Thun 1998 tuk umo bahrau 18 thun, sa-ai Nguyễn Đình Phong haong adei sa-ai dalam sang hu pala iek phun mận hậu. Meng 100 got tuk camereip, bloh tagok 200 got, tal urak ini sang sa-ai hu labaih 500 got mận. Meng hu taneh mbon ceik praong, lingik la-an bingi, phun mận di sang sa-ai tamuh siamc. Gam saong jalan pala, jalan iek glang meng kan mai lac ruah phun siam di abih bloh pagam veik lại tạo giống, buh khak định kỳ,hadei di 5 thun phun tabiak baoh saong paik pablei hu. Hadei nan, hu daong meng dự án cắt tỉa, ngak jeng dhar ka phun meda siam, bein mận di sang sa-ai dak harei dak hu chất lượng siam jang. Meng sản lượng 30 tấn mận yaok thun, sang sa-ai duah hu meng 300 tal 350 triệu đồng.

         Mboh phun mận paik baoh sa thun sa mbang, dalam tuk taneh mbon daok labaih rilo, 5 thun dahlau, sa-ai  Nguyễn Đình Phong ginum gauk dalam sang nao mesraiy jien di Quỹ tín dụng thị trấn nông trường Mộc Châu piah buh tame pala phun cam canh pajaih Hưng Yên. Pala iek mboh janih cam ini lagaih haong taneh riya, lingik tasik dalam bhum,  sang sa-ai pala rilo jang, tal harei ini hu 1.000 phun cam canh. Bilan cam akaok meti di puac thun bloh, sang sa-ai paik hu 4 tấn cam canh, yaom jaik 100 triệu đồng. Jien mek tame meng pala mận, cam, pambuak haong pala tangei, raongg glang, sang sa-ai Phong jeng sang kaya meda dalam bhum. Sa-ai Phong brei thau:“Phun mận sa thun tabiak baoh sa mbang min. Mboh phun cam paik baoh di puac thun, nyu jeng lagaih haong taneh riya di tiểu khu bản Ôn. Nan ye sang ba mai pala lingiu di taneh pala mận. Dalam tuk pala jeng bac megru meng dom bhum cam karei yau Cao Phong, Hưng Yên”.

          Rilo sang di tiểu khu bản Ôn mboh sa-ai Phong pala mận, pala cam hu kein laba jeng bac megru, ngak tui saong tabiak truh kan kathaot. Yau sang sa-ai Nguyễn Thị Nhung pala 1 hecta mận, cam, bloh daok blei kaya nong, yaok thun hu jien mek tame jaik 300 triệu đồng. Sa-ai Nhung brei thau: Oh lac daong phun pajaih, sa-ai Nguyễn Đình Phong daok hu tacei pato mikva ilamu pala, iek glang phun pala meng ilamu di drei:“Sa-ai Nguyễn Đình Phong lac urang abih hatai ka bruk ngak, ba akaok nao dahlau dalam cakrok patagok kinh tế. Sa-ai biak jaik haong mikva, tacei pato mikva ngak tui biak hu kein laba”.

          Nao dalau dalam bruk patruh eik patrun kathaot, patagok kinh tế, abih hatai ka bruk puk palei, urak ini sa-ai Nguyễn Đình Phong hu mikva dalam bhum anit ranam pok ngak Tiểu khu trưởng tiểu khu bản Ôn./.