Akaok  Quốc hội Vương Đình Huệ song Phaok akaok Quốc hội Nguyễn Đức Hải

Mesup  30/11, akaok  Quốc hội Vương Đình Huệ song  Phaok akaok Quốc hội Nguyễn Đức Hải pal akaok mbang ngak bruk song Thường trực Ủy ban Kinh tế hong nyaom chuyên gia, urang roh duah ka gah  sarak jien padai, jien ndua dong peih ngak danak dak pasiam veik song patagok  kinh tế - xã hội. Di var ngak bruk,  akaok  Quốc hội kakei lac: “dom jalan ngak katut panah  jeng brei daok dalam bruk suai lavik, gam song tani tanat kinh tế vĩ mô song patagok khang kajap oh lac batabiak dom sarak meda dong pasiam veik  kinh tế dalam katut panah, anak meta min ngak srau kadau bruk praong dalam atah dhua”.

Dah page ini, tỉnh Đắk Lắk peih bruk klauk vaccine caga COVID-19 ka anek saih Trung học phổ thông saong pato magru thường xuyên ngan haong labaih 64.000 adei. Tui kuhria, bruk klauk jru meda hu peih tabiak meng 3 tal 4 harei. Hadei di tuk ngak salah bruk klauk vaccine caga COVID-19 ka anek saih Trung học phổ thông saong pato magru thường xuyên, tỉnh Đắk Lắk brei peih bruk klauk ka labaih 128.000 anek saih pakat Trung học cơ sở. 

Ngan song angan: “Nao gam song tuai yam tapa kan kandah kayua jit ruak COVID-19”, Kapul Điện lực Việt Nam (EVN) brei thau, dalam bilan  12/2021 song bilan 1/2022 – EVN oh mek jien caik công tơ, ramik hacih sa-at bilai biến áp ka dom doanh nghiệp njauk kan kandah tapak kayua jit  COVID-19 dalam thun 2021, abih di nyu nan lac dom doanh nghiệp song labik sản xuất di dom labik brei dok karei  dalam tuk vak tapa. Jgam haong nan, dalam tuk vak ni dom  gah di EVN dok peih ngak rilo bruk  an sinh xã hội karei yau: jao brei máy tính bảng ka dom anek saih, sinh viên kan kathaot pabak ka bruk bac  online.

  Tal maong 4 dah page ini, bruk pui khuah praong dalam melam 29/11  di Công ty TNHH United Jumbo, labik ngak kong Suối Tre, Ban Long Khánh, tỉnh Đồng Nai  hu pacang padam. Tui panuac khan tuk camriep, maong 9 melam 29/11, bhap bini hu mboh di mblang Công ty TNHH United Jumbo pui khuah praong nan ye ba gauk tame  padam pui, gam tui di nan jeng hu khan brei gah padam pui thau. Công an tỉnh Đồng Nai saong Công an Ban Long Khánh hu ba labaih 20 radaih padam pui mai tal labik khuah. Bruk padam pui gaok rilo kan kandah kayua mblang khuah biak praong tal yaok ribau mét vuông, pandap panda dalam nan rilo meng lac pandap katak, tuk gaok pui khuah biak lkhang. Công an, bol bala hu mek xà beng jar rilo pambang tho piah pruh ia tame dalam. Mbang khuah oh hu urang halei njauk hagait, min mbang ralai abih sang xưởng praong labaih 5000 mét vuông gam haong rilo pandap panda, tui kuhria khat lahik yaok tỷ đồng.

Ong Hồ Văn Thảo, Akaok  UBND huyện Krông Pa, tỉnh Gia Lai brei thau tal mon  8 mesup harei  30-11, gah  chức năng dong hu ka 15 urang di  Bình Định tagok labik bãi cồn dok di krong Ba (dalam  xã Chư Gu và Chư Drăng, huyện Krông Pa) pala tamekai song  gar veik kayua ia sua tagok glong .  3 harei tapa di  huyện Krông Pa hu hajan khang. Tal bier harei  29-11, ia krong Ba nduac siam yau yaok harei, min, meng melam kabroi tal ni ia krong Ba nyu tagok glong, pacang cakak  labik  bãi cồn.

Gah Y tế dunya (WHO) brei thau lac bruk dom taneh ia kaya mada di dunya daok khik piah vaccine, dom mbang vaccine di dom taneh ia ini meda hu rilo jang dom rahra dalam taneh ia, dalam tuk oh ngak tui sanya klah rabha vaccine haong dom taneh ia daok patagok, nan lac jalan ngak oh ba mai kein lagaih. WHO hu panuac lac bruk ngak ini daok ngak brei kan kandah biak trak, yau ye bruk tamuh tabiak biến thể Omicron hu brei thau lac njom mbak glaong jang dom biến thể dahlau di nan. Langiu di nan, WHO jeng brei thau lac njauk roh duah dalam jang piah duah thau cambaih laih prein Omicron plaih hu prein pacang caga jit meng klauk vaccine saong hadei di tuk njom ruak. Gah WHO jeng ndom lac dom bruk cambaih laih jang meda hu khan brei thau dalam dom adit anak tal.

  Harei 30/11, dalam mbang ginum biai camereip tui jalan online, Akaok mintri jien  padai  Mỹ Janet Yellen song akaok mintri jien padai Japon Suzuki Junichi njauk gauk brei pambuak  bruk khang kajap piah pacang  biến thể Omicron urak ni dok ngak suh sah di dunya. 2 akaok mintri hu njauk gauk ka bruk Mỹ haong Japon pambuak gauk song kham merat piah langyah dom bruk dunya , dalam nan hu bruk samar parabha vaccine COVID-19 ka dom taneh ia dok patagok  tui sanya di dom negar dalam nyaom dom gah  kinh tế patagok song bahrau tagok dang akaok dunya  (ieu katut lac G20) mek hu jiak di ni. 

Hadei di jaik 2 thun laik tame kan kandah kayua jit praong Covid-19, gah pato magru dunya Australia taduan hu bruk daong siam lagaih meng rajaei. Tui sarak daong bahrau, 28 triệu AUD (samu 21 triệu USD) meda hu pabak ka dom sang bac tapa jalan lac trun  yaom jien bac tui adat, 9 triệu AUD (samu 6,5 triệu USD) hu daong ka dom kapul pabak dom tal bac sap Anh ka anek saih dom negar langiu. Rajaei Australia brei dui atah tukvak miễn trun dom paok jien pambuak tal pato magru tal puac thun 2022. Dom salih bahrau ini tui kuhria ba mai kein laba ka labaih 30.000 sinh viên đại học./.

Urang lang: H.Pha &Thu Thao – 30/11/2021