Sa-ai Mây Sum lac sa urang naih gheih dalam dom dom urang kumei Cam daok di P17, Quận Bình Thạnh, ban raya Ho Chi Minh. Oh lac tari tarieng ngak bruk, rami ramik siam bruk sang, sa-ai daok abih hatai ngak bruk daong puk paga. Kadha vak di SaPhi Giah, urang vak di Rayo sap ndem Viet Nam daok ngak bruk di ban raya Ho Chi Minh khan brei thau ka sa-ai Mây Sum nan, da-a mikva saong grauk ayut tui pang:

Sa-ai Mây Sum ndih tapui di thun 1958, sang daok di tổ 66, khu phố 4, phường 17, quận Bình Thạnh, ban raya Hồ Chí Minh. Langiu di bruk ngak kakau tangin takai, sik khan ao di sang, sa-ai daok ngak bruk daong palei. Tari tarieng, siam hatai, oh huac glaih glar, sa-ai hu pok ngak akok kapul urang kumei Cam dalam Kapul Urang kumei phường 17, quận Bình Thạnh, ban raya Hồ Chí Minh. Tuk taduan ngak akok kapul urang kumei Cam, tapa bac di dom ayut saong dom urang nao dahlau, sa-ai ba bruk ngak di kapul urang kumei Cam tagok tui rilo jalan, yaom lac oh birau min ba mai kein laba ka dom adei sa-ai kumei. Yau bruk sa-ai nao taom gaok dom kapul nyaom, yau ye Kadung jien CEP dhar di quận Bình Thạnh daong ka dom adei sa-ai kumei hu mesre jien ngak mbang. Oh padeih di nan, sa-ai daok jak ba, kakei dom adei sa-ai kumei Cam juai laik tame dom bruk kanjah jhak tệ nạn xã hội, sangka raong ba anek bik bac da-a, oh caik anek klak bac meteh dhi, abih di nyu nan lac, oh caik dom kamuan mein meuac khut rup tuk umo daok sit.

Ngak rilo bruk saong tuk halei jeng ngak siam bruk di drei, min tuk tangi, bruk halei sa-ai takre di abih, sa-ai lac bruk pathau khan jak ba pacang caga matuy ka mikva Cam di phường 17. Sa-ai Mây Sum khan lac: “Dahlak nao tal yaok baoh sang khan brei ka mikva thau ka bruk kanjiah jhak di matuy, juai caik ka anke taco njuk, klauk jru phien nyu meda ngak tayak tayaic baoh sang drei. Oh hu matuy khu pho meng hu salamat.”

Sa-ai bhian duah thau dom harak pathau khan, khaw tin yaok bilan di Ủy ban bhapbini, Công an phường bloh khan veik ka mikva Cam thau,  gam saong mikva kham ngak siam bruk bhap bini khik caga an ninh palei negar, pacang caga kol tội phạm, oh luai rah tabiak dom bruk oh siam di labik daok di drei. Sa-ai saong dom urang hội kham jak ba dom adei sa-ai kumei saong baoh sang ngak siam bruk jak ba “ 4 oh ngan saong matuy” kayua Kapul Urang kumei phường peih tabiak. Mbiah tal ini tổ 66, khu phố 4 oh hu mại dâm, matuy, likei dam tuk halei jeng gak siam bruk nao ngak lin…Sa-ai Đỗ Thị Kim Phụng, Akok Kapul urang kumei phường 17, quận Bình Thạnh brei thau: “Lac akok kapul urang kumei, sa-ai kham merat ngak rilo bruk pathau khan pacang caga HIV jeng yau danak dak 343…Dom sarak, jalan tacei ba di Đảng, Karja sa-ai hu thau cambaic saong khan veik brei ka mikva urang bangsa Cam dalam puk thau. Langiu di nan, sa-ai daok duah bruk ngak daong ka dom adei sa-ai kumei Cam duah jien tame.”

Meng dom bruk ngak hu ngak jeng di drei, yaok thun sa-ai Mây Sum hu Kapul urang kumei phường 17, quận Bình Thuận pok meyaom. Sa-ai jeng hu hadah mbaok meta lac sa dalam dom urang kumei Cam hu pok meyom lac “Urang kumei bangsa yau kareih camin” pakat ban raya. Sa-ai  njauk lac sa kareih camin hadah di phường./.