Labik ong Lê Văn Quyết daok lac sa dalan 2 xã dauk dalam abih di huyện dalam mbang ribuk ia sua meng blaoh. Jeng daok jan van haong bruk pasiam veik dom khut khat hadei di ia sua, ong Quyết ndom lac:“Mbang ribuk aia sua ini biak khang, ia sua tagok biak glaong, daok hu riyak paoh khang mbuan ba tal metai lahik”.

Thun halei xã An Thủy jeng njauk ribuk aia sua nan ye bhap bani padang ngak sang klau bilik min hu pabak dom mbaik kayau dak caik jaik tabung sang piah plaih aia sua. Luac melam 18.10, phon tangin di ong Quyết “hu oh thau hadom mbang iew di grauk labik ieu mai. Ong pachreih ba manuac sia khik bình tĩnh saong cih vak gilac abih, 5 tuk page harei hadei, ong haong kapul urang daong duah hu công an xã, Bí thư xã đoàn nao ghe tal dom labik hu bhap bani khan brei thau. Ong Quyết khan veik: “tayah tayac abih, 4 gah lac aia, kayua palei daok rah tui mblang hamu nan ye aia dauk mong yau tasik, riyak aia sua jeng taong yau riyak tasik. Rilo labik riyak khang ghe oh nao tame hu, ca nô prong nao ye gar talei cáp, talei điện kan kandah ginup janih”.

Tram rup dalam aia sua, tuk mboh ong yau yuh la-ar, urang y tế mek jru brei menyum, kuah angin ka ong. Hadei di nan, ong chat tagok ghe caluai dalam aia sua piah ba bhap bani nao tal labik siam mekre. Tui panuac khan di ong Quyết, xã hu brei 2 sruh ghe min sa sruh khut blaoh, sruh daok veik jeng talah nan ye tuk kapul urang nao daong njauk hu urang daok angaok ghe brei khik kajap labik nan. Kan kandah dalam tuk nao nan lac riyak biak khang. oh caik hatai hagait tal bruk mbuan metai lahik dalam ia sua khang, kapul daong hu ba jaik 80 baoh sang mai tal labik ngak bruk di ủy ban piah plaih aia sua. Ong Quyết khan veik: “Sang sa-ai L.V.C hu padang ngak sang plaih ribuk aia sua, hu tal 2 min sit, daok gah likuk riyak paoh. Harei akaok mereip, khaol dahlak nao tame min oh tame hu, harei hadei ye urang jakar thôn Phú Thọ ba dom urang thau caluai nao tame dahlau piah trun maneng menuac daok angaok tol. 4 urang puac abih daok veik oh njauk aia sua min dom urang ini hauc riyak taong jaleih nan ye preo iew daong. Harei hadei khaol dahlak ba hu abih 4 urang tabiak langiu”.

Hu thau, aia dauk sang ong Quyết tal 2 - 3m min daok tal 2 di baoh sang nan ye ong iew 33 urang daok jaik taphia nan mai daok plaih ia sua, hadiuk di ong daok veik sang ngak mbang ngak huak brei ka urang, daok ong nao daong ka dom baoh sang daok di labik biar jang. Ong khan lac: “Sang dahlak hu amaik taha 86 thun, dom urang mai daok plaih aia sua hu daong ba tu la-ar tagok angaok tal glaong, daok gaok glah, kik kapal ye dauk abih dalam aia. Dahlak jeng duh hatai min bruk metai lahik di anek manuac lac prong di abih, pataom tame daong bhap bani ka”. Luac meng harei 18.10 tal puac mbang ribuk, ong Quyết tok mai sang hu sa melam tuk aia trun saong hadei di nan nao daong dom kapul nyaom daong ka bhap bani hadei di aia sua. Ong Đặng Đại Tình, Akaok UBND huyện Lệ Thủy brei thau, ong Quyết lac akaok UBND xã bahrau hu pok ngak dalam nhiệm kỳ ini min biak tari tareng abih hatai haong bruk ngak, ong Quyết jeng lac urang hu năng lực saong trách nhiệm tuk halei jeng ba tagok caik akaok.

Thaot binguk Chủ tịch xã An Thủy Lê Văn Quyết caluai dalam aia sua daong ka bhap bani jeng lac thaot binguk siam gheih ka bruk daong urang njauk bala daok ngak ka manuac sia pok meyaom dalam tukvak tapa./.

Urang lang: JASI