Dalau diah, jalan haluk di kapul 4, puk palei 5, xa Đồng Tiến daok sit. Bilan hajan ye jalan danar, glut baok, urang nao apuh, pajeng padai tangei biak susah. Labik ini jeng hu labaih 30 baoh sang, ngak apuh ngak bein. Kayua jalan nao mai trun tachauk yau nan ye urang blei ndap nda bhian pateik yaom dom janih pandap pandar urang nong ngak tabiak. Hatai caong khin paraong abih di urang bhap bini ieu lac hu jalan meng betong brei lagaih bruk nao mai, pajeng ba pandap pandar.

Puac thun 2023, xa Đồng Tiến peih ngak 650m jalan betong tui jalan ngak karja gam haong bhap bini gam ngak di kapul 4. Sang saai Bùi Tấn Khương oh damen kaoh phun cao su, daong 50m mbaok jalan piah peih jalan. Saai Khương bui sambai brei thau lac: “Hu jalan betong, urang pablei salih mai tal bein blei pandap pandar ngak nong meng yaom glaong. Urang pajeng ba pandap pandar ngak nong, anek saih nao tapa biak sanang lagaih. Jalan ngak blaoh mikwa truac gom mayek bak jalan, malam di ini oh daok co bleik klaik pandap pandar”.

Puk palei 5, xa Đồng Tiến bhum taneh praong, bhap bini daok ralo labik, ralo abih mikwa ngak nong. Meng di thun 2023 mbiah tal ini, xã padang ngak 4 jalan meng betong nao tapa puk palei 5, atah jaik 2km, abih jien jaik 5 tỷ đồng. Yaom hu jalan betong, mikwa nao mai hu sanang, pajeng pandap pandar ngak nong lagaih. Akaok palei puk palei 5 Nguyễn Đức Nhuần brei thau lac: “Bhap bini di ini mboh kein laba biak ralo tuk hu jalan betong, kayua yau nan ye abih hatai kaoh kayau daong taneh. Bhap bini sa hatai, Kapul jak ba jien buh tame, brei urang dang payua tame gilang jien. Tuk jalan brei ngak ye xa brei ngak chip, bhap bini brei manuac dang ieik glang urang ngak”.

Abih xa Đồng Tiến hu labaih 50km jalan, dalam nan jalan manyek hu 2/3 kuria abih atah jalan, daok weik jalan betong saong jalan haluk. Jalan palei brei ngak khang kajap abih 100%, khik siam ka bruk pajeng pandap pandar, nao mai di bhap bini rahra.

Xa Đồng Tiến hu 9 puk palei hu brei dom janih pasram dhih di langiu langik dak di mblang sang ilimo. Ngak tui jalan nagar brei patruh ieik kathaot, dom thun blaoh tapa, xa Đồng Tiến brei ngak ralo bruk siam lagaih. Tapa bruk patrun kathaot, tal abih thun 2024, taong abih dalam xa oh daok baoh sang urang kathaot.  

Dalau diah, sang saai Điểu Hang daok di palei 5 oh hu taneh ngak mbang, daok di baoh sang taik tahak. Thun 2023, xa jak ba rik pataom urang daong ka sang saai 50 trieu ndong. Gam haong jien patak pataom, diuk pasang di saai ngak hu sang barau makre. Langiu di nan sang saai daok hu daong sang manei iai, bingun khoan. Mai meng jien masraiy di Gilang jien Sarak kanja 50 trieu ndong, saai Điểu Hang buh tame blei paca, katak cao su pandar blaoh. Yaok bilan kaoh abih jien cai daok raba meng 17-20 trieu ndong. Barau di ini, sang di saai hu brei angan truh hu tathaot.

Oh sa janih truh kathaot, jien mek tame sang tui akaok manuac di dalam 2 thun blaoh mai mboh tagok cambaih, hu labaih 83 trieu ndong sa thun. Daok di bhum atah bayah, mada hu talei gom điện palaik, thei jeng hu gom ndien piah pandar 100%. Bhap bini mada pandar internet tuk halei jeng hu.

Tong abih jien buh tame padang palei pala birau pok glaong di xa Đồng Tiến labaih 150 ty ndong. Dom danak dak padang di bhum palei yau ye gom ndien, jalan mbak, sang bac, balai, dom janih ilamu, labik daok dang ieik makre. Tal ini, xa Đồng Tiến hu blaoh 20 tanut di palei pala ngak palei pala barau  pok glaong. Di bruk padang palei pala barau  brei mboh, raidiuk di mikwa bhap bini dak harei dak tagok sap janih, daong patagok kinh tế - xã hội di bhum palei./.