Palei Cầu Gẫy lac 1 dalam 2 palei di xã xã Vĩnh Hải, huyện Ninh Hải, tỉnh Ninh Thuận hu taong abih menuac lac urang Raglai. Kayua ilamu dok biar, rilo meng pala drak saong rong glang nan ye raidiuk  di bhap bini dok gaok rilo kan kandah, boh sang kan kathaot dok hu rilo. Lac urang dang akaok dhar kapul urang kamei palei Cầu Gẫy, saai Cao Thị Thủy kham merat pambuak song mban khik ramik palei song dom kapul nyaom jak ba bhap bini Raglai dalam palei jhul patagok KT, tani tanat rai duik. Dalam kadha “Kreih camin palei negar” harei ni, daa mik va song tong abih gauk pang kadha vak  angaok mbao Hội Liên hiệp Phụ nữ Việt Nam yaih khan ka akaok dhar kapul urang kamei ni.    

Thun 2005, saai Thủy hu urang kamei dalam palei pok ngak akaok dhar kapul urang kamei. Dalam bruk ngak ini, saai bhian pambuak bruk song dom kapul nyaom dalam palei pathau khan, paglong akaok sahaneng di bhap bini dalam bruk định canh định cư, patruh eik patrun kathaot, ba ilamu kỹ thuật tame bruk pala drak. Saai hu padang kalup kapul “Urang kamei oh ndih tapui anek ka 3” song jhul  pakhang bruk pathau khan, pachreih ba hội viên, urang kamei ndih tapui hu kế hoạch, iek glang pren yava, rong pato anek bhik. Abih di nyu nan lac, kapul urang kamei pambuak bruk ngak pandap thủ công mỹ nghệ meng dom sản phẩm phụ di glai yau asar bồ đề, cam thảo, hạt dẹp… ngak tabiak dom janih pandap yau móc khóa, kon tangin, kon takuai… kayua saai Thủy dang akaok pachreih hu rilo urang kumei tame ngak, dong ka urang duah hu jien. Taphia di nan, saai Thủy dok khik ramik siam phun jien mesraiy tapa tín chấp di Kapul urang kumei, dong ka rilo urang kumei hu mesraiy jien piah pala drak, rong glang hu kein laba. Meng nan, rai duik di hội viên, urang kamei dalam palei hu patagok, baoh sang hội viên kan kathaot trun daok takik.

Dalam bruk ngak jang yau dalam rai duik, saai Thủy jeng abih hatung hatian saong bhian klah rabha, dong ka urang nan ye padang hu angan je di puk palei. Tuk hu angan je dalam bhap bini, saai Thủy bhian nao taom gaok, jak ba mik va ngak siam dom sarak di Đảng, hukum di karja, pachreih tui dom danak dak, dự án đầu tư di TƯ, di tỉnh, huyện ka bhum urang bangsa Raglai. Taphia nan, peih ngak siam dom bruk kayua puk palei peih tabiak yau: klaak dom adat cambat klak oh daok lagaih, padang boh sang ilamu, palei ilamu, khik ramik talei jum pataom song khik caga siam mekre di puk palei.

  Oh lac joi bruk palei, saai Cao Thị Thủy dok lac kreih camin dalam bruk sx, ngak mbang naih joi. Dom thun dahlau deih, sang saai jeng lac sang kan kandah. Thun 2006, saai khang hatai mesraiy 5 triệu đồng meng gilang pariak sarak karja huyện Ninh Hải peih quầy tạp hóa sit, pablei ka mik va dalam palei. Tal thun 2009, saai mesraiy gac 15 triệu đồng piah peih taneh bilau pala tangei, pa-ok blait song rong pabui juk, limo menek. KT tani tanat, saai bayar sraiy ka gilang pariak njauk tukvak song kham ngak mbang saong yaok thun mek tame hu dom pluh triệu đồng.

Ong Mấu Văn Lếch, Akaok palei Cầu Gẫy ndom lac: Saai Cao THị Thủy lac akaok dhar kapul urang kamei sami samar, abih hatai dalam bruk ngak song hu angan je. Kayua thau hatai caong di mik va song bhian dong ka urang tuk gaok kan kandah yau nan ye tuk pathau khan, jak ba bhap bini ngak tui dom sarak di Đảng hukum di karja, saai THủy hu urang pachreih tui. Tapa nan, dong ka mik va dalam palei paglong akaok sahaneng, kham merat patagok KT, ngak jeng mbaok meta bahrau ka palei Cầu Gẫy./.