Thứ trưởng Mintri Y tế Nguyễn Trường Sơn brei thau: "Meng bruk klauk jru yau urak ini, tal abih bilan 12/2021, dalam taneh ia meda klauk ginup mbang 1 ka rahra meng umo 18 thun tagok saong klauk mbang 2 (hu labaih 90%), gam tui di nan jeng klauk ginup ka ranaih meng umo 12 thun tui njauk pato tacei di Rajaei". Thứ trưởng Mintri Y tế ieu kakei dom tinh, ban oh iek bier, tuk halei jeng duah thau, samar mboh dom chủng bahrau njom mbak tame Việt Nam, paglaong dom bruk pasang iek, duah thau, langyah dom sruh jit. Bhap bini brei paglaong hatai pacang caga jit ruak.

Danak dak nghệ thuật “Dòng chảy bất tận - The Eternal Flow” hu peih ngak di  Expo 2020 Dubai (UAE). Bruk hu cong mong abih di  Việt Nam di Expo 2020 Dubai lac Harei  negar  Việt Nam (30/12/2021). Danak dak hu mintri ilamu  – Thể thao – Du lịch batabiak song hu rilo asar kadha siam gheih yau  bruk tuan hala dok Việt Nam; Lễ diễu hành; parang iek khan aow ; Adit  phim Việt Nam…Dalam bruk hu makna ni, Kapul  nghệ thuật tỉnh Đắk Nông hu  14 nghệ nhân hu mbaok tame parang main  danak dak  nghệ thuật piah yaih khan pok meyaom  thaot binguk  tỉnh Đắk Nông tal dom taneh ia.

Phó Akaok UBND tỉnh Ninh Thuận Lê Huyền bahrau mbaoh tangin tame sarak ka 864/QĐ-UBND patabiak jalan khik ramik Labik khik caga tasik Bein pakat negar Núi Chúa tukvak 2021-2025 ngan haong abih tih yaom jien ngak lac labaiah 3,3 tỷ đồng. Tui jalan ba tabiak dom bruk khik ramik yaom kaya pandap meng langik tasik, yaom inem krung ilamu – sajarah, peih ngak lagaih saong patagok dom yaom glaong di labik khik ramik tasik Bein pakat negar Núi Chúa. Bruk khik ramik labik daong khik tasik Vườn quốc gia Núi Chúa hu peih ngak haong mblang taneh praong abih tih lac 7.352 ha. Dalam nan, labik khik caga catang praong 667 ha; Langiu di nan, labik kreh tapen tasik vil val, jaik taphia haong labik khik ramik tasik jeng hu khik ramik piah pacang cakak, trun manieng dom kan kandah meng gah langiu.

  Tui Sở Du lịch tỉnh Bà Rịa – Vũng Tàu, urak ni, dom kapul  bất động sản prong dok tuh jien tame pachreih dom danak dak padeih padei tapen tasik. Dom danak dak yau: labik rivang du lịch Lâm viên Núi Dinh, Bein athur glai  Safari, labik  An Hải, mblang kapan  tuai dunya di  Vũng Tàu…  dok hu rilo urang buh jien tame ngak mbang  mai duah thau  peih batabiak hatai sahneng. Bruk ni, mboh lac  Bà Rịa – Vũng Tàu jeng lac sa dalam dom pasak  pachreih urang ngak bruk du lịch di taneh ia tame bruk patagok  du lịch biak siam, ba du lịch jeng gah kinh tế pal akaok di  tỉnh oh dok atah.

Harei ini, yaom maraik kalu di Gia Lai, Đồng Nai bier jang abih di darak pasa tuk daok di yaom 77.500 đ/kg. Daok di Đắk Nông, Đắk Lắk, Bình Phước maraik kalu hu blei haong yaom 78.500 đ/kg. Kayua yau nan ye, yaom maraik kalu oh hu tal tanut 100.000 đồng/kg yau kuhria dahlau di dom chuyên gia atah di ini 2 bilan. Makna hu biak rilo min abih di nyu nan lac kayua bruk blei di dunya trun meng jit Covid-19 (dalam nan hu bruk urang pablei salih di Trung Quốc padieh blei), dalam tuk bruk pajeng ba jeng gaok kan kandah.

Tui yaok pataom di blah mạng worldometers.info,  tal  mon 6 mesup  28/12 (tuk vak Việt Nam), tong abih urang ruak viêm jalan suah yava  cấp COVID-19  di dunya yam tapa tanut  281 triệu urang, dalam nan hu labaih  5,4 triệu urang metai.Bruk peih pabah mbang gilac veik  tại di rilo taneh ia dok dang anak dom cuang kandah bahrau, gam mbuan si rah tabiak jit ruak song njom mbak samar di  biến thể Omicron. Biến thể bahrau dok ngak ka đồ thị jit  COVID-19 đảo chiều, ngak ka urang njom bahrau song metai tagok gilac veik. Dom bhum jit “pandiak di abih” dok di  châu Âu. Jit ruak dok tamuh veik di  châu Âu tuk urang njom bahrau tagok khang di rilo taneh ia  châu lục ni. Ni jeng lac pasak jit ruak urak ni di dunya, biến thể Omicron tui kuhria meblah khang di dom urang ruak  di  châu Âu dalam bilan anak tal.

Tập đoàn Công nghệ Mỹ Ép-pồ (Apple Inc) brei thau lac brei kriek abih 12 cửa hàng di Ban New York, dalam tuk dom urang njom ‘biến thể Omicron daok tagok biak rilo di grauk labik dalam negar Mỹ.  Tui urang lambaok di Ép-pồ, tuai jeng daok meda taduan hu đơn kakei blei pandap tui jalan online di dom cửa hàng. Tui yaok pataom di Pasak pasang iek saong pacang caga jit ruak Mỹ, dom urang njom Covid-19 bahrau di Mỹ tagok 55%, lac tagok labaih 205.000 urang yaok harei dalam 7 harei tapa.

Harei 28/12, khaw tin karja Syria brei thau  Israel hu cuh phao tame negar ni njauk pui khuah di labik container caik pandap di pabah lamnge  Latakia. Ni lac mbang tong ka 2 di Israel mong tame Syria dalam bilan 12 ni.  Mintri Quốc phòng Syria brei thau bruk di Israel ngak khat lahik prong  meng pandap panda, song taneh ia ni hu tong yaom khat lahik.  Dahlau di nan, harei 7/12, Israel jeng tong tame pabah lamnge Latakia, njauk pui khuah song khat lahik ka jabat prong prang ni. Pabah lamnge Latakia di tasik Địa Trung Hải lac pabah lamnge tasik  prong di Syria, labik bo pabak padai brah, pandap mbang song dom janih pandap karei ka - Syria njauk tapa pabah lamnge ni./.

Urang lang: T.Thao& H.Pha -28/12/2021