Pathau mikva saong taong abih gauk!

Di ban raya Hồ Chí Minh meng dom thun jaik di ini, hu biak rilo menuac nao pasram yoga. Yoga lac sa dalam janih pasram siam ka pren yava, ka rup pabhap.. Thúy Linh –urang vak di rayo sap ndom VN daok di ban raya HCM hu kadha vak brei thau ka janih pasram ini:

Ngan saong rilo menuac di ban raya HCM, pasram Yoga jeng bruk bhian randap oh kurang hu, kayua nyu siam ka pren yava, ka rup pabhap. Yoga hu dom jalan pasram karei ka yaok menuac, yaok urang. Dalam nan hu 5 jalan pasram Yoga hu rilo menuac di ban raya HCM pilih ruah piah pasram, lac: Yoga thẩm mỹ (Yatha yoga), Yoga brei ka menuac ruak gah talang talaih saong rup pabhap; Yoga ka urang kumei metian, Yoga ka urang taha; Yoga ka uraniah

          Sa-ai Lưu Thị Hoa thun ini umo 33 thun, lac gru pato sang bac mầm non tư thục di Quận 10 ban raya HCM. Urak ini sa-ai daok khik, pato lớp chồi hu 30 anek saih. Kayua bruk ngak, yaok harei njauk ndom biai, nao mai rilo nan ye hadei di tuk biar harei mai sang, sa-ai mboh rup pabhap biak glaih glar. Tuk thau hu Yoga ini, sa-ai tut angan tame bac 1 khóa Yatha Yoga, lac Yoga brei ka urang bahrau pasram di kalup kapul Yoga Nhà thi đấu Phú Thọ - Quận 10. Hadei di 6 bilan pasram, sa-ai Hoa mboh rup pabhap khang kadang, hatung hatian chreih bui. Sa-ai khan lac:

       Tuk drei pasram drei mboh….  

Daok amuk Phan Thị Mười  daok di phường 12, Quận 10 thun ini umo jaik 60 thun. Amuk Mười pandik talang 2 akaok ta-uk meng rilo thun ini mai, yaom nao iek ruak di rilo labik, min ta-uk oh abih pandik. Hadei di 1 thun pasram Yoga Iyanga – brei ka urang ruak pandik talang talaih di kalup kapul Yoga Nhà thi đấu Phú Thọ quận 10 ban raya HCM, 2 akaok ta-uk di amuk nyu takik pandik biak rilo, pren yava jeng mboh siam mekre jang. Amuk Mười khan lac:

 “ Dahlak tame pasram Yoga ini hu labaih 1 thun, mboh ta-uk nyu takik pandik, urak ini dahak daok la yau habar jeng hu, oh daok mboh pandik ta-uk yau dahlau daih.”

Tapa pasang iek mboh lac, urak ini di ban raya HCM hu labaih 35 pasak, kalup kapul pasram Yoga. Yaok harei, dom labik ini hu labaih 100 menuac mai pasram. Dom menuac mai pasram nan, rilo meng lac menuac ngak bruk văn phòng, doanh nhân, nghệ sĩ atau urang negar lingiu ngak mbang duah hu rilo jien. Rilo menuac mek ini lac labik piah pasram siam ka pren yava, ka rup pabhap.
       Lingiu dom labik nan, bruk pasram Yoga di sang jeng hu rilo menuac pilih ruah. Kayua nyu oh abih tukvak nao mai, bo daok hu rilo tukvak jang piah pasram.

Sa-ai Lê Thị Hoài Đông daok di khu phố Phú Mỹ Hưng, phường Tân Phong, Quận 7, ban raya HCM hu 2 urang anek daok bac. Anek kacua di sa-ai lac Trần Lê Phương Anh thun ini umo 14 thun, nyu kaong ka-ing meng sit. Saong anek patui di nan lac  Hoài Anh, umo 7 thun. Tuk thau lac hu Yoga ka uraniah, sa-ai Đông nao da-a huấn luận viên Yoga mai sang pato ka 2 urang anek di drei. Hadei di sa tukvak pasram, sa-ai mboh ka-ing di Phương Anh nyu takik kaong, rup nyu glaong jang saong bac da-a hu siam jang. Sa-ai Hoài Đông brei thau:

         “ dahlau daih anek drei nyu kaong ka-ing, hadei di pasram Yoga hu 2, 3 bilan, drei mboh ka-ing nyu yau tapak veik.”

Daok adei Trần Lê Phương Anh khan lac yau ini:

Hadei di dom tuk pasram, anek mboh chreih bui saong khang kadang pren yava jang. Adei nao bac da-a hu siam jang”

Ndom ka kein laba di Yoga, amuk Nguyễn Thị Vân Anh – urang hu alabih 7 thun pato pasram Yoga khan lac:

 “Yoga ba mai pren yava siam mekre ka taong abih urang pasram. Meng menuac taha tal urang daok raniah jeng pasram hu. Piah ka nyu lagaih haong yaok urang tuk pasram, pagap yau urang kumei daok metian anek, urang khin pasram piah plaih galih glar tuk daok metian. Yaok urang tui caong khin, tui rup pabhap di drei bo pilih ruah janih Yoga pasram ka nyu lagaih  

Meda lac, Yoga hu ba mai siam mekre ka bhap bini ban raya HCM dalam bruk pasram rup pabhap, pasiam pren yava./.