Labik glai jao ka bhap bini palei   Ma Hoa, xã Phước Đại, huyện Bác Ái dok jiak danao Sông Sắt. Yaok harei di labik ni tuk halei jeng hu 4 urang dalam palei tabiak khik iek glai. Saai Cha-ma-lé Đông, sa urang likei dam  bangsa Rắc-lây dok khik glai di labik ni brei thau: Lac urang dalam palei, yau nan ye adei saai thau biak cambaih tuk nao pasang iek, mbuan si thau urang di labik karei tame glai, abih di nyu nan lac samar mboh pui khuah dalam bilan thu. Saai  Đông lac:

         “Nao khik iek, pacang khuah, padam khuah glai. Drei rami ramik bruk hit, pathau khan ka tong abih gah adei saai piah hu mbaok tame pacang khuah, padam khuah. Atau lac dalam tuk adei saai  nao tame glai, meda  khik caga glai ni. Khan brei kapul bhap bini ieu pataom tong abih gah, khan ka bilai thau piah adei saai hu mbaok tame song gauk”

    Jang urang halei karei, bhap bini pak ni thau biak cambaih labik ni,  jang  yau dom bruk ngak yaok harei di bhap bini dalam bhum. Meyah mboh urang halei tame glai lac adei saai dalam kapul bhap bini cakak veik song hu panuac pato pahadar. Tapa nan, kapul bhap bini pathau khan ka bhap bini thau hu yaom glaong di glai pacang caga.  Ong Dương Tín, sa urang daok di  xã Phước Thành hu tapon limo peih palao di glai  Sông Sắt brei thau

             “Hulin hu tapon limo tame tabiak,  adei saai hu panuac kakei, jhui tame glai, palai pajoa glai yau ni yau deih. Oh am cuh glai. Cambaih laih nan lac njauk paglong hatai sahneng, kayua drap ar di  môi trường, drei brei khik caga .”

Glai pacang caga  Sông Sắt, huyện Bác Ái prong labaih  18.000 héc-ta dok di  dom  xã bhum ceik hu rilo bhap bini bangsa takik dok. Mik va bhian tame glai man pateok athur, am puh jiak glai. Ong Nguyễn Văn Hiến, Phó Ban khik ramik glai  pacang caga  Sông Sắt brei thau:

             “Piah ngak siam bruk khik caga glai jang yau pacang khuah padam khuah glai,  gah khik caga glai di  đơn vị bhian pambuak bruk song  kapul bhap bini  jao khoán peih bruk pasang iek, pambuak bruk pacang  khuah padam khuah glai dalam bilan  thu.”

    Oh lac di glai pacang caga Sông Sắt, bo rilo  mban khik ramik glai karei karei dalam tỉnh Ninh Thuận jeng hu peih ngak mô hình kapul bhap bini hu mbaok tame khik glai  .Urak ni bruk khik iek  glai oh kurang hu bruk hu mbaok di dom kapul bhap bini dalam palei  .. Adei saai dalam kapul bhap bini tuk halei jeng hu mbaok khik iek luac harei melam  dalam glai , hu  chòi dok pasang iek gam gam  . Yau nan ye,  abih bruk kuhria caga biak siam. Ong Phạm Thiều, Phó Chi cục trưởng Chi cục Kiểm lâm Ninh Thuận brei thau

.

 “Bruk  di bhap bini biak prong, kayua bhap bini lac menuac di labik ini. Tuk hu khuah glai, bhap bini urang padam khuah dahlau. Hadei di nan, dom  đơn vị po glai  song dom gah karei meng tagok tal  .

    Yaok  héc-ta taduan khik caga glai,  kapul bhap bini hu karja bayar  400.000 đồng yaok thun. Bhian di nyu dom urang hu mbaok di kapul khik iek kham merat rami ramik bruk hamu puh, parahba gauk khik  iek, yaok urang taduan hu 120.000 đồng/sa harei . Tui kuhria yaok bilan , yaok urang duah hu  meng  600 ribau tal  1 triệu đồng, tui harei khik iek rilo atau takik. Dalam abih tih jien taduan  khoán di kapul, sa binah hu caik veik piah padang jalan ngak mbang suai livik, pagap yau piah rong limo menek  patagok jien mek tame . Meng hu jalan ngak mbang meng bruk khik iek glai, bhap bini dak kak kajap jang song bruk khik eik glai  di puk palei ./.