Bac tamat sang bac Cao đẳng Quản trị kinh doanh, saai oh nao duah bruk ngak bo mai padang ngui mbang di angaok bhum palei di drei. Labaih 3 thun tapa, angan Mang Văn Nghiêm di xã bhum ceik Phan Điền, huyện Bắc Bình, tỉnh Bình Thuận hu rilo urang thau tal, kayua hatai kham merat tari tareing di saai. Luac thun, labaih 5 ha taneh puh sang saai tuk halei jeng bak sambo hajao, song yaok thun ba jien tame hu labaih 100 triệu đồng. Kadha vak hadei di ni di  Jasi - urang vak di rayo  sap ndom Việt Nam hu khan ka urang likei bangsa Raglai ni:

Dalam tuk dom dam dara  umo thun yau sa-ai dalam palei nao duah bruk ngak ye urang likei angan Mang Văn Nghiêm hu ngak po trang trại prong jiak 5 ha. Pambak tui halau ia meng binek  Đồng Măng hạ, saai Nghiêm khang hatai blei jamriak njuk ia piah pruh ka phun pala. Langiu di 2 ha padai pala yaok thun 3 vụ, taneh dok veik saai pala njam patam, bloh pala ratak naih, tal ratak laow, củ cải, cà rốt… Meng dom phế phẩm di phun ratak song njam patam karei karei, saai rong limo palimek labaih 10 drei. Oh pala tui jalan ngak klakk di ong muk, saai khang hatai buh jien ngak jalan pruh ia patak pataom song pandar khak hữu cơ. Meng nan bo kaya nong di saai hu chất lượng, hu năng suất glong song hu rilo urang mai duah blei. Saai Nghiêm brei thau:

Drei pala njam patam, bloh củ cải. Drei dok pren yava drei kham ngak piah hu jien ndua, drap ar . Thei jeng brei ngak bruk, ngak ye brei kham merat, tari taring. Ngak ye hu jien, ngak ye brei kuhri kuhria. Drei ngak piah ka mik va, adei saai puk paga bac megru.

Oh lac thau pala, saai dok nao tal dom darak pasa prong dalam huyện piah duah labik blei kaya nong di drei. Nan ye pandap saai ngak tabiak tuk halei jeng hu yaom song pablei biak laik. Saai Nghiêm khan lac, bac tamat gah quản trị kinh doanh thun 2014 saai jeng likau hu bruk ngak. Min jien bilan biak takik, pandar cai rilo janih, saai sahaneng mboh suai lavik oh dok hu di ban raya ni, yau nan ye saai khang hatai klak abih mai palei padang mbang ngui di angaok bhum palei di drei. Tuk camereip oh thau pala phun hagait, raong anek hagait, min meng hatai kham merat di drei, lavik livik harei saai ngak po hu bruk ngak di drei di angaok mblang taneh klak saoh dahlau daih. Saai Nghiêm daok brei thau lac: 

Njauk kham merat ngak, caga ia piah pruh. Urang ndom  taneh lac meh, bo brei ngak taneh meng tabiak meh. Mik va  Raglai bhum ceik ni  meng kan mai kak kajap haong hamu puh. Ngak hamu ngak puh piah duah jien, patak pataom jien ndua dalam sang. Mik va drei di labik ni thei jeng hu hamu hu puh abih, njauk kham merat ngak mbang..

Yaok thun saai pablei 2 limo hu 2 mbang , gam song jien duah hu  meng  3 vụ padai song njam patam karei, yaok thun saai mek tame hu jiak 100 triệu đồng. Kaoh abih phun jien buh tame ngak, saai dok liba hu labaih 70 triệu đồng. Oh lac ngak kaya meda ka drei saong song boh sang drei, saai dok tacei pato dom ayuh dam dara dalam palei bruk pala song iek glang njam patam yau habar ka nyu kein laba. Meng nan bo bruk ngak kinh tế di dam dara  xã bhum ceik Phan Điền dak harei dak tagok. Oh lac tari taring ngak mbang, saai dok lac sa urang daoh tamia gheih di dam dara bhum ceik  xã Phan Điền. Ndom tal bruk ngak mbang di Mang Văn Nghiêm, ong  Hoàng Hồ Khuyên – Phó Bí thư Đảng ủy xã bhum ceik Phan Điền, huyện Bắc Bình, tình Bình Thuận brei thau:

Jalan ngak di Đảng, karja lac daong ka dam dara mesraiy phun jien ngak mbang, karja palei jeng hu dong ka saai Nghiêm mesraiy jien patagok kinh tế. Saai hu mbaok tame dom tal bac megru ilamu  kỹ thuật pala njam patam, tapa nan saai palarilo vụ  angaok taneh pala drak di drei . Bloh saai daok hu duah dom janih pajaih bahrau, lagaih song langik tasik song taneh riya di labik ni, bloh bac dom ilamu kỹ thuật angaok  mạng xã hội.

Meng thau sahaneng thau ngak piah yam tagok ngak kaya meda meng mblang taneh palei drei, urang likei bangsa  Raglai angan Mang Văn Nghiêm lac kreih camin hadah ka bruk patagok kinh tế,  patruh eik patrun kathaot dalam dam dara di xã bhum ceik tỉnh Bình Thuận./.