Piah hu 6 sào pala chanh dây that siam, saai Lương Tự Trị nao duah blei pajaih chanh dây meng ban Đà Lạt, tỉnh Lâm Đồng song eng drei bac megru ilamu pala. Hu oh takik mbang mejam chanh dây jaoh jaleih kayua hajan rilo, boh oh siam. Oh kadun likuk, saai Trị khang hatai mesraiy labaih 100 triệu đồngngak mejam khang kajap song duah bac megru ilamu iek glang phun chanh dây; tapa nan vụ camereip, 6 sào chanh dây mek hu labaih 30 triệu đồng/sa bilan, yaok 4 harei paik sa mbang, hu meng 300 tal  400 kg/sào. Saai  Lương Tự Trị brei thau:

:“Drei pala tuk camereip dom phun. Tuk pala mboh taneh lagaih yau nan ye drei peih prong tabiak. Bloh drei ngak hu kein laba,  tuk mik va urang halei khin pala drei  tacei pato ilamu  kỹ thuật ka mik va”

  Mboh janih phun ni lagaih haong taneh riya di puk palei, rilo urang đoàn dam dara bangsa  Raglai hu saai  Lương Tự Trị tacei jalan pala, iek glang. Kapul dam dara xã Phước Hòa, huyện Bác Ái hu daong ka dom urang đoàn , dam dara bangsa Raglai nao rivang iek, duah thau bruk pala chanh dây di saai  Lương Tự Trị; pambuak song pasak pachreih nong huyện peih bruk pathau khan, tacei pato ilamu kỹ thuật, dong ka dam dara thau cambaih bruk pala chanh dây di labik ni. Saai Katơr Chí, Bí thư Đoàn xã Phước Hòa, huyen Bác Ái, lac:

          “Urak ni tong abih urang đoàn, dam dara dalam xã biak takre bruk ni. Anak tal, xã đoàn khol hulin hu panuac likau  pakat  ủy karja xã peih tal pato bruk ngak, piah hu ilamu pala chanh dây piah hu kein  laba”
         Lac phun pala bahrau song pala iek di xã Phước Hòa tuk camereip brei kein laba kinh tế glong, nan ye rilo menuac nao duah thau song pala phun chanh dây. Taphia di nan, menuac pablei salih meng tỉnh Lâm Đồng mai blei pak di bein, nan ye rilo dam dara dalam  xã sahaneng hatai tuk ba pajaih chanh dây mai pala di palei. Saai  Nguyễn Quốc Hoàn, Phó Chủ tịch Ubbhap bini  xã Phước Hòa, huyện Bác Ái ndom lac

“Saai Trương Tự Trị lac sa dalam dom urang Đoàn dam dara dalam xã  akaok meti ba chanh dây ni tame palei. Anak tal jalan ngak di palei lac peih prong bruk pala chanh dây ni. Song abih di nyu nan lac pambak prong dalam urang đoàn, patagok kinh tế tapa bruk pala chanh dây ni.”  

Meng dom siam lagaih tuk camereip di bruk pala chanh dây di saai  Lương Tự Trị hu dong ka dam dara bhum urang bangsa  Raglai khang hatai buh jien tame phun pala bahrau, dong patrun kathaot, padang ngak ngak palei pala bahrau di puk palei./.