Oh lac yam tagok patruh kan kathaot, ngak kaya meda ka rup drei, ka baoh sang drei bo daok daong ka ralo baoh sang kan kathaot dalam palei ilamu pala drak, phun jien, pajaih phun pala piah patruh eik patrun kathaot, rik daong ka dom baoh sang urang nông dalam palei hu tani tanat raidiuk. Nan lac ong Cao Xuân Lãng, akaok kapul urang nông xã Quang Thuận, huyện Bạch Thông, sa dalam dom kreih camin hadah ka bruk ngak kinh tế joi di tỉnh Bắc Kạn. Urang vak Thu Hằng hu kadha vak khan brei thau ka kreh camin ini: 

Bắc Kạn lac sa tỉnh bhum ceik daok kan kandah, urak ini jien mek tame di bhap bini mai meng bruk ngak nông, ngak glai, abih di nyu nan lac dom puk palei daok dalam bhum atah bayah. Min mai tal xã Quang Thuận, huyện Bạch Thông tukvak ini hu mboh ralo thương lái daok di dom tỉnh jaik taphia yau Cao Bằng, Thái Nguyên, Lạng Sơn mai pataom blei kaya nông. Nao dahlau dalam bruk ngak mbang pablei salih ini, lac baoh sang ong Cao Xuân Lãng, daok di palei Khuổi Piểu, xã Quang Thuận, huyện Bạch Thông. Ong khan lac, rup ong bhian ngak ralo bruk yau ngak padai, duan kayau pablei njuh, pablei hala dong atau tui mikva dalam palei nao jah glai ngak puh labik ini labik daih, jien mek tame oh tani tanat.

Thun 1996, ông Lãng nao mesraiy phun jien di gilang pariak ngak nông tỉnh Bắc Kạn, buh tame bac megru ilamu di dom tỉnh karei mai pala phun cam quýt, janih phun đặc sản di bhum ceik gah brak. Urak ini, baoh sang ong hu jaik pluh ha phun mbang baoh brei năng suất glaong, dalam nan hu 2ha meteh cam, quýt, hồng oh asal, 7 công kam saradang , 1 công thanh long ralo meriah. Taphia di nan ong daok pala phun pajaih dom janih pablei ka puk palei, patagok jien mek tame ka baoh sang. Kayua hu yau nan, meng thun 2010 tal urak ini, abih tih jien mek tame di baoh sang ong Lãng thun hadei bhian glaong jang thun dahlau, kaoh bloh phun jien buh tame ngak, baoh sang ong daok labaih hu meng 200 tal 300 triệu đồng. Thun 2013 abih tih jien mek tame di baoh sang ong kaoh bloh phun jien buh tame ngak, daok labaih hu 400 triệu đồng. Oh lac yau nan saoh, yaok thun baoh sang ong daok ba bruk ngak ka yaok pluh urang dalam palei ngan saong yaom jien meng 120 tal 150 ribau đồng harei ngak bruk, daong ka dom baoh sang kan kandah labaih 2.000 pajaih phun mbang baoh dom janih. Ong Hà Hữu Hợp, sa urang daok di xã Quang Thuận, huyện Bạch Thông khan lac:

 “Dalam tukvak tapa, saai Lãng hu brei mesraiy phun jien, mek pajaih dahlau, tacei ilamu pala drak, iek glang khik mepiah ka bhap bini. Oh lac dalam xã bo di lingiu xã, ralo bhap bini dalam tỉnh jeng hu mai duah thau, bac megru ilamu bo saai oh padauk hagaih. Mikva lac urang hội, atau urang lingiu hội jeng abih hatai anit ranam njauk saong jalan lac hu yau drei, xã hội patgok”.

Meng dom rik daong yau nan, ong Cao Xuân Lãng hu bhap bini pok ngak akaok kapul urang nông xã ralo thun gam. Oh lac ngak kaya meda ka baoh sang, bo meng ilamu di rup drei, ong hu peih bruk tacei pato ilamu bahrau ka urang hội pala menaih sung bilan saong ilamu khik mepiah cam, quýt hadei di tuk paik baoh; ilamu pala cam saradang trun hamu sa vụ, tui jalan “pan tangin tacei bruk”. Urak ini xã Quang Thuận, hu labaih 95% dom baoh sang hu bein phun mbang baoh. Jien mek tame di yaok baoh sang meng bein pala phun mbang baoh meng 500 tal 600 triệu đồng. kuhria rah tapa yaok akaok menuac mek tame hu 21 triệu đồng  sa thun. Ong Cao Xuân Lãng khan lac, anak tal, patui jalan khik kajap saong ba dom ilamu bahrau tame bruk ngak mbang piah yaok thun brei jien mek tame glaong jang, hu điều kiện piah daong ka dom baoh sang kan kathaot dalam palei  saong hu mbaok tame danak dak bruk ngak pakat negar padang ngak palei pala barau. Ong Cao Xuân Lãng brei thau:

 “Kol dahlak thau lac, meng ini tal thun 2020, quỹ taneh oh patagok hu gac, ngak yau habar gam saong quỹ taneh patagok phun mbang baoh khik hu tani tanat, min yaom pandap hu patagok. Đầu tư tame phun hu yaom glaongyau langiu phun cam, quýt, hồng, mận, ye duah dom phun di puk palei karei piah pala pablei brei ka mikva, tacei ba mikva gam patagok”.

Oh lac nao dahlau dalam bruk pakacah gauk ngak mbang, daong ba gauk patruh eik patrun kathaot, ong Cao Xuân Lãng daok gam saong baoh sang đầu tư jaik 20 triệu đồng saong rilo harei ngak piah peih praong, tuh bê tông hu labaih 600met jalan palei, daong ka bruk nao mai hu mbuan lagaih jang. Thun 2013, ong hu TƯ kapul urang nông VN palih ruah lac sa dalam 62 urang nông hadah krah pakat negar./.