Kol dahlak hulin hu nao tal palei pak ndap nda daok di ap Mỹ 1, xa Vĩnh Phú Đông dalam harei pandiak min langik mboh la-an la-an yau ye khan brei thau masa raya Tet jaik si tal. Mikva di ini ndom mayai lac langik yau ini ye bruk pak takik rambah jang dut haong harei hajan meng bruk pambu thu kreim, blaoh ngak dom bruk karei di pandap tal bruk khik ramik apung cang urang ikak kaiy mai blei. Rahra bhap bini di ini oh daok hadar bruk pak gak ini hu meng tukvak halei mai, tok thau lac hu ngak tapa rilo rai rah dahlau mai. Ong Cao Văn Chiến (umo 68 thun) ndom mayai lac:

“Ngak apung kreim meng rai jaman ong mei ceik tal rai amaik ame, urak ini tal anek taco khol dahlak hulin. Ngak apung ye hu rilo bruk ngak yau ye urang ba krein la-a mai ye drei blei. Blei mai ye drei ruah mbaik halei vaiy vang ye drei blah ngak gai vaiy, mbaik halei tapak ye ngak gai kak, gai pak, kaoh ngak taok apung, blaoh meng ngak takai blaoh pak, blaoh kak kajap, ngak tangin teik, blaoh klauk khik pakajap…”

Di tukvak masa hu rilo baoh sang ngak, palei pak di ap Mỹ 1, xa Vĩnh Phú Đông hu tal yaok rituh baoh sang ngak bruk ini. Thun bilan nao tapa, tuk rilo pandap panda ngak meng katak, inox… hu ngak tabbiak, palei pak gak ini gaok tuk mai gaok rilo kan kandah kayua oh samu hu ka thaik thaot haong yaom kaom. Meng jaik 200 baoh sang ngak bruk ini urak ini trun daok mala 90 baoh sang. Jaik haong bruk pak di Vĩnh Phú Đông hu pamedeih tuk urang blei pandar mboh lac dom pandap panda ngak meng tangin pak ini hu lagaih haong alam langik tasik saong daok khik tamo yaom kaom.

Ngan haong bruk pak ngak, yaok harei urang pak duah hu meng 100 ribau tal 300 ribau jien dong. Yaom lac jien mek tame di bruk ini oh hu rilo min mikva jeng bui sambai saong njauk hatai. Amik Nguyễn Hồng Xứng brei thau:

“Bruk pak apung hu meng lavik suai paje meng rai jaman amaik ame, tal ini rai anek taco hu tui khik ngak. Bhian ye nao ngak hamu, buac hareik, tam padai, blaoh urang pah ngak hagait ye drei ngak, tuk laneing tukvak ye pak apung ini. Dalam harei meyah oh ngak hagait ye rilo urang pak samar drah, daok dahlak hulin pak suai ye hu sa pluh, dua pluh baoh pandap."

Dalam thun 2009, bruk pak ndap nda di xa Vĩnh Phú Đông hu UB Bhap bini tinh Bac Lieu brei angan lac palei ngak bruk pak meng kal. Meng nan tal ini, piah khik bruk ngak meng kal di palei, piah palei ngak pak gak oh hu kurang, karja palei hu dom sarak piah daong, brei mesre phun jien mek laba lap piah khik takai urang pak, dalam nan hu bruk peih ngak danak dak “Pandar dom ilamo jamraik ky thuat bahrau piah padang palei ngak bruk meng kreim, la-a pak tui jalan pataom pambuak haong jirah me-in sinh thai”.

Langiu di nan, UB Bhap bini hu padang Jalan ngak 31 “ka bruk pasiam, patagok bruk jirah rivang palei pala dalam xa”, gam haong nan jhul khang bruk jaih khan, ieu da-a dom gah ngak mbang pablei salih buh jien tame patagok palei pak gak pagam haong patagok jirah me-in bol bhap rahra. Tui ong Trần Anh Khiêm – Bi thu Ndang uy xa Vĩnh Phú Đông, jalan nao ini yaom lac bahrai peih ngak min pagun sanya lac brei ngak hu dom bruk bahrau ka palei pak, brei kein lagaih ka mikva patagok bruk ngak mbang, abih di nyu nan lac khik takai brei ka dam dara haong palei pala.

“Langiu bruk pak apung lac bruk hu ngak rilo abih ye kol dahlak hulin daok hu pato pakai ngak dom pandap ngak gheih ye dom dam dara biak chreih ngak. Bruk ini gam ba mai jien mek tame ralo, gam takik bruk palai jien padai. Ye jalan ngak anak kol dahlak hulin brei daong piah dui takai dom dam dara gilac mai palei piah ngak bruk ini kayua dam dara hu dom sahaneng hadah krah piah ngak siam jang, abih di nyu nan lac ngan haong bruk jirah me-in palei pala di palei pak”

Bal pataih bilan tame thun barau di palei pak gak ap Mỹ 1, xa Vĩnh Phú Đông biak gheih ghang, siam mekre. Di jalan ba tame palei pala, mala dom phun kreim, la-a biak halui, dom urang pak di ini haong tangin gheih ghang, tari taring haong bruk ngak, meng hatai kham merat, buh abih tung tian piah ngak jeng dom baoh apung gam haong dom pandap panda ngak gheih karei. Ngan haong rahra di palei pak gak, dom pandap panda ngak tabiak oh lac tok ba mai jien mek tame, bo daok khik ramik, patui ngak bruk meng kal di mukkei dom rai rah dahlau mai./.