Pathau mik va song tong abih gauk! Ba gauk khik ramik glai njom mbak tapen tasik lac brukn ngak hu rilo mik va di palei Âu Thọ B, xã Vĩnh Hải, ban sit  Vĩnh Châu, tỉnh Sóc Trăng pataom tame song peih ngak biak siam, bruk ngak ni kayua Kapul pambuak bruk patagok  Đức (GIZ) dong brei. Meng hu yau nan, glai pacang caga di labik ni patagok hijao siam, tamuh tabiak tasik, ngak jeng sa hala pacang drap ar ka mik va. Ni jeng hu mong lac sa labik hadah dalam bruk khik caga song pasiam veik glai dalam tuk  biến đổi khí hậu yau urak ni . Kadah vak di Thạch Hồng, urang vak  di rayo sap ndom VN daok di bhum taneran krong CL.

Urak ni , di palei Âu Thọ B, xã Vĩnh Hải, ban sit Vĩnh Châu, dom glai njom mbak, lac đước, mắm, bần tagok biak glong, atah labaih 2 km di tapen tasik. Takik thei thau lac, labaih 20 thun dahlau, labik ni lac sa mblang taneh bồi, takik phun kayau, rilo labik riyak tasik paoh tame ngak seik taneh riya, njam patam saong ngak kan kandah tal bhap bini. Anak bruk ni, gah ngak nong song karaj palei kuhria tal bruk paduan ba bhap bini tame daok gah dalam, saong peih bruk pala veik glai piah pacang riyak khik caga takai tasik. Ong Thạch Soal – Akaok kapul “Ba gauk khik ramik glai njom mbak tapen tasik” palei  Âu Thọ B, xã Vĩnh Hải, ban sit Vĩnh Châu, hadar veik:  Tuk nan gah kiểm lâm takik menuac, karja palei drei jeng takik sangka nan ye glai bhian njauk jak tah. Tuk nan bhap bini drei dok kathaot, kurang rilo janih, oh ginup meda yau harei ni,  nan ye hu dom urang tame glai tak kayau  mek jnuh  ni deih ngak ka glai khut lihik rilo, oh tamuh hu.

Rilo jalan ngak hu ba tabiak ngak, min tuk bruk ba gauk khik ramik glai pacang caga hu peih tabiak ngak tui bruk dong brei di Kapul patagok Đức (GIZ) di thun  2009 ye siam lagaih hu tagok glong, phun glai bahrau gam tame haluk song tamuh siam. Ong Thạch Bun Thone, sa urang hu mbaok tame danak dak pala glai bui sambai brei thau:  Mboh tapen tasik ni hei jeng hu hasit taneh piah pala drak, meyah urang jah tak ye glai meda lihik nao, ia tasik tame gah, gak khut  taneh pala drak gah dalam. Ni lac bruk dui pachreih lin tame kapul ba gauk khik ramik glai.

Harei camereip peih nga, bruk ba gauk khik ramik glai njom mbak di palei Âu Thọ B pachreih hu 240 urang, angaok mblang taneh labaih 110 hec ta.Tong abih jeng lac dom urang daok kak kajap song bhum tasik ni. Kayua yau nan ye, mik va mong iek bhum taneh di drei gam lac drap ar, gam lac ranam takre oh nao atah hu. Bruk njauk biai nan lac Mban khik ramik dự án hu jao quyền ngak po khik caga glai ka mik va, saong daok brei thau bruk kein laba kinh tế duah hu meng glai ka bhap bini.  Ong Thạch Soal daok brei thau lac, lingiu bruk khik ramik glai,   dom urang hu mbaok tame ngak hu jao brei thẻ tame tabiak glai mek jnuk, dom kaya ikan dalam glai yau hadang, ring, ikan piah pabak ka rai duik bo oh daok loa padauk  yau dahlau deih. Bhap bini urang tui iek gauk piah khik glai, piah mek kaya glai hu khang kajap suai lavik.

Urak ni, langiu nguồn lợi tự nhiên, piah patagok jang siam lagaih di mô hình, kapul ba gauk khik ramik dok hu peih ngak iek bruk rong ốc len ala halui glai. Ni lac janih  mbuan rong, hu yaom kinh tế glaong, hu labik pablei mbuan, nan ye hu rilo mik va sangka patago. Saai Thái Đăm, sa urang dalam kapul khik ramik glai njom mbak  palei Âu Thọ B brei thau, kayua duah hu rilo jien meng bruk ngak ni bo rai duik mik va tapen tasik urak ni hu tani tanat jang. Drei duah hu jien meng kaya ikan tự nhiên yau boh bau, ring, saong daok duah hu jien meng ốc len rong dalam glai.

Bruk ba gauk khik ramik glai njom mbak tapen tasik di palei Âu Thọ B hu parabha jeng 4 labik piah khik ramik, dalam nan hu labik pacang caga, labik pasiam veik gah dala, labik pasiam veik gah langiu, song labik pandar khang kajap. Yaok labik hu sa bruk karei di gauk, meng bruk khik ramik ka dom janih kaya ikan dok, caik mebaoh, khik ramik hệ sinh thái, pacang riyak, patrun bruk glut jaleih  tal bruk peih prong taneh glai pacang caga.

Anak meta mboh lac, bruk ba gauk khik ramik glai pacang caga palei Âu Thọ B dok patagok kein laba. Lingiu di nan, bruk ngak ni dok lac talei pambuak bruk di gah chức năng song mik va, ba gauk khik ramik drap ar tapen tasik . Taphia di nan,daok  rik dong patrun dom khat lihik kayua biến đổi khí hậu. Ong Thạch Soal, Akaok kapul ba gauk khik ramik glai palei  Âu Thọ B, brei thau, dom thun tapa,kapul hu pambuak song gah ngak nong, karja palei tagok bruk pala rilo mblang taneh glai bahrau, peih prong taneh glai njom mbak kayua kapul khik ramik tagok hu abih tih labaih 370ha.  Tuk halei glai hijao mekre ye drei dok jeng hu sahaneng hatai, oh huac riyak ni deih tra. Ar  tasik jeng hu khik ramik, oh cang ngak meng bê tông, kayua nyu dok khang jang bê tông, kayua hu glai khik caga bloh, glai drei atah trun tasik  tal labaih 1000m. Tuk halei hu glai rilo ye hadang ikan jeng hu rilo ka adei saai dalam kaul drei chap mek pabak ka rai duik .

Bruk ba gauk khik ramik glai njom mbak tapen tasik peih ngak di palei Âu Thọ B, xã Vĩnh Hải, ban sit Vĩnh Châu, tỉnh Sóc Trăng urak ni hu mong lac labik hadah dalam bruk pambuak gauk pala, khik caga glai, parabha gauk kein laba meng kaya pandap di langik tasik hu suai livik. Meng nan, hu dong ka bhap bini salih jalan sahaneng, salih bahrau biak siam ka bruk ngak di drei, ba gauk khik caga glai. Ni lac jalan ngak njauk pambak prong dalam tuk vak anak tal di dom glai tapen tasik bhum taneran krong CL./.