Urak ini, jalan nao tame bon Đắk R’Moan (xã Đắk R’Moan, bal sit Gia Nghĩa) hu siam jang. Taphia jalan, sang bac mầm non, saong sang ilamo bahrau hu padang ngak, hu jeng kadha praong di bon. Ini lac công trình hu bal sit Gia Nghĩa buh jien padang ngak angaok mblang taneh 4.000 m2 kayua sa-ai Điểu Tam alin brei.

Baoh sang sit di diuk pasang Điểu Tam daok gam haong 6 urang anek daok di kreh bon Đắk R’Moan. Sa-ai Điểu Tam brei thau, dom thun dahlau diah, dom pluh uranaih di bon njauk bac dalam sa baoh sang taik tahak, harei pandiak ye pa-uh, harei hajan ye pasah, cơ sở vật chất kan kandah, ralo sang njauk ba anek nao bac atah bon jaik 10km, bruk pajeng ba biak glaih glar abih di nyu lac dalam bilan hajan.

Điểu Tam khan lac, sang sa-ai daok hu dua urang anek daok nao bac, nan ye bruk alin brei taneh ngak sang bac ini oh lac tok daong ka anek kamuan dalam bon bo dom urang anek di drei jeng hu mbuan laghaih nao bac. Kadha bui sambai hu pambak prong tuk padang ngak blaoh sang bac, dom adei sit hu sang bac siam mekre. "Dahlau diah diuk pasang drei oh hu nao bac, anek ye hu urang nao bac, hu urang daok sang kayua sang bac atah ralo. Urak ini anit anek kamuan njauk nao bac jalan atah, nan ye tuk palei mai jak ba brei taneh piah ngak sang bac, diuk pasang drei brei chip”

Mblang taneh daok di jalan praong nao tapa bon, dahlau daih hu adei sa-ai dalam baoh sang Điểu Tam khai phá. Dahlau diah sang sa-ai pala pa-aok bleit, yaok thun jeng hu jien mek tame ralo, min oh njauk lac yau nan bo urang likei ini mboh damen tuk alin brei. Hadei di tuk alin brei taneh padang ngak sang bac mầm non, diuk pasang Điểu Tam daok brei sa mblang taneh taphia nan piah padang ngak sang truyền thống. Akaok thun ini, baoh sang atah meng kan di bhap bani urang M’Nông bon Đắk R’Moan hu ba tame pandar. Ngan haong bhap bani, labik ini lac labik taom gaok, jum pataom bhap bani saong daok lac  labik khik dom inem mek meng kan di bangsa drei piah pato pakai veik ka rai rah harei hadei. Taha Điểu Nham, akaok bon Đăk R’Moan bui sambai lac: “Bruk sang Điểu Tam alin brei taneh nan lac ba kein laba mai ka thôn, bon, xã hội cakrok patagok. Anak meta ye thiệt thòi, min meda hu kein ka mikva, anek taco di drei hadei ini biak ralo. Meng tuk hu sang cộng đồng, mikva hu pataom gauk daoh tamia ralo jang, hu khan brei gauk thau jalan ngak mbang, brei thau hatai caong khin di drei piah meng nan thôn hu jalan ngak piah daong ka mikva yam tapa kan kandah”.

Meng 4000m2 taneh hu sang Điểu Tam alin brei piah padang ngak dom công trình phúc lợi, gilang pariak Thương mại cổ phần công thương Viettinbank dhar Đăk Nông hu daong 1 tỷ đồng piah padang ngak sang bac mầm non Hoa Hướng Dương hu 4 duk bac, urak ini hu jaik 40 adei anek saih lac urang bangsa takik di bon daok bac. Sang cộng đồng bon Đăk R’Moan hu Jabat ilamo bal sit Gia Nghĩa ngak po đầu tư ngan haong phun jien jaik 200 triệu đồng, daong ka mikva dalam palei hu labik sinh hoạt saong khik piah dom kaya pandap kak kajap haong bruk dak padang saong cakrok patagok di bon Đăk R’Moan dalam rai diuk di urang M’nông./.