Pathau mikva saong grauk ayut!

Mong mbaok mboh kandi kandang gam saong sap ndem meyai lai la-ar min sa-ai Hán Văn Luận, Akok mban khik iek palei Mỹ Nghiệp, ban sit Phước Dân, huyện Ninh Phước, tỉnh Ninh Thuận, ndih tapui thun 1976, lac urang biak sami samar, abih hatai ka bruk ngak. Oh lac sa urang đảng hadah krah, bo sa-ai daok lac sa urang ngak mbang naih joi di tỉnh Ninh Thuận, pô sa cơ sở menyim khan bai Cam, daong ka rilo urang dalam palei hu bruk ngak tani tanat, rik daong padang ngak palei pala birau. Kadha vak di Aí Nghiêm, urang vak di Rayo sap ndem Việt Nam khan ka sa-ai Hán Văn Luận nan, da-a mikva saong grauk ayut tui pang:

Ndih tapui tabiak dalam sa baoh sang hu dom rai kak kajap saong bruk menyim khan bai Cam Mỹ Nghiệp, sa-ai Hán Văn Luận hu muk, hu amaik saong sa-ai kumei di drei patoa veik meng tuk daok sit. Meng hatai takre saong akok sahaneng hadah krah, sa-ai Luận menyim hu dom blah khan bai Cam hu bingula biak mekre oh alah hagait khan bai di amaik atau sa-ai kumei di sa-ai menyim. Oh padeih di bruk ngak tui ilamu meng kan, sa-ai daok duah bac dom janih bingula birau piah ba tame menyim khan bai di drei tui hatai takre urang blei.

Anak bruk dak harei dak meriak gauk khang di darak pasar, piah patagok jien mek tame, sa-ai Luận suh sah sahaneng duah darak pasar piah pablei, bac megru ilamu, patagok bruk ngak mbang pablei salih. Darak pasar bhian blei khan bai di sa-ai nan  lac dom tỉnh yau Đà Nẵng, Khánh Hòa, dom tỉnh Tây Nguyên, ban raya Hồ Chí Minh, Tây Ninh…Labaih 10 thun peih praong bruk ngak mbang pablei salih, hu tuk trun tuk tagok oh thau hadom kan kandah, min meng thau kham merat yam tagok, sa-ai Luận khik hu khang kajap bruk ngak mbang pablei salih di drei. Hu labaih phun jien dalam tangin, sa-ai tame ban raya Ho Chi Minh blei mac menyim mai ngak iek saong ngak hu khan bai praong, atah jaik 100 mét.

Urak ini, sa-ai padang hu labik menyim praong siam, blei hu 8 baoh mac menyim, menyim hu rilo jang 6,7 mbang dut saong kik menyim klak, yaok thun sa-ai laba labaih 100 triệu đồng. Sa-ai Luận oh lac ngak kaya meda ka sang drei bo daok ba bruk ngak ka 12 dam dara dalam palei hu jien mek tame tani tanat yaok bilan meng 1,8 triệu đồng tagok. Sa-ai Thọ Thành Xuân Trân lac sa dalam dom dam dara Cam daok ngak bruk di labik menyim khan bai di sa-ai Luận bui sambai lac:

Mbang sap Cam

Meng prein khang di umo daok ranaih, akaok sahneng hadah krah saong hatai khang di urang đảng, sa-ai ngak hu rilo bruk daong ka mikva Cam labik ini hu bruk ngak mbang, hu jien mek tame tani tanat, rik daong ka bruk padang ngak palei pala birau. Thun 2013, sa-ai Hán Văn Luận hu mikva Cam Mỹ Nghiệp  pok ngak Akok mban khin iek khu phố. Khu phố Mỹ Nghiệp hu 345 baoh sang gam saong 1.920 urang. Lac akok mban khik iek palei, sa-ai Luận sahaneng duah jalan ngak, duah thau hatai sahaneng di dom urang taha palei, urang hu angan je, urang đảng, ngak siam bruk hu jao brei, meng nan daong ka mikva dalam palei ngak siam dom bruk pakacah gauk ngak mbang, dak padang raidiuk ilamu. Urak ini, sang kan kathaot di palei Mỹ Nghiệp trun daok 19 baoh. Langiu di nan, sa-ai daok peih rilo tal pato pasram paglaong ilamu menyim, daong ka dam dara thau pandar mac menyim, meng nan dak harei dak ngak hu rilo blah khan bai gheih mekre jang. Bruk njauk biai nan lac, sa-ai biak siam hatai, ngak siam bruk jak ba mikva rik jien padai tame ngak pahala yau, daong ka dom urang kan kandah, daong padang ngak sang ilamu palei, jalan betong… yaok thun labaih 10 triệu đồng. Sa-ai Hán Văn Luận khan lac:

Mbang sap Cam

Mikva Cam dalam palei thau tal sa-ai Hán Văn Luận lac urang ngak mbang naih joi bo daok iek praong sa-ai kayua sa-ai lac sa urang đảng hadah krah, ghieh jak ba mikva dalam palei ngak tui dom sarak di Đảng saong Karja, jum pataom gauk, daong ba gauk dalam bruk ngak mbang, hu mbaok tame bruk puk paga, bruk ngak pahala./.