Oh lac sangka, ngak siam bruk kapul urang kamei, saai Đàm Thị Tiệp, bangsa Tày, akaok chi hội urang kamei palei Kẻ Hiệt, xã Đào Ngạn huyện Hà Quảng (Cao Bằng) daok pataom tame patagok kinh tế, yam tagok ngak kaya meda, daong ka ralo adei saai kamei hội yam tagok truh kan kathaot.

Ndih tapui thun 1978 dalam sa baoh sang ngak nông di huyện Hòa An, hadei di tuk nao tok pasang di palei Kẻ Hiệt, xã Đào Ngạn (Hà Quảng), diuk pasang saai tok ngak sa vụ padai nan ye luac thun tok di ginup mbang, rai diuk gaok ralo kan kandah.

Lac urang dalam Kapul urang kamei, saai Tiệp hu mbaok tame dom tal pasram megru ilamu raong glang, pala drak. Thun 1997, saai pala pakao hala min kayua oh ka hu jamriak li-ua nan ye saai tok pala hu labaih 2.000 m2 piah patagok jien mek tame. Thun 2009, saai mesraiy 15 triệu đồng di gilang pariak sarak karja huyện Hà Quảng piah raong pabui ralo. Thun 2013, khang hatai buh tabiak jaik 50 triệu đồng piah blei jamriah chai mai chai mbang pah ka bhap bini, saai Tiệp peih  cửa hàng pablei pandap mbang raong glang. Urak ini, yaok thun saai pala labaih 6.000 m2 pakao hala chất lượng glaong, jien mek tame meng 40 tal 60 triệu đồng sa vụ. Tapon pabui ralo tuk halei jeng hu labaih 40 drei sa thun, yaok thun pablei meng 3 tal 4 tấn pabui ralo, jien mek tame labaih 40 triệu đồng. Meng bruk pala pakao hala, raong pabui, pablei pandap mbang raong glang, sang saai mek tame hu labaih 120 triệu đồng sa thun.

Meng dom ilamu hu pasram megru saong dom ilamu pataom hu tapa bruk ngak, saai abih hatai daong ba, tacei pato ka rilo adei saai kamei  gam bac megru saong ngak tui. Thun 2012, saai hu pok ngak akaok dhar kapul urang kamei palei Kẻ Hiệt. “Piah ka dhar kapul ngak bruk hu kein lagaih, saai kham merat pathau khan jak ba peih bruk “Urang kamei kham merat bac megru, ngak bruk sáng tạo, tiến bộ, dak padang baoh sang bình đẳng, trei sil, hanem phon”. Sa-ai Tiệp daok hu daong 10 urang hội mesraiy 20 triệu đồng oh mek laba, daong 5 urang hội mesraiy 2,5 tạ thóc tukvak cang yuak. Meng nan, ralo urang hội dalam palei dak harei dak patagok kinh tế, patruh eik patrun kathaot./.