Akok negar Nguyễn Xuân Phúc daong bruk pacang caga jit di Hóc Môn, Củ Chi

Biar harei 29/7, Akok negar Nguyễn Xuân Phúc ba akok kapol ngak bruk nao pasang iek bruk pacang caga jit Covid-19 di huyen Hóc Môn saong huyện Củ Chi (TP.HCM). Akok negar hu panuac ieu dom pakat ủy, karja njauk samar thau ruak meng halei mai, samar duah urang taom gaok manuac ruak, brei ngak siam ngak njauk bruk pa-atah gauk. Dalam nan bruk kham merat di bhap bini lac biak praong. Akok  negar Nguyễn Xuân Phúc njauk hatai saong jalan tacei ba di Ban raya HCM lac brei patui veik bruk pa-atah gauk sa tukvak tra. Kayua lac meyah oh hu dom jalan pacang caga catang yau meng blaoh ye dom bruk khat lahik kayua jit ruak ba tal meda daok rilo jang.

Phó Thủ tướng Lê Văn Thành bahrau hu harak tacei pato brei ba mbuan lagaih ka bruk pajeng ba pandap panda dalam tuk jit  Covid-19. Tui nan, meng mon 12 melam  30/7 oh pasang iek di dom labik pasang iek jit ngan song radaih hu harak  nhận diện hu mã QR pajeng pandap panda pabak ka bruk padang ngak, sản xuất, pablei salih tame tabiak negar, pandap pandar di tong abih jalan nduac samar, jalan roya, jalan tỉnh, jalan huyện jalan nao mai dalam negar. Radaih halei oh hu harak nhận diện hu mã QR, atau hu min abih tuk vak ye pasang iek bruk pathau khan y tế song harak brei thau bruk dut iek Covid-19 di urang angaok radaih nan.

Mentri Y tế birau payua harak samar tal UB bhap bini Ban raya HCM ka bruk klauk jru vaccine Covid-19 dalam tuvak pa-atah gauk tui Sarak 16 di Thủ tướng Rajaei. Tui nan, Mentri njauk hatai piah Ban raya HCM ramik tukvak tui iek hadei tuk klauk jru piah hu siam mekre, brei hu sa labik klauk jru tani tanat atau ba nao klauk jru di labik pacang caga.  Mentri Y tế  caong khin Akok UB bhap bini Ban raya tacei pato dom gah pambuak tal peih bruk klauk jru ka taong abih  dom urang umo meng 18 thun tagok; brei klauk jru  ka dom urang y te pacang caga jit, urang umo taha, dom urang hu ruak lavik dalam rup saong pasamar bruk urang hu klauk jru caga ruak.

UBND tỉnh Bình Phước hu ba tame pandar sang iek ruak dã chiến ban  Đồng Xoài iek ruak ka urang ruak Covid-19 di Nhà thi đấu đa năng di pasak ilamu –Thể thao ban  Đồng Xoài. Dalam nan hu 180 kapan ndih, hu  20 kapan ka urang ruak  trak, 9 kapan ka urang ruak hu pasiam veik, dok veik iek ruak ka urang ruak hajual. Sang iek ruak ba tame pandar  piah patrun bruk tapa prein di dom sang iek ruak hu brei bruk taduan iek ruak ka urang ruak  Covid-19. 

Jit Covid -19 daok rah tabiak khang, ngak kan kandah tal raidiuk, bruk ngak mbang ngak huak di bhap bini, abih di nyu lac dom sang kan kathaot, sang jaik si kan kathaot. Anak bruk yau nan, ban Phan Thiết, tỉnh Bình Thuận hu daong ka dom baoh sang kathaot, sang jaik kathaot dalam ban. Hu thau, hu 418 baoh sang kathaot saong 753 baoh sang jaik kathaot hu daong yaok sang 1 triệu đồng jien mbaok. Abih tih yaom jien daong di mbang ini, lac 1 tỷ 171 triệu đồng, hu kaoh tabiak meng kadung jien “brei ka urang kathaot” di ban Phan Thiết.

Menuac sia di ban ine Oa-sinh-tơn, Mỹ bahrau hu ieu cuk pataih pacang mbaok tuk daok dalam sang oh kuhria lac menuac hu klauk bloh atau oh ka klauk vaccine. Urak ini, menuac njom Covid-19 bahrau daok tagok khang yaok harei di negar Mỹ. Tổng thống Joe Biden brei thau, rajaei brei bayar veik jien ka po pandar urang ngak dalam tukvak menuac ngak njauk padeih piah nao klauk jru caga ruak. Dom menuac ngak di Rajaei oh ka klauk jru njauk cuk pataih pacang mbaok, daok atah di gauk saong dut iek Covid-19 yaok adit 2 mbang. Dom jalan ngak ini, lac kham merat bahrau abih di karja Mỹ piah jhul patagok bruk bhap bini nao klauk jru tuk biến thể Delta daok njaom mbak khang di taneh ia ini.

Rajaei Anh daok kuhria buh tame 338 triệu bảng Anh (472 triệu đô la) piah padang dom jalan bahrau brei ka radaih juak saong pachreih patagok bruk nao takai. Tui Mintri Pajeng ba, yaok triệu urang Anh mboh lac dalam thun blaoh nao radaih juak saong nao takai lac biak siam piah khik prein yava saong patrun bruk gar jalan, patakik nerak tachauk. Kayua yau nan ye, rajaei Anh brei khik bruk nan tapa bruk ngak brei bruk nao mai meng radaih juak haong nao takai hu mbuan lagaih jang, siam mekre jang.

Sa jalan pasei bahrau, pajeng pandap nao mai meng Trung Quốc tal Châu Âu bahrau hu peih tabiak. Tui nan, sruh radaih pajeng bak pandap lac pandap mbang huak yaok harei, jamriak, pandap panda, hu tabiak meng tỉnh Sơn Tây, gah barak Trung Quốc nao tal ban Mersin, gah meraong Thổ Nhĩ Kỳ. Jalan pasei bahrau nan, patagok abih tih jalan radaih pajeng pandap meng Trung Quốc tal châu Âu tagok 10, pambuak labaih 30 ban meng 11 taneh ia di Trung Á haong châu Âu./. 

Urang lang: A.Nghiem & H.Pha - 30/7/2021