Akaok Quốc hội Vương Đình Huệ hu taom gaok 6 Đại sứ Việt Nam

Melam 5/9 tui tukvak pak nan, di ban ine Vienna, Cộng hòa Áo, Akaok Quốc hội Vương Đình Huệ hu taom gaok 6 Đại sứ Việt Nam di châu Âu lac: Đại sứ Việt Nam di Séc; Đại sứ Việt Nam di  Slovakia; Đại sứ Việt Nam di  Hungary; Đại sứ Việt Nam di  Ba Lan; Đại sứ Việt Nam di  Áo gam lac Đại sứ di Slovenia song Đại sứ Việt Nam di  Đức. Di var taom gaok, dom Đại sứ brei thau ka bruk bhap bini urang Việt Nam di dom negar pak nan.Njauk caik hatai lac  kayua jit COVID-19 di châu Âu rah tabiak srau kadau dalam thun 2020, yau nan ye bhap bini gaok rilo kan kandah dalam bruk pablei salih song diukrai. Akaok Quốc hội Vương Đình Huệ tong yaom glong dom jabat lambaok urang Việt Nam di negar langui, dalam nan hu dom negar châu Âu kham merat peih bruk likau vaccine mek hu siam mekre, saong ieu dom Đại sứ kham merat meng rilo jalan ngak, ginum biai atau blei vaccine pacangCOVID-19.

Jeng dalam biar harei 5/9, Thủ tướng Rajaei Phạm Minh Chính, Akaok mban tacei pato pakat negar pacang caga jit COVID-19 pan akaok nyaom biai online dalam taneh ia di mban tacei pato pakat negar haong dom tỉnh, ban ka bruk pacang caga jit COVID-19. Anak bruk jit ruak daok rah tabiak khang, kan kuhria mboh dahlau hu, meyah daok brei pa-atah di gauk, raidiuk bhap bini gaok kan kandah; doanh nghiệp padeih ngak, bruk pabak pandap njauk klaih klaoh… Thủ tướng Rajaei ieu dom pakat, dom gah, dom tỉnh, ban brei kham merat jang piah samar pasang iek hu jit ruak, ba raidiuk hu siam mekre veik yau dahlau. Dalam nan, njauk thau cambaih jalan pacang jit yau pacang khamang, mek xã, phường lac daning pacang, rahra lac urang lin, rahra gam lac pasak duh bruk, gam lac labik ngak, jayah jit ruak lac jayah di bol bhap rahra.

Harei 5/9 lac harei tong abih bhap bini ba uranaih nao bac, min kayua jit ruak COVID-19 dok rah tabiak srau kadau, rilo tỉnh, ban dalam negar peih thun bac bahrau tui jalan online. Dalam negar hu  32 tỉnh ban peih thun bac bahrau di sang bac, 25 tỉnh, ban peih thun bac bahrau  tui jalan online atau angaok rayo papar binguk. 6 tỉnh ban oh peih thun bac bahrau lac: Quảng Trị, ban raya Hồ Chí Minh, Quảng Bình, Cà Mau, Cần Thơ, Bạc Liêu. Dalam tuk negar drei dok ba abih pren yava tabiak pacang caga jit ruak COVID-19, gah pato megru brei thau bruk prong di thun bac  2021 - 2022 lac: Gam sami samar, peih dom jalan pacang cakak  jit prong  COVID-19, gam kham merat ngak kam pahu dom bruk di thun bac, patui jalan salih bahrau, kham merat ngak pasiam bruk pato megru.

Harei kabroi, kapul y bác sĩ di Học viện Quân y haong Sang iek ruak Nhi Trung ương (Hà Nội) tame tal ban raya Hồ Chí Minh, piah daong prein ka ban raya Hồ Chí Minh haong dom tỉnh jaik taphia dalam bruk pacang caga jit. Kapul bác sĩ gah Dut iek di Học viện Quân y hu brei bruk di Labik ka II Học viện Quân y di ban raya Hồ Chí Minh, ngak bruk dut iek COVID-19 ka urang ruak. Kapul y, bác sĩ haong điều dưỡng di sang iek ruak Nhi Trung ương, hu brei bruk daong ka Sang iek ruak Hồi sức 1.000 papan ndih iek ruak di Sang iek ruak Chợ Rẫy.

Ban raya HCM dok jak ba urang F0 abih ruak jeng dom urang halan hatain hu mbaok tame dong, abih di nyu nan lac dalam bruk jak ba, klah rabha ilamu song dom urang dok iek ruak di dom labik brei dok karei song sang iek ruak  COVID-19.Dom F0 abih ruak  cong khin jeng dom urang halan hatain piah rik dong ka bruk pacang caga jit  COVID-19 meda tut angan tapa phone ka: 0907.574.269 atau 028.39309967 (Phòng Tổ chức urang jakar , Sở Y tế ban raya  Hồ Chí Minh) dalam tuk vak meng harei  10/9 tal harei 31/12.

Nyaom biai akaok Mintri Y tế G20 rah tabiak dalam 2 harei lac harei 5 haong harei 6/9, pataom tame ginum biai dom kan kandah di COVID-19 ngan saong dom bruk cakrok khang kajap di danak dak ginum biai 2030 ka dom bruk yau bruk pacang caga jit praong di harei hadei, daong cakrok saong daong hu pandar samu gauk dom janih vắc xin ... Di nyaom biai, akaok Mintri Y tế Italia Rô-bét-tô Spê-ran-za (Roberto Speranza) harei kabroi tabiak panuac lac, taong abih menuac sia di dunya jeng hu quyền pandar vắc-xin pacang COVID-19. Panuac nan di ong hu ba tabiak dalam tuk rilo taneh ia daok cakrok gaok rilo kan kandah piah taduan hu  Vắc-xin pabak brei.

Dom urang ngak prong Taliban harei kabroi hu var taom gaok  kapul Liên hợp quốc di Kabul. Tui urang brei panuac di Taliban, Kapul urang  Liên hợp quốc hu panuac sinya patui bruk dong ngak pahla ka rahra Áp-ga-ni-xtan, saong hu panuac ieu dong jang ka  Áp-ga-ni-xtan dalam mbang tom gaok dom urang dong bruk pahla dunya anak tal.

Tổng thư ký Liên hợp quốc Antonio Guterres harei kabroi hu panuac tacei tabiak duas di bruk pajaleih karja di Ghi-nê, ieu peih palao Tổng thống Alpha Conde. Dalam sa đoạn băng ba tagok rayo papar binguk karja Ghi-nê, dom lin brok tagok di ban ine Cô-na-ky (Conakry) tabiak panuac lac brei klaak hukum negar, klaak abih rajaei dalam sa bruk pajaleih karja. Dalam panuac khan karei, dom lin brok tagok khan lac cap mek Tổng thống Ghi-nê An Pha-côn-đê (Alpha Conde)./.

Urang lang: M.P & H.Pha – 6/9/2021