hanipha
|
2-9 : Wa Hồ dalam baoh hatai anek Cam
Kadha daoh Làng Chăm ơn Bác hu nhạc sĩ Amư Nhân paneh tabiak di thun 1985, tuk ong hu tabiak ravang palei Wa. Hadei di tuk mai veik, meng hatung hatian bak anit ranam brei ka Chủ tịch Hồ Chí Minh praong uranam saong chreih chrai anak bruk salih bahrau biak siam dalam raidiuk di bhap bini Cam angaok bhum palei Ninh Thuận, ong paneh tabiak kadha daoh ini. Dalam baoh hatai di yaok urang Cam, jeng ye urang takre ilamu Cam, tuk pang kadha daoh ini di nhạc sĩ Amư Nhân, dalam hatai mboh hadar tal Wa, urang hu ba hadah hadai ka bangsa, taneh ia hu độc lập, tự do, bhap bini hu haniem phul, trei sir. Nhạc sĩ Amư Nhân hadar veik kadha daoh Làng Chăm ơn Bác lac sa kadha biak mekre dalam bruk paneh kadha daoh di drei. Kadha daoh lac hatung hatian di palei Cam, di Amư Nhân brei ka Wa Hồ praong uranam. Luac kadha daoh lac hatai anit, lac hatung chreih chrai tuk mbang camereip di abih hu nao tal palei Wa. Kadha daoh ndung bak ragu daoh bhap bini Cam, gam lai la-an, gam chreih chrai tui jalan anh hùng ca, mbuan tame hatai menuac. Nhạc sĩ Amư Nhân brei thau: Angan ieu di kadha daoh jeng biak mộc mạc, panuac di kadha daoh hu ndom tagok hatung hatian di bhap bini Cam daok di Ninh Thuận harei ini uan tabuan ka dom salih bahrau di dom palei Cam, nan lac meng hu Đảng saong Wa Hồ. Ông Đổng Hộ daok di palei Cam Phú Nhuận (t.Ninh Thuận) brei thau: “Ini lac kadha daoh biak drut drui ka Wa ngan saong bangsa Cam. Meng sa kadha daoh di Amư Nhân bo kadha daoh hu par tabiak grauk dom palei Cam dalam tỉnh, dom hatung hatian bak anit ranam. Panuac dalam kadha daoh lac taong abih dom hagait siam mekre dio abih di sa nghệ sĩ lambaok ka bol bhap rahra brei mboh dalam kadha daoh di drei. Urang Cam kol dahlak oh var dhar phor praong glaong bo Wa Hồ caik ka bangsa Việt Nam kol drei” |
Viết bình luận