Ong Tran Xuan Man, UV mitri chinh tri , CTUBMT negar VN brei panuac di nyaom biai

205 menuac di dom jabat TW hu ba tabiak piah pilih ruah ka QH mbang XV hu taong abih cử tri njauk hatai, nan lac panuac khan di Nyaom biai mbang ka 2 kayua Kapul urang dang akaok UBTWMT negar Việt Nam peih tabiak tuk mesup ini (18/3) di Hà Nội. Tapa pataom iek veik Biên bản ginum biai cử tri labik ngak bruk saong Biên bản nyaom biai urang pan akaok peih praong piah yaih khan urang tabiak angan piah pilih ruah ka QH mbang XV, tal tukvak ini oh hu urang halei gam tal brei hagait oh siam piah njauk pasang iek, duah thau.

Rajaei bahrau brei ramik veik bruk pabak ia ka bhum taneran kraong Cửu Long tal thun 2030, pamaong tal thun 2050. Dahlam nan hu pabak sang mac ia kraong Tiền 1 saong dom nding ia pambuak dom tỉnh. Jalan ngak di sang mac lac khik kajap bruk pabak ia pandar, pala drak, pasiam bruk ia njom mbak, salih ka ia njar daok hu takik di Long An, Tiền Giang saong Bến Tre. Danak dak hu abih tih phun jien buh tame lac 2.000 tỷ đồng, prein 300.000 m3 sa harei melam.

Thun 2020, TPHCM taduan hu jien payua meng negar lingiu mai glaong di abih lac: 6 tỷ 100 triệu USD, rilo jang 15% duk haong thun 2019. Bruk nan hu UB urang Việt Nam daok di negar lingiu TP ba tabiak dalam nyaom biai ka bruk ngak ngan haong urang Việt Nam daok di negar lingiu di TPHCM, rah tabiak tuk mesup ini.Urang VN daok di negar lingiu hu daong dom jamriak piah duh ka bruk pacang caga jit Covid-19 yau pataih pacang pabah,hidung, jamriak pametai anek ruak, jamriak halang ia… Meng bruk daong di urang VN daok di negar lingiu, TP hu taduan 9.338 baoh tapuk, yaom labaih 1,1 triệu USD, ba brei dom sang bac ĐH di TPHCM. 

Harei ni (18/3), tỉnh Bà Rịa – Vũng Tàu peih bruk klauk vắc xin caga Covid-19 ka urang ngak gah y tế di dom labik brei daok karei, labik taong ruak Covid-19 dalam tỉnh. 200 mbang vắc xin hu Mintri Y tế parabha mbang ka 1 hu klauk ka 3 kapul lac: pasak y tế huyện Long Điền, sang iek ruak Bà Rịa saong pasal pasang iek ruak kik tỉnh. Urang hu klauk dahlau lac dom urang ngak gah y tế taong ruak tapak ka urang ruak Covid-19, urang pasang iek, rok chuyên gia, urang peih gilai, mek mẫu saong peih bruk dut iek SARS-CoV-2.

Dom huyện tapen tasik tỉnh Trà Vinh daok mek pablei aring tasik puac bilan dalam thun. Urang nong chreih chrai lo kayua yaom aring tasik tagok biak glaong di abih. Tui Chi cục raong pala kaya ikan tỉnh, urang nong hu palao raong aring tasik di labik praong 23.000ha, mek hu abih tih lac 71.000 tấn. Tuk akaok bilan raong, yaom aring ralow meng 150.000-160.000 đồng/kg, min urak ini tagok 300.000-320.000 đồng/kg (janih 1), 230.000-250.000 đồng/kg (janih 2). Ini lac yaom glaong di abih kuhria dalam 4 thun tapa.

Kapul salamat vắc xin di gah Y tế dunya (WHO) hu panuac lac njauk peih bruk klauk veik vắc-xin caga Covid-19 di AstraZeneca kayua kein lagaih di vắc xin praong jang dut saong bala. WHO brei thau daok khik ramik jalan ndom mayai nao mai biak khang kajap haong jabat khik ramik jru tavao châu Âu saong dom jabat khik ramik jru tavao di dunya saong meda samar brei thau dom khau tin bahrau abih ka bruk salamat di vaccine caga Covid-19 ni. Jabat jru tavao châu Âu brei thau, jeng daok duah thau bruk khal darah di dom urang hu klauk jru vắc xin di AstraZeneca.

UB brei panuac daong bruk pacang jit Covid-19 di Rajaei Japon mesup ini (18/3) hu brei tapa bruk oh dui atah jang bruk samar drah di Tokyo tuk bruk ini abih adat di harei 21-3. Min dom urang ilamu kakei lac, dom menuac njom bahrau dalam dom harei jaik ini tagok hasit saong mbuan tamuh veik jit ruak. Urak ini, rajaei Japon daok gaok panuac ieu brei ba jit Covid-19 tame pasang iek hu dahlau di tuk peih Olympic Tokyo bilan hè thun ini, saong brei peih veik dom bruk kinh tế di Tokyo, labik hu 36 triệu menuac, meblah 30% dom menuac sia di japon.

Hàn Quốc saong Mỹ harei ni (18-3) peih bruk ndem mayai nao mai 2 pagam 2 di akaok mintri Ngoại giao saong mintri Quốc phòng 2 negar di ban ine Seoul, ginum mayai ka jalan pacang caga haong Triều Tiên, paglaong bruk pambuak gauk saong dom kadha karei karei. Abih di nyu nan lac, 2 gah meda ginum mayai dom jalan langyah piah jhul patagok bruk langyah ba brei siam Hàn Quốc saong Nhật Bản hadei di mbang kamlah gauk dui atah ka dom bruk sajarah yau ye kateik greik urang ngak bruk saong pablei salih./.

Urang lang: Thu Thảo -Mousaphuong- 18/3