Tui panuac khan di ong Lâm Tấn Bình, Nghe nhan Uu tu daok di palei Bình Tiến, xa Phan Hiệp, huyen Bắc Bình, tinh Binh Thuan lac  urang samu thun umo saong daok sa palei haong ong Kim Ngọc Thành ye ong Thành dahlau daih ngak gru pato, ong jeng hu rilo thun ngak akaok sang bac dahlau diah. Dalam dom thun 1980, 1990, sang danaok di palei ini, bruk kinh te daok kan kandah saong sang gru Thành jeng yau nan. Min diuk pasang gru Thành yam tapa truh kan kandah, raong anek saong dom anek di ong tuk halei jeng hu hatai kham merat ta-eng bac megru. Urak ini, dom anek hu jeng kỹ sư, cử nhân…Ini lac bruk bui sambai, hadah mbaok meta, lac drap ar kaya ngui praong abih di baoh sang gru Thành.

Anek bhik hu jak jeng, baoh sang “hu mbang hu ngui”, urak ini ong Thành gilac mai daong bruk puk palei, jak ba mikva chreih chrai hu mbaok tame dom danak dak patagok kinh te - xa hoi, danak dak grauk rahra pacang khik negar, padang raidiuk ilamo di dom labik daok rahra, patagok kinh te baoh sang, padang raidiuk trei sir haniem phol. Ong Lam Tan Binh khan lac:

“ Ong Kim Ngọc Thành lac sa gru pato hu angan je dalam gah pato megru di huyen Bac Binh. Dom anek di ong jeng hu mbang bac jeng urang jeng menuac, urak ini thei jeng hu labik dalam bol bhap rahra, jien padai drap ar dalam sang jeng hu mbiah. Gru Thành urak ini jeng sa urang daok dalam Kapul halau janeing aguma Ahier tinh, Phaok akaok kalup kapul urang padei hưu, Uy vien Mban chap hanh Kapul urang gru pato dahlau daih di huyen, hu mbaok tame Mban Adat cambat aguma Ahier huyen Bắc Bình,…ong hu rilo urang anit ranam saong je tame, hu bol bhap rahra iek praong. Kayua nan, ong hu UB Bhap bini xa Pha  Hiệp ruah ngak urang hu angan je.”

Yaom lac praong thun paje, min gru Thành jeng bhian duah thau ilamo piah thau dom asal kadha ka dom jalan di Ndang, sarak, hukum di Karja. Tapa nan, pathau khan, ndom biai, jak ba mikva Cam dalam palei, xa ngak tui; tapa nan, hu ngak salih ka hatai iek praong, ngak tui hukum, khik ramik saong paglaong adat cambat siam gheih di bangsa.

Dahlau daih, di labik jaik xa Phan Hiệp saong ban sit Chợ Lầu, bhian rah tabiak bruk taong gauk di 2 kapul dam dara Cam - Yuan, min meng hu bruk pacang cakak samu di dom kapul nyaom gam haong karja palei saong urang hu angan je yau gru Thành nan dom bruk hu ngak siam mekre, bruk pamaoh kamelah gauk di 2 gah oh daok.

Tal ini, gru Thành lac urang tuk halei jeng brei hu mbaok dalam Kapul ngak bruk halau janeing aguma Ahier piah khik brei salamat, kayua bruk siam mekre raidiuk di bhum palei.

 Lac urang thau dom adat cambat bangsa saong thau tani tanat bruk padang, patagok ilamo dalam jaman urak ini, gru Thành hu jak ba mikva dalam palei yah klak dom adat oh daok lagaih, jhul kadun lakuh dom bruk jhak, dom bruk ieu yang mebang oh daok lagaih tuk dalam baoh sang hu urang ruak kik, dom adat ngak padhi ndam metai, ngak lakhah…hu mbaok tame bruk ndom biai ka bruk peih ngak harei Kate, padang dom kapul adaoh tamia di dom palei dalam xa; hu mbaok tame dom tal pato akhar huroh Cam, yuk kadait Saranai, paoh Baranung, bac adaoh hari Ariya saong adaoh dom ragu ragam bhap bini bangsa. Gam haong nan, jak ba mikva dalam palei ngak bruk khik ramik saong paglaong dom yaom kaom, ilamo siam gheih di bangsa Cam.

