Tal Raya Tet thun Ula Naih 2025 jaik mai tal, dom gah ngak mbang pablei salih di tinh Binh Duong hu peih rilo danak dak sangka Tet ka urang ngak kong. Abih di nyu nan lac, thun ini, bruk kinh te hu lagaih, pablei hu rilo pandap, jien laba tagok rilo yau nan ye gah pablei salih paglaong kein lagaih dut haong thun dahlau.

Ong Đặng Quang Duẩn, Akaok kong ndoan Kongti TNHH Far Eastern Viet Nam di labik ngak kong VSIP I, Ban Thuận An, brei thau: Thun ini, meng bruk pablei hu pandap panda tani tanat, kongti hu khik tani tanat saong tagok tukvak ngak ka urang ngak bruk. Gam haong nan, kongti jang sangka iek praong tal bruk tagok glaong jien bilan, jien mayaom piah brei ka urang ngak kong hu sa raya Tet trei sir, ginup.

 “Kongti hu rilo tanut mayaom brei ka urang ngak bruk, brei mayaom jien labaih 20 ty dong. Kong ndoan kongty jeng buh tabiak labaih 2 ty dong piah blei, alin hadiah pandap ka urang ngak bruk".

Daok kongti TNHH Sơn Công Nghiệp Thái Dương - Dhan Takhaok TaiYang, di labik ngak kong Nam Tân Uyên peih praong haong labaih 2.500 urang ngak, jeng hu dom bruk sangka kuhria ka adei sa-ai urang ngak mbang Tet biak lagaih. Taphia bruk patagok khang dalam gah sơn TIP saong TaiYang, kongti daok peih praong bruk ngak takhaok, kalik juak haong angan Nesty. Meng bruk pablei tani tanat, urang ngak kong tuk halei jeng khik kajap bruk ngak, tagok tukvak ngak bruk saong mbang tui hu rilo kein lagaih.

Mboh lac di dalam harei Raya Tet Nguyen dan ini, urang ngak kong hu Kapul urang dang akaok saong kong ndoan trun tal labik ngak piah alin hadiah pandap, daong brei rilo bruk bui sambai haong prein ngak ka urang ngak bruk. Meng hu bruk sangka siam nan urang ngak kong mboh sahnang hatai haong daok suai jang haong kongti. Sa-ai Võ Thị Tuyết Linh ndom mayai lac:  “Adei mboh kongti tagok tukvak ngak bruk samu gauk haong tani tanat nan meda brei ka dahlak hulin hu jien mek tame tani tanat. Dahlau tuk tame ini, dahlak hulin hu tapa rilo kongti saong dahlak mboh lac, dahlak caong khin hu ngak suai haong kongti ini”.

Tui kuhria, tal tuk ini hu jaik 2.500 gah ngak mbang pablei salih di Binh Duong khan brei thau ka jien bilan haong jien mayaom brei mbang Tet thun 2025. Tanut thuong kuhria rah tapa dom gah ngak mbang pablei salih mek hu 9,16 trieu dong, biar abih di nyu hu lac 4,96 trieu dong. Njauk caik hatai sangka, tanut thuong Tet glaong abih di sa gah ngak mbang pablei salih hu phun jien buh tame meng negar langiu tagok tal 840 trieu dong.

Piah abih urang ngak bruk thei jeng hu mbang Tet, kong ndoan pakat palei dom pakat jeng daok tui iek, pasang iek bruk mayaom Tet, sangka ka urang ngak bruk. Meng nan, khik kajap kein laba ka urang ngak bruk. Tui ong Nguyễn Văn Đức, Akaok Kong ndoan labik ngak kong Việt Nam-Singapore, tal ini hu labaih kong ndoan co so di dom kongti (labaih 200 labik) khan brei thau bruk mayaom Tet ka urang ngak kong.

“Kol dahlak hulin mboh lac, jaik abih dom kong ndoan pakat langiu di jien bilan, jien mayaom ka urang ngak bruk takik abih 1 bilan jien bilan, ndom lac jien bilan 13. Langiu di nan, dom gah ngak mbang pablei salih pok meyaom saong thuong 3,4 bilan, hu labik thuong 5,6 bilan”

Sangka kuhria ka adei sa-ai mbang Tet ieu lac sa sarak siam gheih saong lagaih oh lac daong urang ngak bruk mboh pandiak tung tian bo daok lac sa asal kadha hu makna piah khik takai urang ngak bruk dalam bruk meraik gauk ka urang ngak bruk urak ini.

Langiu di dom gah ngak mbang pablei salih, tinh Binh Duong jeng hu dom sarak daong hu lagaih brei ka urang ngak bruk. Cambaic laic lac, meng gah jien padai di kong ndoan tinh, 1.000 harak radaih apui hu daong piah daong urang ngak kong dom tinh bhum Kreh, bhum Barak meda hu nao sang mbang Tet jum pataom haong baoh sang. Thun ini, tinh caik kadung jien labaih 50 ty dong piah daong ka dom urang ngak bruk kan kandah. Yaok paok pandap ka urang ngak bruk hu yaom tal 1 trieu dong.

Ngan haong hatai caong ba mai sa harei raya Tet trei sir ka dom urang ngak kong oh hu nao sang mbang tet, dom bhum palei jeng kuhria tabiak jalan peih ngak dom danak dak hu makna yau Tet jum pataom, Darak pasar Tet zero dong, Tet anit ranam, gam haong dom danak dak ilamo, adaoh tamia./.