Flash Sale Holiday, sa bruk ngak yaup asak asal kadha ka gah jirah rivang Ba Ria - Vung Tau thun 2024. Meng bruk pambuak yau hatai caong khin, brei taom mbaok dua di urang ngak mbang pablei salih haong urang blei pandap panda, yau nan ye mada peih tabiak dalam 3 harei meng (13/12 tal 15/12), min Flash Sale Holiday pachreih hu labaih 40.000 mbang urang tuai damuai mai jirah blei salih, mek hu labaih 8,12 ty ndong. 

Muk Phùng Lệ Thủy, bhap bini di Ban Vung Tau khan lac, danak dak brei trun yaom praong daong ka ralo urang blei hu ralo janih pandap panda blaoh meng halei mai drei oh blei tal kayua yaom glaong:

 “Blei hu dom janih kaya pandap panda hu angan, hu masa waktu pilih dom janih drei takre min drei oh ka hu jien. Brei ka yaom kaom di nyu, drei saneng lac kaya pandap panda siam ngak yau habar ganap hatai abih urang hu. Drei saneng lac mayah yaom blei lagaih hatai mada pablei hu ralo jang, bhap bini kein laba hu ralo.”

Tui eik glang gah jirah tinh Ba Ria - Vung Tau, thun 2024 bih jien mek hu gah tuai damuai jirah labaih 17.300 ty ndong, tagok 14,57%, dalam nan jien mek tame meng urang mai daok tagok 13% haong labaih 6.240 ty ndong. Gam haong 15-16 trieu tuai damuai jirah mai ieik, mai padeih padei dalam sa thun, tui Kapul jirah tinh Ba Ria – Vung Tau, ini lac tanut tagok blaoh mboh oh hu ralo palei ngak hu. Brei ka patagok gah jirah dalam thun 2024, jeng hu yau nan, Ba Ria – Vung Tau peih ngak hu ralo bruk, ngak harei raya, pacah pahit madhit pakat nagar, pakat dunya.

Dalam thun 2024, di Ba Ria - Vung Tau hu labaih 50 jai ma-in padhih pakat nagar, pakat dunya, pakat tinh hu peih ngak brei pachreih ralo tuai damuai jirah. Dom janih brei main ragu ragam kayua dom urang ngak mbang pablei salih da-a pataom hu ralo urang hu angan yau ye: Mỹ Tâm, Rapper Đen Vâu...di Hồ Tràm dan haong Ban Vung Tau... ba Ba Ria - Vung Tau jeng labik njauk hatai brei ka tuai damuai jirah.

Hu angan dalam nan, thun 2024, ban tasik Vung Tau mbang ka 3 mek angan Ban jirah hacih ASEAN, pok hu angan brei ka jirah di dom tinh Dong Nam Bo. Yau nan ye, thun 2024, Ban Vung Tau, jien mek hu di tuai damuai jirah urang mai daok labaih 10.000 ty ndong, jaik hu 2,7 trieu tuai damuai jirah, glaong labaih 12% dut haong thun dalau.

Jirah puac thun 2024 lac Adit jirah Ba Ria - Vung Tau, gam haong dom kadha: labaih 100 kadai pandap panda parang yaih OCOP di dom tinh, ban dan haong dom kadha madhit pahat rup di langiu langik pachreih tuai damuai jirah mai main, maong eik dan check-in. 

Bruk ngak brei ka tuai damuai jirah di Ba Ria - Vung Tau patagok ralo kayua dom baoh karoh sang danaok brei ka jirah hu ngak siam, daong ka tuai damuai jirah main ieik chreih jang. Min, kadha mada ngak ka hatai tuai damuai jirah daok kanda tuk mai Ba Ria -Vung Tau kayua lac jalan 51, bhian katian, di dalam mong jam nao mai. Saai Cường, urang peih radaih, kayua bruk ngak yau nan ye gait bhian ba tuai damuai jirah nao mai Vung Tau main tasik. Saneng tal nao mai di jalan 51 saai Cường mboh ghaih glar:

“Meng dalau drei meng Vung Tau tal Sai Gon abih labaih 2 mong, urak ini bih meng 3 -  4 mong meng tal sang. Mayah nao mai di harei bih adait oh thau bien tal labik. Mahit jalan 51 thei jeng mboh huac, glaih glan.”

Thun 2025, jirah Ba Ria - Vung Tau kham marat raok hu 18,3 trieu mbang urang tuai damuai jirah, dalam nan labaih 5,6 trieu mbang urang tuai damuai jirah, tuai damuai jirah dunya mai daok labaih 292.000 mbang. Jien pablei hu labaih 19.840 ty ndong. Piah ngak hu dom janih kadha yau nan, langiu di brei ngak siam gah jalan mbak, tinh Ba Ria – Vung Tau njauk hu peih jalan brei ka darak pasar, ralo janih main jirah dan thong pambuak gauk jeng he sinh thai kinh te jirah.

Pambuak gauk, sa jalan di dom gah, dom palei, dom urang ngak mbang blei salih, urang buh jien padai gam haong bhap bini rah ra, brei paralo kaya ndap nda jirah, pasiam palagaih kaya kan brei ka jirah, padang binguk jirah siam makrei, paglaong yaom kom ka tuai damuai jirah. Piah khik hu oh lac brei ka thun 2025 blaoh daok ka patagok dom palei jirah di tinh Ba Ria - Vung Tau, tinh njauk brei langyah ka jalan siam nao mai.

Urak ini tuai damuai jirah mai Baria - Vung Tau hasa jalan 51. Jalan ini bhian katian. Mada hu bruk, jalan meng TPHCM tal Ba Ria - Vung Tau dui atah labaih 4 tuk jam. Ini biak cuang susah ka jirah palei. Peih jalan raya meng Ban raya Ho Chi Minh - Dau Giay - Phan Thiet mboh tuai damuai jirah mai Binh Thuan ralo biak, blaoh tuai damuai jirah mai di bilan thu pandiak thun 2024 di Ba Ria - Vung Tau trun meng 20%-30%.

Ong Phạm Ngọc Hải khan lac, piah jirah tagok, jien tame njauk tui danak dak ye njauk cang jalan Pur - Pai gam thong danak dak jalan tapen tasik 994, tatua Phước An dan haong danak dak 3 jalan kakai raya Bien Hoa – Vung Tau, mboh di nan hu danak dak mblang kapal dunya Long Thành tame pandar:

“Ini lac 3 danak dak yau ye gai tadak brei ka gah jirah Ba Ria – Vung Tau. Tal thun 2025-2026 gam haong mblang kapal dunya Long Thành ye drei taduan raok tuai damuai jirah palei pala, tuai damuai jirah bhum Đông – Tây Nam bộ mada daok hu tuai damuai jirah dunya mai.”

Tui jalan tagok moh di mata brei ka jak jeng thun 2024, Ba Ria – Vung Tau brei angan di dalam bhum palei jirah angaok dunya. Oh sa janih dom baoh kadha lek taka yau ye thau ndom puac blaoh nyu daok hu yau ye ilamu, gheih siam di langik tasik, janih papraong glang tuai damuai jirah di rah ra bhap bini.

Min, piah ngak hu dom janih kadha brei ka 2025, tinh njauk langyah brei hu ka jalan mbak nao mai. Peih talaih blaoh, jirah Ba Ria – Vung Tau mada patuh tagok, jeng labih adah brei ka jirah barau, peih tabiak jaman barau brei karo ka bhum taneh kaya mada ka jirah ini./.