Adei Xèo Chu dang tapen rup cih di drei 

Ndih tapui thun 2007 dalam sa baoh sang hu darah ngak mỹ thuật (sang hu sa bilik rup cih praong di ban raya Hồ Chí Minh), adei Phó Vạn An meng sit hu ngak randap haong dom janih rup cih.

Jalan nao tal hội họa di adei Phó Vạn An hu peih tabiak meng di tuk adei umo 4 thun. Tal urak ni, meng labaih 300 blah rup cih ginup janih hu mbaoh tangin angan Xèo Chu. (Xèo Chu hu makna lac “drei pabui sit” – jeng lac angan ieu anit ranam di sang piah ieu adei)

Yaom lac daok sit umo, min blah rup cih di Xèo Chu hu rilo họa sĩ haong urang hu angan je taong yaom glaong, gam haong nan, adei jeng hu rilo bruk njauk pok meyaom, yau ye: blah rup cih hu parang iek di rilo labik, hu mbang parang iek rup cih di adei pak Singapore (2018); New York, Mỹ (2019); mek hu giải “Khát vọng dế mèn” (2021). Di bruk ngak pahla Saigon Summer Ball mbang ka 10, rah tabiak harei 15/9/2018 di ban raya Hồ Chí Minh, blah rup cih Gladiolus di Xèo Chu bhian hu to yaom tal 22.000 USD.

Naih joi yau nan, min meda lac bruk ngak ka urang mboh anit ranam saong iek praong abih di Xèo Chu lac hatai ngak pahla. Meng nan mai, jaik abih pok jien taduan hu meng bruk pablei rup cih di drei, Xèo Chu saong sang jeng pandar ka bruk ngak pahla.

Xèo Chu brei thau, adei saneng tal bruk to yaom rup cih ngak pahla, meng mehit amaik lac bruk njom mbak jit ruak di ban raya HCM jaik di ni biak trak damak. Kayua yau nan ye, Chu likau amaik peih mbang to yaom rup cih ngak pahla piah hu daong hasit ka menuac urang. Xèo Chu daok brei thau lac, dahlau daih, adei hu peih mbang parang iek online Pandemic Paintings padang kadung jien daong ka rahra. Chu yaih khan 20 blah rup cih hu 3 asal kadha lac: bingu, hamu takai kanyan, tasik. Hadei di nan, Xèo Chu to yaom online 8 blah dalam 2 bộ sưu tập tasik saong bingu, saong pablei veik jaik 850 blah rup cih in, tapa nan padang hu kadung jien 2 tỷ 950 triệu đồng.

Xèo Chu saong sang pandar abih jien ni piah blei mac suak yava, mac shock tim, 1.000 bộ pacang khik rup pabhap PPE, 10.000 blah pataih pacang mbaok N95 daong ka sang iek ruak Đại Học Y Dược. Gam haong nan, Xèo Chu jeng hu daong 388 triệu đồng, jaik 2 tấn tamekai, patei that tame kadung njam patam, baoh kraoh di sang iek ruak Tâm Anh.

Xèo Chu brei thau dom bruk daok kuhria ngak di anak tal: “ adei daok khik hatai takre cih rup cih di drei saong pandar jien pablei rup cih meng ini tal umo 18 thun ngak kadung jien daong ka dom labik njauk kan kandah. Adei caong lac meda rik hasit daong ka raidiuk di yaok manuac urang hu siam mekre, haniem phul jang”./.

Urang lang: Thu Thảo – 23/08