Phun panat pajaih 

Yaom lac daok gah Meraong jalan roya 1, dalam bhum ia ndik dauk min di xã Hậu Thành, huyện Cái Bè, tỉnh Tiền Giang hu taong abih taneh ngak hamu salih tapa pala phun mbang baoh, dalam nan rilo meng lac phun panat Thái. Mikva daok pak ini brei thau lac, phun panat brei jien mek tame rilo jang phun padai nan ye ba gauk pala. Ong Nguyễn Văn Cư, Akaok UBND xã Hậu Thành brei thau. Phun panat ini mikva pala biak rilo, mboh rilo lac panat saong kruac aik. Dut haong phun padai mboh kein laba jang, tok huac hadei ini dom labik karei pala rilo jang ye kan pablei hu yaom. Tame bilan baoh kayau ye yaom biak biar. Drei oh pacang cakak hu kayua bal thei thei ngak, bal thei thei pala, oh hu jalan ngak halei piah quy hoạch pala phun hagait, xã drei oh ngak hu bruk nan.          

      Urak ini tỉnh Tiền Giang hu labaih 10.000 hecta panat, rilo abih bhum taneran kraong CL, pataom rilo di dom huyện Cái Bè, Cai Lậy saong Châu Thành. Tukvak tapa, hu tuk takik baoh, yaom panat tagok tal 40.000 đồng/kg, min tuk hu rilo ye yaom trun daok tok dom ribau đồng. Rilo baoh panat oh siam, po bein oh pablei hu, njauk ngak pandap mbang ka athur raong saong ikan.

        Ong Nguyễn Văn Phương, po bein di xã Mỹ Đức Đông, huyện Cái Bè, tỉnh Tiền Giang pala meteh ha panat brei thau, dahlau diah, panat hu kein laba biak glaong min tukvak jaik di ini yaom trun biar nan ye po bein hu takik kein laba. Pala panat mblah gauk mbuan ba tal bruk kan pablei hu: Tui dahlak mboh, urak ini pala panat biak rilo, min labik pablei tok hu Trung Quốc min, dom negar karei oh ka mahit ndom, nan ye oh tani tanat. Tui dahlak mboh juai pala phun panat tra bo palaih ruah dom janih phun pala karei hu yaom glaong jang, tani tanat jang.

Jaik di ini, taneh pala panat di bhum taneran kraong CL tagok tal dom pluh rabau ha, rilo di abih lac dom tỉnh Tiền Giang, Vĩnh Long, Long An, Hậu Giang, Bến Tre. Di Bình Phước saong Bình Dương, taneh pala panat jeng tagok biak rilo. Yaom lac panat janih phun mbuan pala, brei rilo baoh, jien buh tame takik, tukvak paik baoh samar, yau nan min labik pablei tabiak, abih di nyu nan lac darak pasar negar langiu oh ka hu peih prong. Tuk taneh pala biak prong meda mbuan ba tal laik yaom, kan pablei. Ong Phạm Anh Linh, Phaok akaok UBND huyện Chợ Lách brei thau: Urak ini bhap bani daok salih tapa pala panat, diuk hu dalam pandiak thu, ia njom mbak. Yau nan min, tapa duah thau jeng mboh pala biak rilo, mbuan ba tal kan pablei hu abih. Kayua nan ye, khaol dahlak kakei mikva juai jak gauk pala panat tra bo njauk palih ruah dom janih phun karei hu darak pasa piah pablei.

Mboh lac, bruk dom sang bein Bhum taneran kraong CL jak gauk pala panat Thái piah patrun khat lahik kayua pandiak bhang, ia nyaom mbak mbuan ba tal kan kandah ka labik pablei tabiak tuk darak pasa oh ka peih prong. Kayua YAU nan ye, langiu di bruk pambuak gauk pala, jhul khang bruk ngak tabiak panat tui jalan pablei tabiak negar langiu, gah chức năng dom puk palei njauk caik hatai tal bruk quy hoạch bhum taneh pala panat; taphia di nan pathau khan, tacei pato sang bein pala dom janih phun mbang baoh karei hu năng suất, chất lượng, pabak ginup ka darak pasar saong pablei tabiak negar langiu./.

  Urang lang: Jasi-8/7