Sarak ka 37 di Mban Chấp hành Trung ương ka 19 paka urang đảng oh brei ngak bahrau hu Tổng Bí thư Nguyễn Phú Trọng mbaoh tangin saong daok mek hu bruk sanka, taong yaom glaong di dom urang đảng saong dom urang roh duah. Dalam nan, bruk lac urang Đảng oh brei tame quốc tịch, payua jien, drap ar tabiak negar langiu, peih tài khoản saong pablei salih drap ar di negar langiu suan adat hu taong yaom lac bruk cambaih laih,  catang piah ngak ka urang đảng mboh huac.

Tui Vietnam Airlines, Cục An ninh pajeng ba  Mỹ (TSA) hu panuac lac Vietnam Airlines pabak hu tong abih ka bruk khik kajap an ninh piah peih jalan par tapak pajeng tuai saong pandap yau dahlau daih tal Mỹ. Meng bruk ni, Vietnam Airlines hu jeng hãng kapal haoh Việt Nam camereip taduan hu bruk  njauk hatai di  TSA  piah  Cục Hàng không Liên bang Mỹ  brei adat par nao mai tal taneh ia ni.

Bruk njom mbak jit ruak COVID-19 di dom tinh, bal dalam bhum taneran kraong CL daok rahtabiak sarau kadhau saong tui kuhria daok tagok khang gilac viek. Meng maong 9 harei 1/11, ban Cần Thơ brei patagok pakat njom jit COVID-19 dalam ban meng pakat 1 tagok pakat 2. Abih di nyu nan lac dalam harei 31/10, dom urang F0 di Cần Thơ lac 282 urang, glaong abih kuhria meng dahlau mai. Tỉnh Sóc Trăng jeng meda salih pakat jit meng bhum njom bier (bhum hijao) tapa pakat mbuan njom mbaih (bhum kanjik) meng maong 12 harei 2/11.

Dom harei jiak di ni, dom menuac njom bahrau  COVID-19 di  Bình Thuận dok tagok rilo. Dalam harei 31/10, Bình Thuận hu 130 urang njom COVID-19, dalam nan hu 96 urang dalam bhap bini  di 6 huyện, ban sit. Piah patrun bruk njom mbak jit ruak, Mban khik ramik pabah lamnge ikan  Phan Thiết haong pabah lamnge ikan  Phú Hải tabiak panuac brei padeih bruk di urang pablei salih ikan sit sot di 2 pabah lamnge  ikan ni  meng harei  31/10 mbiah tal tuk hu panuac khan bahrau.

Pasak kuhria mboh dahlau bruk langik tasik negar mboh lac, meng harei ini tal harei 4/11, rilo ban, dalam nan hu ban raya Hồ Chí Minh; Cần Thơ; Cà Mau ...hu tanut tia cực tím biak glaong. Tukvak hu tia cực tím praong di abih bhian rahtabiak meng maong 10 tal maong 1 jala pandiak. Dom chuyên gia y tế kakei lac, piah pacang plaih kanjah jhak di tia cực tím, bhap bini njauk cuk khan aw pacang rup pabhap, lac dom janih aw pacang pandiak, tamo praong saong cuk camin khik caga meta. Gam saong nan, yaok urang njauk mbang njam patam baoh kraoh hu rilo vitamin C, piah plaih dom kanjah jhak meng tia cực tím; luk jru pacang pandiak yaok harei yaok tuk tabiak langiu, luk gam dom tuk langik hu rilo taginum.

Meng mon 5 mesup harei ini 1/11, Hàn Quốc brei peih ngak tuk vak I ka bruk pasiam veik rai duik yaok harei. Tui nan, dom bruk pataom gauk hu brei adat rilo di abih lac 10 urang di ban ine Seoul song labik jiak tapen, 12 urang di dom tỉnh ban dok veik, oh lac hu klauk ginup vắc-xin COVID-19 halei oh. Daok dom nhà hàng song kuan cà phê, menuac urang  rilo di abih hu pataom gauk ngan song urang oh ka klauk jru pacang lac 4 urang.

Harei 1/11, Úc brei pacadu dom bruk pacang cakak di jalan tapen negar hu peih ngak dalam 18 bilan tapa, meng bruk brei ka yaok triệu bhap bini Úc hu klauk ginup vắc xin COVID-19 di dom bang Victoria, New South Wales saong ban ine Canberra hu nao mai tui hatai, dalam nan hu gam bruk tabiak negar langiu saong tame veik negar hadei di nan. Kayua yau nan ye, ini lac mbang camriep Úc pacadu bruk pacang cakak jalan tapen negar meng di bilan 3/2020.

Takik di abih  29 urang metai song njauk rambuac trak dalam mbang tong meng tên lửa đạn đạo di kol Houthi mong tame sang megris Islam song sa sang bac agama di  tỉnh Marib, gah kreik negar  Yemen di melam blaoh (31/10)./.

Urang lang: Thu Thao & H.Pha -1/11/2021