Di tuk pahadar  2 thun danak dak "Sa  triệu hala dok negar gam hong urang taong ikan kak kajap haong tasik" kayua mbao  Người Lao động ba tabiak, harei kabroi 10-6, Akaok negar  Nguyễn Xuân Phúc payua 5.000 hala dok piah alin hadiah ka urang taong ikan di dom bhum tasik palao kaoh dalam taneh ia.  Hadei di 2 thun peih ngak, tal urak ni, danak dak , "Sa  triệu hala dok negar gam hong urang taong ikan kak kajap haong tasik" hu jao labaih 400 ribau hala doh negar  ka 19 tỉnh, ban (lac dom urang tong chap ikan kak kajap haong tasik, urang dok rah tui jalan tapen negar angaok haluk,  dom đồn biên phòng). Anak tal, danak dak daok kuhria jao  560 ribau hala dok negar  ka 28 tỉnh, ban  hu tasik dalam negar, tapa nan patagok hadah hadai bangsa, dong ka urang tong ikan khang hatai, jum pataom gauk, ba gauk tabiak tasik atah, tong chap ikan.

UBND TP.HCM bahrau tabiak sarak peih ngak danak dak patagok jalan mbak nao mai dalam TP.HCM vaktu 2020 - 2030. Rilo danak dak praong gah jalan mbak nao mai hu ba tabiak piah samar buh jien tame ngak. Tui danak dak, dalam vaktu 2021 - 2030, TP pataom tame peih praong dom jalan atah labaih 652 km, radaih buýt samar, buh jien tame ngak pasiam dom jalan radaih nduac samar, jalan roya pambuak TP.HCM haong dom tỉnh dalam bhum kinh tế praong gah meraong tui quy hoạch hu brei adat blaoh. Taong abih yaom jien buh tame ngak tui kuhria lac 970.654 tỉ đồng, dalam nan phun jien di kadung jien karja jaik 399.29 tỉ đồng. Ta-eng thun 2021, dom danak dak tui kuhria hu ngak salah lac: 4 jalan praong dalam khu đô thị bahrau Thủ Thiêm, tatua Thủ Thiêm 2, peih praong jalan Đồng Văn Cống (labik meng tatua Giồng Ông Tố 2 tal nút giao thông Mỹ Thủy)...

Tui bruk palih ruah anek saih tame tal 10 trung học phổ thông kayua UBND ban  Hà Nội brei thau, harei ni dom anek saih meda ngak harak gar piah tame pakacah , bac bruk pakacah meng jalan online kayua bruk rah tabiak srau kadau di jit  COVID-19. Meng di melam kabroi, dom sang bac hu peih  ka thí sinh bac  quy chế jeng tui jalan online. Bruk ni ngak patrun tuk vak nao mai, patrun sa var pataom gauk di sang bac, dong khik caga siam mekre dalam tuk jit COVID-19 dok rah tabiak srau kadau. Mbang pakacah tame tal bac 10 trung học phổ thông di anek saih di Hà Nội hu rah tabiak dalam harei  12 song 13-6 (harei sanerca song adit) ngan saong gah oh chuyên. Harei  14-6 song  15-6, thí sinh hu mbaok pakacah di dom sang bac, khối chuyên di Hà Nội.

Biar harei 10-6, akaok Mban ngak bruk urang QH Nguyễn Thị Thanh brei thau, Hội đồng Bầu cử negar hu ginum biai saong hu sarak 746 ka bruk oh xác nhận tư cách urang QH di ong Trần Văn Nam, UVTW Đảng, Bí thư Tỉnh ủy Bình Dương. Sarak hu taong abih urang dalam Hội đồng hu mbaok di tuk nan buh phiếu pachreih tui. Akaok mBan ngak bruk urang QH Nguyễn Thị Thanh ndom lac: “Tuk camereip brei mboh ong Trần Văn Nam ngak suan ka dom bruk urang đảng oh brei ngak. Dalam tuk ngak Phaok CT tỉnh Bình Dương, ong Trần Văn Nam ngak suan gah khik ramik karja, abih di nyu lac gah taneh riya. Tui nan, mboh lac ngak suan adat hukum ba tal khat lahik trak. Nan lac makna cambaih laih piah Hội đồng Bầu cử negar oh taduan brei ong Nam ngak urang QH”.

Học viện Quân y brei thau, biar harei kabroi, 19 urang halan hatain camereip hu klauk iek vắc-xin Nano Covax vaktu ka  3. Hadei di tuk klauk, 19 urang halan hatain ni hu pren yava siam oh njauk hagait. Dom urang halan hatain ni hu mai klauk veik mbang 2  hadei di  28 harei. 42 harei meng di harei klauk mbang camereip, dom urang halan hatain ni hu mek mẫu piah tong yaom bruk miễn dịch di  vắc-xin. Dalam vaktu ka 3, vắc-xin Nano Covax hu klauk iek ka labaih  13.000 urang halan hatain.

Cảnh sát Trung Quốc bahrau ini hu cap mek labaih 1.100 urang pambuak tal dom bruk rao jiensuan hukum tapa bruk pandar jien ảo.  Tui panuac khan di Mintri An ninh negar Trung Quốc, labaih 170 kapul tội phạm njauk cap mek dalam bruk patagok pasang iek cai pandar jien điện tử. Dom kapul tội phạm pandar jien ảo piah salih dom pok jien suan hukum, saong salih suan hukum tapa sàn giao dịch jien điện tử, ngak khat lahik saong ba tal kan kandah biak trak ka kinh tế Trung Quốc.

Thủ tướng Nga Mi-kha-in Mi-su-xtin (Mikhail Mishustin) bahrau mbaoh tangin tame sarak tabiak truh sa thỏa thuận saman hadei di Chiến tranh Lạnh hong Mỹ pambuak tal bruk pacadu dom bruk brei takik nao mai ngan  song dom urang ngoại giao di gauk. Biên bản kanal hadar di thun 1992 ka  “bhum taneh peih”, hu mbaoh tangin hadei di tuk  Liên Xô tayah tayac, njauk hatai brei klaak  dom labik “dok” angaok bhum taneh di gauk song brei adat ka  dom  urang ngoại giao 2 negar nao mai bo oh cang likau adat.

  Việt Nam  khang panuac oh njauk hatai bruk tướng Philippines ravang pulao Thị Tứ lac sa dalam dom palao dalam Trường Sa di Việt Nam bo Philippines hu panuac lac ngak po. Urang brei panuac di mintri Ngoại giao Việt Nam Lê Thị Thu Hằngdalam mbang họp báo thường kỳ harei 10-6 ndom lac: "Yau rilo mbang hu ndom blaoh, Việt Nam hu ginup bruk di sajarah saong adat hukum piah brei mboh quyền ngak po di dom pulao Trường Sa, njauk haong adat hukum di dunya.Việt Nam khang hatai phản đối yaok bruk ngak lih tame quyền ngak po saong dom quyền pambuak tal di Việt Nam ngan saong pulao akaoh  ini"./.

Urang lang: M.Phuong – H.Pha - 11/6/2021