Di bhum tapen negar Chiềng On, Yên Châu, Sơn La, yam tapa dom kan kandah di taneh riya, di bruk pala drak, hu oh takik mikva urang bangsa takik labik ini yam tagok jeng dom kareih camin dalam bruk ngak mbang kinh tế, patruh eik, patrun kathaot, jien mek tame yaok rituh triệu đồng yaok thun. Kareih camin akaok palei Nà Đít Vì Văn Bùn bo Triệu Biên – urang vak di rayo sap ndom VN daok di bhum Tây Bắc caong khan brei ka mikva saong taong abih gauk thau. Daa mikva saong taong abih tui pang.

Dalam baoh sang padang ngak yau biệt thự  mini daok jaik si ngak blaoh, sa-ai Vì Văn Bùi khan lac: Dahlau diah kayua sang hu ralo adei sa-ai, bruk raong glang piah mbang,  pala drak tui jalan meng kan nan ye kathaot rambah nyu tui miat sang sa-ai saong mikva dalam palei meng thun ini tapa thun diah.

Meng hatai kham merat yam tapa kan kandah, sa-ai hu mbaok tame dom tal pato pathram raong glang, pala phun mbang baoh, nao rivang iek, bac megru dom jalan ngak mbang kinh tế hu kein laba, njauk haong taneh riya di puk palei drei kayua huyện, xã peih tabiak. Gam bac, gam ngak, akaok mereip sang sa-ai pala tangeiy, phun mbang baoh, raong limo kubao, pabui, pabe, menuk ada, saong kuac danao raong ikan. Hu oh takik mbang sa-ai njauk khat lahik dalam bruk raong glang kayua jit ruak, yaom kaom tuk trun tuk tagok tui mùa. Hadei di dom mbang yau nan, sa-ai kham merat jang,eng drei bac tapa harak báo, klauk ginup dom janih jru vacxin pacang caga ruak ka menuk ada, limo, kubao. Sang dahlak hu ralo adei sa-ai, kan kandah meng dahlau mai. Hadei di ini diuk pasang njauk hatai gauk padang mbang angui, raong limo kubao, pabui, menuk, pabe, kuac danao raong ikan, pala tangeiy, pala padai, blaoh patak pataom livik livik harei jeng hu phun jien.

Urak ini sang sa-ai hu labaih 15 ribau mét vuông tangeiy saong padai, labaih sa hecta phun sơn tra, 120 phun kruac bhung, mận, đào, labaih 2.000 mét vuông danao ikan daok mek pablei. Yaok thun meng mô hình ngak mbang ini sang sa-ai hu jien mek tame labaih 250 triệu đồng. Hadei di tuk hu phun jien, sa-ai pablei salih limo kubao, blei mac xúc, radaih ô tô piah duh ka mikva dalam bhum padang ngak sang danaok, pajeng ba pandap panda kaya nong, patagok jien mek tame. Rai diuk mai meng nan bo grap tanat, cak rok patagok. Sang danaok prong siam hu yaom labaih 2 tỷ đồng si ngak blaoh nan lac bruk jak jeng hu mboh di anak meta ka dom thun kham merat ngak mbang di sa-ai saong diuk anek.

Palei Nà Đít labik sa-ai Vì Văn Bùn daok, hu 170 baoh sang, labaih 800 urang, taong abih nan lac bangsa Sinh Mun, baoh sang kathaot biak rilo. Tuk halei jeng saneng mboh lac ngak hagait piah daong ka mikva tabiak truh kathaot, bo lac urang dang akaok palei, sa-ai Bùn kham merat pathau khan, tacei pato mikva salih phun pala, athur raong. 5 thun mai ini, sa-ai daok buh jien blei khak drak, pajaih phun pala pablei tavak ka mikva, bloh mikva bayar hadei min oh mek jien laba. Hadei di tuk mikva thu hoạch kaya nong, pablei hu jien meng ba-yar veik ka sa-ai. Dom baoh sang kan kandah, sa-ai abih hatai brei nyim phun jien, anek pajaih, phun pajaih. Sa-ai Vì Văn Nàn, sa baoh sang daok dalam bản hu sa-ai Bùn daong, urak ini rai diuk sa-ai hu ginup meda tagok, brei thau: Cei nan gam ngak akaok palei, gam daong ka mikva dalam palei khak drak, pajaih. Hadei di ini, mikva meng ba-yar veik ka cei nan, cei daong palaghaih ka mikva dalam palei yau nan.

Tui sa-ai Vì Văn Bùn, meyah kham merat, ye tabiak truh hu kan kathaot, yam tagok ngak meda. Kadha prong abih nan lac palih ruah hu mô hình, jalan ngak mbang, anek pajaih, phun pala njauk haong taneh riya langik tasik di puk palei drei./.