Meng yaom 24.000 tal 26.000 đồng/kg, dalam pluh harei tapa, yaom pabui di Đồng Nai tagok tal labaih 40.000 đồng/kg, hu tuk tagok  tal 45.000 đồng/kg. Tui yaom yau ni, urang rong meng labik khat trak, urak ni daok hu liba, tui kuhria yaok kg pabui pablei tabiak, urang rong liba hu 7.000 đồng.

Min oh njauk lac thei jeng bui sambai, kayua rilo sang rong sit sot, oh ginup pren raong nan ye hadei di labaih meteh thun njauk lui raong, atau raong biak takik.

Ong Lầy Giồng Quý, urng rong pabui di  xã Lộ 25, huyện Thống Nhất dalam mbang laik yaom meng bloh, tok piah veik meteh tapon piah trun khat lihik. Rilo val ro raong pabui dahlau daih salih tapa rong menuk. Yaom pabui trun biar, ong Quý raong takik, min urak ni yaom tagok veik oh dok pabui piah pablei. Ong Lầy Giồng Quý brei thau:

 “Khat lihik biak rilo kayua yaom nyu trun biak beir. Yaom haleik oh trun, bo yaom pabui trun biak khang. Tuk ni yaom tagok hasit min mikva oh daok pabui piah pablei, val ro klak saoh oh hu pabui. 

Rilo sang dok pabui, min oh ka ginup praong piah pablei ye mbang ndih oh bingi cong khin yaom daok khik hu yau nan tuk pabui prong, pablei hu yaom, piah pabak veik hadei di mbang khat meng bloh. Ong Vi Hướng Mạnh, urang rong pabui lac:

Meyah tagok yaom 40 hu ye khol hulin biak uan tabuan, kayua khol lin dok dua, klau tapon, labaih 10 harei tra khol lin pablei. Cong khik hu yaom yau urak ni lac uan tabuan lô.

Tui Hiệp hội rong glang tỉnh Đồng Nai, hu dom  sang raong sit sot daok duah jalan raong veik, jeng hu sang daok caga pabui binai piah menek, min abih labaih 1 thun meng hu tapon pabui camereip.

Biak di nyu dom sang duah jalan rong veik oh rilo, dom urang rong jeng dok tui iek, oh khin tagok tapon chip, kayua oh thau pabui khik hu yaom livik halei oh. ingiu di nan, hadei di mbang laik yaom meng bloh, trang trại halei jeng cakak trun tapon pabui rilaow song pabui binai, nan ye urak ni, tuk hu yaom ye pabui pajaih jeng ginup ka  trại, kan hu labaih piah pablei. Bruk ni ngak ka yaom pabui pajaih yaom tagok samar, tagok labaih 1 triệu đồng yaok drei, min jeng oh mbuan blei.

Tui kuhria mboh di gah chức năng tỉnh Đồng Nai, hadei di 3 bilan “giải cứu”, abih tih tapon pabui di  tỉnh ni dok labaih 1,6 triệu drei, pabak ginup ka bruk pablei, nan ye yaom tagok lac njauk.

Sở ngak nong song patagok palei pala Đồng Nai brei thau: tui quy hoạch, tal thun 2020, tong abih tapon pabui di tỉnh ni meng hu 2 triệu drei, min meng akaok thun ni, tong abih tapon yam tapa 2 triệu drei. Ni lac makna ba tal bruk labaih pabui  meng bloh. Đồng Nai hu 250.000 pabui  nái lac ginup, min tui kuhria bahrau ni mboh hu 314.000 pabui binai. Kayua yau nan ye bruk trun tapon pabui lac bruk njuak ngak, oh lac mboh yaom tagok bloh duah jalan tagok tapon. Ong Huỳnh Thành Vinh - Giám đốc Sở ngak nong song patagok palei pala tỉnh Đồng Nai, brei thau: 

 Njauk brei trun tapon , dalam tuk vak ana ktal brei trun 50 ribau  drei pabui binai meng khik hu cung cầu. Min urak ni trun lac trun di labik halei ? Trun lac trun di labik rong sit sot. Kayua khol drei oh meriak gauk hu, nan oh ka ndom tal khat lihik kayua bala meng langik tasik song jit ruak, ye urang rong sit sot tuk halei jeng gaok khat lihik jang.

Bruk trun tapon lac bruk njauk ngak, song njauk patrun di dom boh sang rong sit sot kayua urang oh hu lagaih song gaok rilo rủi ro. Min hu rilo panuac ndom lac, kham merat patrun song tui iek tapon pabui bahrau hu ngak dalam bhap bini, dok dom  doanh nghiệp rong prong  jeng oh ka hu ndom tal, ngak ka urang medhi lac hu hagait nan oh cambaih dalam mbang tagok yaom pabui mbang ni. Kayua yau nan ye, gah chức năng langiu di bruk kuhria mboh dahlau, tong yaom bruk, njauki tui iek catang piah khik samu gauk ka taong abih dom gah./.