harei hadei dong ka amaik ame. Anek kham bac biak joi, piah jeng sa gru pato Anh Văn.Adei Tú Vân lac:

Bo, sa sruh radaih juak , 2 pluh baoh siphau, cặp. Jeng sa gru pato Anh Văn. Kham merat bac daa naih joi piah hadei ni jeng gru pato Anh Văn.

Dok sang ong Dương Huy Tâm hu mong lac sa dalam dom boh sang hu kuhria akhar haroh ka anek di “bhum taneh bac”. Labaih 1 bilan ini mai, ong caga mbut kalam, tapuk siphau ka 7 taco nao bac. Luac rai di ong biak gleih glar piah rong 6 anek likei nao bac đại học hu jak jeng, min urak ni ong jeng daok kuhria ka dom taco di ong.

Ong Tâm khan lac: Dahlau deih ong prong tagok dalam mesruh metak, bac daa oh hu hadom nan ye  njauk “dang di pandiak - riak di hajan” piah duik. Nan ye, yaom lac hu tuk njauk nao mesraiy di gilang pariak brei ka anek mbang bac, ong oh huac hagait. Bruk njauk biai nan lac, di bhum taneh ni, bruk brei ka anek nao bac oh lac nghĩa vụ bo daok lac trách nhiệm di xã Hồ Thị Kỷ, kayua yau nan ye bruk bac daa di 11 taco ong brei kuhria .

Jeng meng hatai sahaneng di amaik ame, meng kham merat yam tagok di dom adei bo urak ni di “bhum taneh bac” hu yaok rituh anek saih hu bac tamat Cao đẳng, Đại học, yaok pluh urang hu bằng thạc sỹ, tiến sỹ.Bruk njauk iek prong nan lac dom urang anek bac tamat bloh jeng mai veik daong padang puk palei atau pambuak song puk palei dong ka dom rai rah hadei yam tagok. 

Dalam dom sang “dong bac” di palei njauk ndom tal sang ong Lý Thái Sơn. Sang ong hu 4 urang anek bac da-a hu jeng menuac jeng urang. Urak ni saai Lý Quốc Công anek likei prong di ong lac thạc sỹ Y khoa song dok ngak bruk  di sang iek ruak Nhiệt đới ban raya HCM. Dom thun tapa, saai Công song kapul y, bác sĩ di sang iek ruak hu mai palei  Hồ Thị Kỷ piah iek ruak brei jru ka mik va kathaot. Lingiu di nan, saai Công song dom adei di drei daok hu jak ba rilo gah rik pataom tapuk siphau daong brei ka dom adei anek saih kathaot palei drei.

Thun bac  2016 - 2017, xã hu labaih 4.300 anek saih dok bac dom pakat  meng mầm non tal  THPT. Thau hu ilamu meng kan di ong muk, amaik ame, adei saai, nan ye oh hu adei halei klak bac meteh dhi. Dalam thun 2016, Hồ Thị Kỷ jak ba hu 22.000 baoh siphau, song rilo pandap bac daa krei dong ka dom adei. Dalam nan hu dom pok pandap mai meng bruk rik dong di dom saai likei, saai kamei piah gam song karja pabak pren dong ka dom adei yam tapa kan kandah. Meng akaok thun tal ni, xã hu taduan  60 radeih juak , 8.000 baoh siphau song rilo pok pandap, pok jien bac piah gam gam amaik ame, kuhria ka dom adei hu nao bac daa./.

Khánh Hưng