Pathau mikva saong taong abih gauk! Ralo urang ranaih umo njauk ruak ung thư tukvak camereip min duh hatai rilo ye samar metai jang, nan lac panuac kakei di Bác sĩ Zee Ying Kiat, pasak Ung thư Parkway Singapore, lac menuac urang jui iek ung thư lac bruk oh daok hagait bo brei maong nyu tui jalan siam mekre jang, kayua ini lac ruak mạn tính meda pasang iek atau iek abih ruak. Kadha “urang iek ruak” harei ini hu kadha vak angaok harak báo pren yava saong baoh sang hu tacei 5 kadha daong urang ruak ung thư mboh chreih chrai piah diuk rai khang kajap. 

Tui bác sĩ Zee, bruk iek ruak ung thư saong tukvak diuk pagam pambak biak ralo tame jalan sahneng di urang ruak. Dom urang ranaih ruak ung thư tukvak camereip min diuk rai duh hatai ye samar metai jang urang praong thun min diuk rai bui sambai. Njauk maong tame rai diuk saong jia rup drei meng dom jalan ngak yau ini:

Diuk rai tui yaok harei

Piah pasang mbaok saong ung thư , brei diuk rai siam yaok harei, meng nan hu daong ka ayut diuk rai siam di abih. Bac bruk rami ramik tukvak, kham merat ngak dom bruk ayut meda pasang iek hu saong klak nao dom hagait ayut oh ngak hu.   

Bac jalan ndom oh

Tukvak iek ruak ung thư yau mek nao pren yava saong tinh thần di urang ruak. Kayua yau nan ye jui duk drei saong dahlau daih bo brei thau giới hạn di rup drei saong oh ngak dom hagait ayut oh hu tukvak atau pren yava piah ngak.

Pagap yau ayut daok ngak bruk dalam tuk daok iek ruak, brei khan ka sếp atau đồng nghiệp thau ka pren yava di drei piah urang ramik veik bruk ngak di ayut di tanut meda ngak hu.

Sahneng kuhria bruk hagait njauk ngak saong dom bruk quan trọng

Brei sahneng kuhria iek bruk hagait  lac praong piah  caik ralo tukvak jang ka dom bruk nan. Brei kanal lac pren yava di ayut oh khang kajap, jui kham merat ngak tapa pren.   

Brei me-in sambai

Me-in sambai daong ngak brei ranaih rup pabhap saong hatai sahneng. Yaok urang hu janih me-in sambai karei di gauk, brei duah thau bruk hagait pachreih ayut. Pagap yau puac tapuk, iek phim, nao me-in hong ayut sahabat saong gauk gar atau daok thiền… yaok harei jui var caik tukvak ka bruk bo ayut takre.

Peih hatai taduan bruk daong ba

Jui kham ta-eng drei bo brei thau lac rup pabhap caong hu daong ba. Peih hatai taduan bruk daong di urang karei lac jalan siam piah giải tỏa stress dalam tukvak iek ruak ung thư. Njauk caik ka dom urang jaik taphia sangka tal ayut meng bruk ayut brei ka urang thau lac drei caong hagait./.