Meng thun 2022 mbiah tal ini, ban Pleiku hu peih 5  tal bac akhar huroh ka urang bangsa takik oh kathau akhar hu jaik 100 urang bac di dom xa Biển Hồ, Chư Á, Gào saong phường Chi Lăng. Pagap yau tal pato akhar huroh di sang bac Tieu hoc Lê Lai xã Chư Á, hu labaih 30 bhap bini palei Bông Phun saong Mơ Nú. Tal bac hu peih pato yaok meng harei Som tal harei Suk yaok adit, ini lac jaik tamat blaoh. Tui kuhria dahlau, dom urang bac taduan hu harak di akaok thun ni. Sa-ai H'Then, umo 30 thun, daok palei Mơ Nú, xã Chư Á hu mbaok tame tal bac druat druai khan lac: “ Dahlau diah oh ka thai akhar huroh tabiak truh palei, biak melau, huac kanda kayua drei oh thau akhar yau nan ye mboh cuang kandah ralo. Nao bac akhar huroh, thua bac thau cih vak oh daok melau veik tuk tabiak jalan”.

Ong Nguyễn Đình Thức, Akok jabat Pato megru Ban Pleiku, tỉnh Gia Lai khan lac, dom tal bac akhar huroh hu daong ka urang bac thau bac, thau vak, thau kuhria saong bac hu dom ilamo ka bruk rah tabiak, xa hoi piah ba tame pandar dalam raidiuk, ngak mbang pala drak raong glang.

“ Jabat pato megru hu padang dom kapol nyaom nao pasang iek yaok labik sang bac ka bruk  bac dom janih Toan, Sap Viet dalam nan hu kuhria, pang urang bac puac akhar, gru puac kadha ka urang tavak; urang bac khan veik bruk sahaneng di drei meng dahlau mai saong hadei tuk bac blaoh  mboh yau halei. Tapa nan hu thau urang bac ngak hu tui hatai caong takre, hatai sahaneng di drei jeng biak bui sambai, thau bac, thau vak piah meng nan thau kuhria ka raidiuk di drei”.

Ngan haong bhum taphia negar yau huyen Đức Cơ, Gia Lai, tukvak  2022 -2025, huyen peih 20 tal pato akhar huroh ka labaih 600 urang bac. Di dom tal bac di bhum taphia negar, dom gru pato kham merat yam tapa kan kandah piah daong urang bac. Ong Lê Phú Huy, Phaok akaok Jabat pato megru huyện Đức Cơ khan lac: “ Tapa tal bac khar huroh hu ba mai siam lagaih, ngak brei parilo urang umo meng 15 tal 60 thun thau akhar piah ba mbuan lagaih mai ka bha bini bhum urang bangsa takik hu paglong jalan sahaneng. Jabat tacei ba jalan ka gru brei salih jalan pato bac  ka lagaih haong urang umo thun praong. Brei ramik ngak tapuk piah bac, dom pandap pato bac mbuan thau mbuan kanal lagaih haong bruk ngak mbang jeng yau patagok radiuk mikva, pambuak haong bruk ngak di urang jakar, gru pato dalam bruk jak ba urang dalam yoak bhum palei mai bac.”

Njauk ndem tal, bruk pato akhar huroh hu mbaok di bol lin bien phong Gia Lai. Di dom labik daok di bhap bini Suối Khôn, xã Ia Mơ, huyện Chư Prông, lac labik hu 70 urang oh ka thau akhar, Balai  Biên phòng Ia Lốp hu peih dua tal pato bac meng kreh thun 2023 mbiah tal ini. Đại úy Nguyễn Văn Luân, Akok Kapol jak ba bhap bini, Balai Biên phòng Ia Lốp khan lac: “ Tuk peih tal bac hu biak ralo maik ame hu anek bik jeng hu tame bac haong maik ame. Piah tal bac hu tani tanat saong hu siam ralo abih ye khol dahlak brei hu labik ma-in ka dom adei gah langiu, gah dalam tal bac brei ka amaik ame hu sahanang bac siam jang.”

Dut haong dalam negar, Gia Lai hu urang oh ka thau akhar daok biak ralo. Ngak tui Danak pakat negar patagok kinh te - xa hoi bhum urang bangsa takik saong bhum ceik  vaktu 2021 -2025, Gia Lai peih 735 tal pato akhar ka labaih 23 ribau urang. Urak ini, tỉnh hu 15 dalam 17 đơn vị pakat huyen  mek hu tanut chuan ka 2, ngak hu bruk ba tabiak vaktu ka 1 ka bruk pato akhar huroh tui Danak dak “ Padang xa hoi bac megru vaktu 2021-2030” di tinh.

Ngan haong bruk kham merat di dom pakat karja, gru pato, hu bruk daong di bol lin bien phong, tinh Gia Lai daok kham merat  ngak siam bruk pato akhar huroh ka bhap bini, rik tame paglong raidiuk, ilamo di bhap bini, patagok kinh te xa hoi, abih di nyu lac bhum urang bangsa takik./.