Ngak mbang meng dua palak tangin saoh, oh hu taneh, baoh sang saai Phạm Hồng Mơ daok di puk palei 1, xa Khánh Lâm, huyen U Minh hu karja bhum palei ba tame harak baoh sang kathaot di xa. Hadei hu Kapul Pajum urang kamei xa Khánh Lâm daong masre phun jien piah ngak mbang; ame, amaik brei nyim taneh daok saoh piah pala njam patam, baoh kayau, pasang ye nao tasik jang hu duah jien tame. 

Ba abih hatai kham marat, rai diuk jang daok kan kandah kayua daok raong 2 anek sit, hadiuk pasang saai Mơ jang ngak harak lakau tabiak truh kathaot. Saai Mơ khan lac: “Oh daok dalam danak dak baoh sang kathaot, nan oh hu daong jien tui sarak karja veik tra, drei jang oh duh hatai, oh palai damen, hadiuk pasang dahlak umo daok anaih, daok hu prein, kham marat ngak mbang patagok, oh lac daong maong akaok daong iek di Karja hamiet, Karja hu daong phun jien akaok mati nan siam paje".

Sang muk Đỗ Thị Ngọt ralo thun blaoh daok dalam dom baoh sang kathaot di xa Khánh Bình Đông, huyen Trần Văn Thời kayua muk Ngọt labuh ruak trak, khat abih ralo jien padai, jien ndo abih kurang. Min ieu lac sa urang ngak nong, tari tarieng kham marat ngak, hadei di rup prein gilac hu khang kadang yau bhian, muk Ngọt tame chip bruk ngak mbang.

Mai meng 100 anek ciuk pajaih piah raong di karja daong ka dom baoh sang urang kathaot, tal ini muk Đỗ Thị Ngọt padang hu phon manuk tagok yaok ratuh drei. Oh sa janih raong manuk, muk Ngọt daok raong ada, pabui hu yaom kinh te karei. Mboh bruk ngak mbang di drei hu karo, muk Ngọt tut tangin kaot cih harak lakau tabiak truh kathaot, jeng mada thau mbiah lac mayah daok dalam danak dak baoh sang kathaot mada hu lagaih brei ieik glang ruak kik jru cawao.

Muk Ngọt bui sambai lac: “ Habien lei sang drei ngak mbang oh truh veik tra meng caong Karja daong iek, dalam rahra daok ralo baoh sang kathaot ralo jang di drei. Saneng yau nan, dahlak ngak harak lakau tabiak truh kathaot. Urakni dahlak kham marat ngak mbang, pato pakai anek tacaow jang kham marat ngak mbang, oh luai kathaot rambah veik tra”.

Sang saai Nguyễn Thị Diễm, daok di puk palei 1, xa Khánh Lâm, huyen U Minh jeng ngak harak lakau tabiak truh kathaot. Saai M’Diễm mboh drei jeng hu sanang karo blaoh yau nan ye lakau tabiak truh kathaot, piah ka Karja daong ka sang karei kan daman jang drei.

Piah patagok sahaneng di prein kham marat uak drei tagok dalam rai diuk, meng thun 2022 tal urakni, So Lao dong, Thuong binh saong Xa hoi tinh Ca Mai hu pambuak haong dom so, dom gah, UB Bhap bini dom huyen, Ban Ca Mau hu peih pathau khan ka bruk patrun kathaot di bhum tinh ralo jalan ngak yau: Nyaom biai, peih ngak harai mayai sarak di patrun kathaot haong rahra, pathau khan patrun kathaot di dom pandap khaw tin piah mikva krein, peih pasram dom kadha di gah patrun kathaot hu kajap karo thun 2021 – 2025, rik prein jhul ba patrun kathaot hu siam gheih.

Ngan haong bruk pathau khan, tinh jang peih ngak hu siam makre dom Danak dak janih di Danak dak Pakar nagar patrun kathaot hu kajap karo, tui nan hu ngak siam dom sarak patrun kathaot. Dalam nan Ca Mau njauk caik hatai sangka bruk ngak gheih Danak dak giup mada jalan ngak mbang, patagok jalan patrun kathaot. Jien buh tame ngak abih tih thun 2022 saong 2023 di Danak dak lac jaik 27 ty ndong. Peih ngak labaih 100 jalan ngak ginup jang ngak mbang, patagok ka gah raong glang, pala drak tui haong taneh riya di bhum, hu labaih 1.400 baoh sang hu kein laba, lac baoh sang kathaot, jaik kathaot, baoh sang bahrau patruh kathaot di tinh tui bruk daong phun jien padak padang jalan ngak di 36 bilan.

Gam ngak haong gauk, ngak siam di bruk ngak tui sarak karja khan blaoh, tinh Cà Mau daok uak drei siam brei ka bruk ngak patruh eik kathaot. Tal abih thun 2023, tui taong yaom eik, abih dalam tỉnh daok 4.900 boh sang kathaot, hu 1,6%; sang daok jaik taphia kathaot jaik si 4.790 baoh sang, hu 1,56%. Dom baoh sang truh baoh eik kathaot brei mboh hatai kham marat di drei. Caong khin lac, dom ginuh camin kreih mada pasang hadah brei ralo urang karei brei padang bruk ngak mbang padang rai diuk trei sil siam makre selamat jang./.