Labik hẻm 136, khu phố 3, phường 3, quận Bình Thạnh dahlau daih lac sa “labik juk” ka ma túy, ralo baoh sang daok di labik ini hu gauk gar njil ma túy. Mai meng bruk di sang drei lac anek likei di amuk chung metai kayua ma túy, amuk biak thau saong caong khin oh daok hu baoh sang halei karei njauk pandik harao yau baoh sang drei. Kayua yau nan ye, meng thun 2012, amuk hu mbaok tame kapul khik caga dân phố, rik daong khik caga sron mbon di puk palei.

Hu mbaok tame bruk khik caga dân phố, amuk ralo mbang mboh urang nyil ma túy saong samar khan brei gah chức năng thau piah hu jalan khik iek chip. Hu oh takik mbang amuk Chung njauk urang nyil ma túy atau dom urang pablei heroin khin taong. Min meng bruk daong saong khik caga di gah chức năng saong bhap bini puk palei, amuk yau hu pabak pren khang dalam bruk ngak yau Yuan lac “vác tù và hàng tổng” di drei. 

Piah ngak brei lahik abih tệ nạn ma túy, akaok thun 2015, amuk Chung hu padang klup kapul “Hala pacang”, saong hatai saneng lac ngak yau habar piah yaok urang dalam yaok baoh sang lac sa hala pacang khik caga gauk gar anak bruk dui pachreih di ma túy. Klup kapul hu 50 urang hu mbaok tame lac dom urang hu gauk gar atau rup eng bhian gam tal ma túy. Lac urang dang akaok klup kapul, amuk Chung gam saong urang jakar di puk palei bhian khan brei thau adat hukum ka dom urang di baoh sang hu gauk gar nyil ma túy, taphia di nan jak ba dom baoh sang ini ba urang njil nao cai nghiện ma túy. Taphia di nan, amuk Chung bhian daong meng vật chất tal tinh thần ka dom baoh sang ini.

Amuk Chung khan lac, dahlau daih dalam klup kapul hu saai Đ. njom HIV saong metian, saai njauk amaik ame pateok tabiak lingiu sang. Thau hu bruk nan, amuk Chung hu nyim dom urang jakar di phường nao jak ba baoh sang saai Đ saong ba saai Đ mai sang drei iek glang. Amuk daok ba Đ nao menyum jru ARV piah oh pambak ruak ka anek kamar. Amuk Chung brei thau, tukvak daok di sang amuk, saai Đ huac pambak ruak ka dom urang dalam sang amuk nan ye oh khin mbang panyil jam hong gauk. Mboh yau nan, amuk Chung brei peih sinh hoạt klup kapul, pathau khan lac HIV/AIDS oh njom tapa jalan mbang menyum, nan ye kol drei jui kỳ thị urang njom HIV. Hadei di ini, hu pachreih ba, baoh sang saai Đ mai rok saai mai sang veik; urak ini anek kamei saai Đ hu nao bac tiểu học saong biak patuah jamo, adei oh njom HIV. Langiu saai Đ, urak ini amuk Chung daok raong sa urang likei dam njom HIV/AIDS kayua sang biak kan kandah.

Dom bruk ngak di amuk Chung hu rik daong ba phường 3 meng labik lac sa “labik juk” ka ma túy, urak ini oh daok tệ nạn ma túy. Tapa klup kapul, ralo urang hadei di tuk cai nghiện ma túy bloh mai veik sang hu amuk Chung daong hòa nhập cộng đồng, duah brei bruk ngak lagaih. Saai Hữu lac sa urang yau nan. Lac sa likei dam nyil ma túy ralo thun, saai Hữu hu amuk Chung jak ba nao cai nghiện. Khang hatai padang veik rai diuk, hadei di tuk cai nghiện bloh, saai mai veik sang min oh hu bruk ngak, urang mboh sa-ai ye mbaiy mbaok nao gah karei. Amuk Chung daong phun jien piah saai peih sa tiệm sit pasiam radaih jaik sang iek ruak Bình Thạnh. Saai Hữu druc drui khan lac: meng hu amaik Chung dahlak duah hu veik raidiuk.

Ndom ka dom bruk ngak di drei, amuk Chung lac: “Yaok urang lac sa hala pacang. Drei pacang siam ye tệ nạn oh tame hu dalam sang”./.