Banraya Ho Chi Minh jeng ieu lac sa labik hu ralo urang bangsa Cam. Kayua yau nan ye dom anek kamuan daok di ini yau ye talei pambuak brei khik ramik saong patagok ilamu bangsa di drei. 

Ndih tapui haong praong tagok di di Banraya Ho Chi Minh, Ru Ha Ni, bac thun 1 Univesiti Kong thuong di Banraya Ho Chi Minh khan brei thau, meng sit hu amaik ame pato adat cambat urang bangsa Cam dalam palei dalam jammaah di drei, yau ye eik oh luan ia pabah, sa harei sambahya 5 waktu.

Daok di sang, Ha Ni ndom mayai haong amaik ame yahmak meng sap Cam, harei raya harei adat di bangsa Cam, Ha Ni jeng thau cambac.

 Ieu lac anak saih univesiti sap Cina, Ha Ni jeng caong khin, tapa sap ndom panuac mayai drei mada khan yaih ialmu di drei ilamu Viet Nam brei ka urang: “Thun barau adei khin cong bac magru naih joi jang; urak ini daok bac yau nan ye oh ka hu bruk ngak tani tanat. Hadei 4 thun bac adei caong hu daong bhap bini di drei, daong kein raba barau ka bangsa bhap bini di drei.”

Quảng Nữ Thu Thuỳ, anaek saih thun 3 gah Địa lý sang bac Đại học Khoa học Xã hội và Nhân văn - Đại học Quốc gia TP. HCM jeng caong khin, bien hlei tamat bac, drei gilac mai Ninh Thuận ngak bruk, hu daok jaik sang danaok drei. Adei caong khin yau nan di dalam thun barau ini: "Bac di ini 3 thun blaohrawik rawik meng hu nao sang. Raya Tet ini adei khin caong hu harei taom mbaoh haong abih gauk di dalam baoh sang di drei.”

Yaok urang dam dara Cam, thei jeng khik hu ilamu urang bangsa di drei, meng sap ndom mayai, adat cambat tal bruk main mayit mayao nao mai di dalam bhap bini di drei.

 Lưu Quốc Tuấn, anek saih thun ka 4 sang bac univesiti Sư phạm kỹ thuật TP. Hồ Chí Minh brei thau lac, adei manek di dalam baoh sang hu lima adei saai di Ninh Thuận, hu bac tal thun 4 ieu lac kham marat di dei haong bih drei dalam baoh sang di adei.

Quốc Tuấn khan lac, dalam 2 thun jit COVID-19, sang adei biak kan kandah, amaik ame taha oh daong hu ralo. Pacatuah jamo adei hu ralo urang daong jien bac, gam haong bac magru hu siam yau nan ye oh daok trak damak ralo:“Dom jien daong bac jeng daong brei bih takik masa tuk vak buh tabiak ngak pah duah jien mbang bac piah ba abih masa tuk wak tame bac magru, kayua yau nan ye adei mboh yaom glaong jien daong bac brei ka adei.”

Tuấn jeng brei thau, kayua hu takik si nao sang, yau nan ye thun barau, adei caong ramik bruk piah hu nao rivang sang danaok di drei: “Yaok mbang nao sang drei caong mbang huak dom janih kaya mbang yau ye masin netong, baoh traong, masin ngeik…”

Daok adei Thành Thiên Khoa, anek saih thun 3 sang bac Đại học Giao thông - Vận tải dak di di Banraya Ho Chi Minh brei thau lac, meng sit adei daok haong mei muk, kayua yah mak nao ngak mbang atah. Sa tangin muk mei raong ieik 4 adei saai J’Khoa jeng ye mei muk jeng urang pato adei bac magru ilamu siam makrei di bangsa drei. 

Daok di dalam sang thei jeng ndom mayai meng sap Cam. Khoa jeng janum tame main bui harei raya Kate - Ramưwan, adei gam haong mikwa drei daong ngak harei kate di Po nagara tau bimon kalan Cam. Ieu lac sa urang paraong di dalam sang, yau nan ye Khoa jeng thau bruk ngak di drei brei kham marat bac magru piah ka adei gauk bac magru: “Adei kham marat kayua sang danaok di drei jeng ye ka rup drei harei adei. Adei jeng caong gah drei bac jeng mad aba saim lagaih brei ka drei tame bruk ngak harei dei jak jeng siam makre.” 

Ha Ni atau Thiên Khoa, Quốc Tuấn jeng ieu lac sinh vien bahrau hu brei daong jien bac tuk padar 20 thun papar sap Cham di danak dak papar sap Cam di Rayo sap ndem Viet Nam./.