Tuai damuai mai tal Chợ Lách dom harei ini, hu rilo drut druai, rilo bruk caik veik dalam glo akaok karei di gauk haong bruk gheih ghang karei di bingu ngak gheih ka raya Tet. Dom hamu bein bingu that, bein bonsai rah tui jalan Negar 57 hu rilo sambo bar karei di gauk kayua bingu ngak gheih di ini hu rilo janih, yau ye: cúc mâm xôi, bingu bi-ar, bingu mai kanyik, vạn thọ… gam haong dom phun mbeik thaik thaot bonsai, thaik thaot athur, sang danaok, meng phun tắc, phun si, mẫu đơn, phun bingu bi-ar, phun hijao biak gheih ghang karei karei. Dui pachreih abih tukvak ini ieu lac hu bingu bi-ar bonsai brei mbeik thaik thaot biak gheih, hu rilo sambo bar dui pachreih brei ka tuai damuai. Amuk Nguyễn Thùy Trâm, tuai jirah rivang mai meng quan 12, ban raya Ho Chi Minh, hadei tuk jirah me-in bein bingu bi-ar di xa Vĩnh Thành, huyen Chợ Lách brei thau:

“Bingu ngak gheih di pak ini biak gheih, abih di nyu nan lac bingu bi-ar. Bingu bi-ar di Ben Tre gheih lo, hu ginup sambo bar. Bingu bi-ar ye hu rilo sambo bar ngak ka thei thei jeng mboh harei raya Tet mai grauk negar, biak bui sambai, uan tabuan, haniem phol selamat”.

Chợ Lách sa labik pala bingu ngak gheih meng lavik mai saong hu pala praong abih di tinh Ben Tre, hu rilo abih dalam harei raya Tet Nguyen dan. Thun ini, urang ngak nong di bhum palei pala labaih 10 trieu angan pandap bingu ngak gheih piah duh ka darak pasar raya tet dalam negar; dalam nan dom janih phun kuk hu chroh bingu samar chip haong bar kanyik hadah hadai, bar merah bhong triuk, daok bingu vạn thọ daok coh bingu ye hu chroh bingu di dom harei anak tal, dom janih bingu that karei jeng daok parang tabiak sambo bar di drei, ngak jeng thaik thaot bingu biak gheih ghang.

Kayua bruk ngak meng kal, caik veik tapa rilo rairah nan rahra huyen Chợ Lách hu thau tani tanat bruk pala saong sangka bingu ngak gheih, abih di nyu nan ieu lac ngak yau habar piah ka bingu hu chroh njauk harei raya Tet Nguyen dan. Chợ Lách hu 6 ribau baoh sang pala bingu, phun ngak gheih ye hu labaih 700 urang gheih tangin pakat tinh saong 7 urang gheih tangin pakat negar. Amuk Nguyễn Thị Loan, po bein phun bingu bi-ar di xa Vĩnh Hoà, huyen Chợ Lách brei thau:

“Thun ini mboh phun bingu ngak gheih hu chroh bingu gheih jang, drei pablei abih paje, pablei nduac jang dut saong thun blaoh. Yaom ye gap lap min, thei blei njauk yaom ye drei pablei, meyah pablei sa mbang rilo pakuang ye pablei yaom 750 ribau dong sa pakuang, daok ruah yaok ye yaom tal 900 ribau dong sa pakuang, pala saong sangka phun rambah lo”.

Daok bingu that ye pablei daok suai daok takik, ong Lê Văn Ngộ, urang ngak nong daok di xa Phú Sơn, huyen Chợ Lách ndom meyai lac:

“Bingu thun ini jeng hu yaom min gah urang kak kaiy randap ye takik lo, jien buh tabiak piah pala jeng rilo. Thun blaoh drei ba nao pablei tal TP.HCM, yaom meng 150-160 ribau dong sa yau, thun ini yaom jeng yau nan min, jien laba jeng takik kayua jien buh tabiak pala saong sangka rilo. Drei caong tapa raya tet iek hu patagok lagaih ha oh”.

Tal tukvak urak ini, dom bingu, phun ngak gheih hu gah ikak kaiy kakei blei dahlau; bingu daok veik rahra ba tabiak darak pasar raya Tet pablei atau pablei tapa jalan online. Yaok thun, bhum palei jeng hu ndom meyai, pambuak haong dom darak bingu di Ban raya Ho Chi Minh saong dom tinh piah rahra pah kadai pablei bingu, phun ngak gheih dalam harei jaik raya Tet. Darak pasar pablei salih bingu ngak gheih bhum palei ini hu chreih chrai tagok; abih di nyu nan lac harei raya Bingu ngak gheih bahrau rah tabiak dui pachreih hu yaok ribau tuai damuai mai tal pasar Chợ Lách, pacheih hu hatai caong blei bingu ini. Ong Trần Hữu Nghị, Phaok Akaok Jabat Ngak nong – Patagok Palei pala huyen Chợ Lách brei thau lac:

“Tal tukvak ini pandap bingu hu ralo tagok meng 20-30% dut haong dahlau. Bruk pablei bingu ngak gheih thun ini meda pablei hu, pablei di bein maong tapa mboh hu tani tanat jang dut haong thun dahlau, daok pablei di darak ye daok pambak tame kadung jien di rahra. Maong tapa urak ini di labik bingu ngak gheih Chợ Lách meng hu raya tet meng pablei hu rilo”.

Bruk pala bingu ngak gheih harei ini oh lac brei mboh plak tangin gheih ghang, hadah krah di rahra bhum taneh Cái Mơn - Chợ Lách, bo daok jeng sa gah ngak mbang pablei salih hu makna daong ka rahra bhap bini di ini “ ngak kaya ngak meda”. Bingu ngak gheih Cợ Lách hu daong ngak gheih ka bal Pataih saong ngak gheih ka raidiuk, daong rahra pak di ini hu harei raya Tet pambuak tui raya Tet./.