Ong Kim Ngọc Thành brei thau, dahlau daih baoh sang ong hu gaok kan kandah, nan ong tuk halei jeng sangka, samu hatai, klah rabha, daong dom urang metui mejua, oh hu sap ndom dalam rahra, abih di nyu lac urang umo taha daok sa drei jan, ruak hakik meng rilo bruk karei di gauk saong tui prein ngak di drei.  

“Ngan haong dalam baoh sang ye drei ngak habar ka hu kreih camin, piah meng nan ka mikva dalam palei maong mboh saong ngak tui. Baoh sang jeng kham merat ngak mbang min jeng thau klah rabha haong dom urang metui mejua, abih di nyu nan lac urang umo taha daok sa drei jan, ruak hakik, dom sinh vien hu baoh sang kan kandah, thun halei jeng daong yau nan; daong dom pandap thiet bi bac megru ka 2 sang bac THCS saong Tieu hoc; ngan haong bhum palei ye drei jeng ndom puac habar ka njauk hatai mikva, pathau khan ka mikv ngak tui jalan, sarak di Ndang, hukum di Karja.”

Ngan haong dom jak jeng mek hu dalam baoh sang tal dom bruk ngak siam gheih, siam lagaih dalam bol bhap rahra, ong Kim Ngọc Thành hadah mbaok hu ruah ngak sa urang khan brei thau haong ndom biai dalam nyaom roya dom urang lambaok dom bangsa takik tinh Binh Thuan mbang ka IV, thun 2024, ngan haong bruk di urang hu angan je palei Bình Tiến, xa Phan Hiệp, huyen Bắc Bình, tinh Binh Thuan.

Ong Nguyễn Minh Tân, Akaok Mban Bangsa tinh Binh Thuan brei thau, bangsa Cam lac sa dalam dom bangsa takik hu rahra rilo abih di tinh Binh Thuan haong labaih 9.000 baoh sang/ jaik 40.000 urang, hu labaih 3% rahra dalam tỉnh saong hu 40% dut haong dom bangsa takik, pataom tame rilo meng lac di 4 palei hu abih tih rahra lac sa bangsa saong 9 palei daok meblak tame rilo bangsa; dalam nan, daok rilo abih di huyen Bắc Bình, hu labaih 57%.

Ong Tân brei thau veik, ong Kim Ngọc Thành lac sa dalam 87 urang bangsa takik hu angan je dalam tnh Binh Thuan. Ngan haong bruk di urang hu angan je hu daong bruk paglaong ilamo gul pataom, samu gauk di dom bangsa adei sa-ai bhum mikva bangsa takik dalam tinh, dalam nan hu bhum mikva Cam.

“Brei mboh dom urang hu angan je jeng lac dom urang pasak dalam bhum mikva bangsa takik, daong bruk pathau khan, jak ba dom mikva ngak tui jalan, sarak di Ndang saong Karja, dalam nan urang hu angan je brei paglaong dom gah yau ye: ka bruk patagok kinh te, gah ilamo saong asal kadha ka klau biak hu makna, nan lac bruk khik kajap an ninh chinh tri, siam mekre di bhum palei.”

 Dalam langik la-an di bilan Noel, katik ia di baoh sang gru Thành hu ngak pandiak tung tian kol dahlak, min pandiak tung tian jang tuk dom asal kadha siam gheih, dom bruk siam gheih di baoh sang ong Kim Ngọc Thành bo kol dahlak pang hu. Gru Thành ndom lac: “Dom bruk bo ong padang hu tal harei ini, lac sa bruk piah ka rai hadei ngak tui”./.