Hu mbaok di “Kadai pablei pandap 0 ndong” – kadai hu angan makna abih di darak pasar raya Tet kong ndoan thun 2025, biak bui sambai. Pan di tangin harak blei pandap hu yaom 120 ribau dong, ong Nguyễn Anh Tuấn, 13 thun ngak bruk di Kongti Huy Việt Tây Đô bui sambai ndom lac:

“Dahlak hulin mboh biak bui sambai, haniem phol brei ka dom urang gaok kan kandah. Dalam ini dahlak hulin blei jaluk, jam, ia mesin, asar tavar…Dahlak hulin jeng caong hu rilo danak dak piah ka urang ngak bruk hu ginup jang.”

Tui amuk Huỳnh Thị Hiền, Phaok Akaok Lien ndoan lao ndong Ban Can Tho, thau ka hatai sahaneng di urang ngak bruk, thun ini dom kong ndoan pakat palei ba gauk jak ba ka “Kadai pablei pandap 0 dong” dom pandap panda, khan ao saong dom paok jien rik pataom hu jaik 70 trieu dong. Mban peih ngak harak blei pandap 0 dong (hu yaom 120 ribau dong), rabha ka urang dalam kong ndoan, dalam nan ieu lac urang di kong ndoan nghiep ndoan bhum palei:

 “Kadai pablei pandap 0 dong” ini jeng ieu lac tame thun ka 3 ndih dalam bruk kuhria dahlau di Mban peih ngak Darak pasar Tet kong ndoan. Kayua hu makna biak praong di kadai kaya pablei ini yau nan ye mboh tuk halei jeng hu kong ndoan pakat palei, dom urang ngak mbang pablei salih hu mbaok tame rik daong jien. Thun ini pandap panda kaya hu siam, hu bahrau, hu lagaih.”

Danak dak daong haong urang kong ndoan, urang ngak bruk patakik pakurang dom kan kandah saong jeng lac tukvak piah pambuak kapul Kong ndoan, urang kong ndoan, urang ngak bruk haong pakat uy, karja palei, urang ngak mbang pablei salih, dalam bhap bini rahra di dalam bruk sangka kuhria ngan haong urang kong ndoan, urang ngak bruk. Ong Nguyễn Trọng Nghĩa, Yam ndok Dhan ngak Yen sao Nha Trang di ban Can Tho brei thau lac:

“Ngan haong Darak pasar Tet kong ndoan thun ini, khol dahlak hulin ba mai dom danak dak siam gheih yau ye: blei 1 alin hadiah 1; blei 5 alin hadiah 1; patrun lap yaom jeng yau rilo pandap patrun jien karei karei. Dahlak hulin mboh danak dak hu peih ngak praong, gah ngak mbang pablei salih khol dahlak hulin pablei hu rilo ka urang blei kaya pandar. Tapa di nan, urang blei kaya pandar jeng hu kein lagaih kayua blei hu dom pandap panda kaya siam, yaom kaom lagaih. Dahlak sahaneng lac danak dak ini njauk brei hu pambak praong saong khik tani tanat kajap karo brei ka rilo thun, oh lac sa labik di Can Tho blaoh daok brei ka rilo nyu di dom tinh karei karei di dalam bhum Tanerran kraong Cuu Long.”

Gam gam haong darak pasar Tet kong ndoan thun 2025, Kapul Lien ndoan lao ndong Ban Can Tho jeng peih ngak Danak dak “Tet Jum pataom – Bal bingu akaok thun dhar phol Ndang” alin hadiah yaok ribau paok pandap saong pandap panda kaya bhian hu ka urang kong ndoan gaok kan daman; rah rivang lakau tadhau ayuh salam harei tet tal dom labik iek glang brei saron mbon selamat brei ka harei raya Tet siam mekre salamat, pahacih sa-at labik daok, sang iek ruak, malam tame thun barau,…Kong ndoan gah pato megru daok peih ngak Harei pakacah ngak 1.000 baoh tapei nung alin hadiah brei ka dom baoh sang kan kathaot, urang kong ndoan daok di sang pah. Langiu di nan danak dak harei raya Tet daok hu dom main yaih ilamo adaoh tamia, piah daong pachreih hatai sambai brei ka urang ngak bruk. Ong Nguyễn Ngọc tấn, Phaok Akaok Lien ndoan Lao ndong Ban Can Tho brei thau:

“Thun ini langiu Darak Tet kong ndoan, dom pakat kong ndoan jeng hu dom danak dak yau peih bruk taom mbaok, alin hadiah pandap nda kaya, nao rah rivang urang ngak kong njauk bala tuk ngak bruk. Tapa dom danak dak sangka kuria ka Tet, dalam nan hu lac Darak pasar Tet kong ndoan jeng caong khin dom pakat dang pan akaok, bol bhap rahra jeng sangka ralo jang tal urang kong ndoan, urang daok kan kandah piah daong, klah rabha dom dalam raidiuk dom urang daok kan daman nan.”

Bruk sangka kuhria Tet ka urang kong ndoan, urang ngak bruk ieu lac sa bruk ngak bhian, bhian ngak yaok thun di dom pakat, dom gah, di kapul kong ndoan dalam negar, dalam nan hu Ban Can Tho. Meng bruk ngak gheih ghang siam mekre, ndung bak hatai anit ranam di kapul kong ndoan, caong khin brei ba mai tal ka urang kong ndoan, urang ngak kong daok kan daman hu sa harei raya Tet trei sir, haniem phol, bui sambai, tani tanat jang dalam raidiuk./.