Ong Nguyễn Chính Ninh daok di palei 11, xã Ea Ninh, huyện Cư Kuin, tỉnh Đak Lăk hu jaik 1 hecta phun amriak kalu daok paik mek asar thun ka 4. Thun amriak kalu 2016 -2017 ini, sang ong Ninh paik hu 6 tấn asar. Yaom lac amriak kalu hu paik blaoh, pambu thu bloh min ong Ninh jeng daok suh sah hatai, pablei atau oh. Kayua pablei ye lap oh hu laba, meyah oh pablei ye jien halei cai pandar, bayar jien apah manuac ngak, jien khak, jien buh tame pala amriak kalu thun anak mai. Ong Nguyen Chính Ninh lac:

“Yaom kaom trun urak ini sang dahlak oh khin pablei daok cang yaom tagok pablei, yaom trun ye  kan ka jien buh tame yau nan ye sang dahlak daok cang iek yaom kaom darak pasar tagok atau oh”

Jeng yau ong Ninh, ong Đào Xuân Phương daok di palei 10, xã Ea Ninh, huyện Cư Kuin, tỉnh Dak Lak jeng daok duh hatai kayua yaom amriak kalu lap. Sang ong hu 8 sảo amriak kalu, paik asar hu 4 tấn yaok thun. Dom thun dahlau, tuk paik blaoh, pambu thu urang mai tal sang blei. Thun ini amraik kalu laik yaom yau nan ye sang ong Phương daok khik veik amriak kalu dalam sang, cang yaom tagok. Ong Phuong haduh hatai ka bruk khik amriak kalu dalam sang lavik harei meda ngak ka mariak kalu tamuh bimao, thu lihik kilo, asar amriak kalu jeng oh siam.

“Yaom trun biar rilo bo urak ini pablei ye oh hu laba yau nan ye khin caik veik cang yaom tagok. Drei khik veik amriak kalu yau ini asar nyu khut oh siam, tamuh bimao saong thu lihik kilo. Cang  yaom tagok 100 atau labaih 100 ribau đồng drei pablei, meyah oh pablei ye hu jien halei ngak veik jeng kan.”

Yaom amriak kalu tagok gam gam dalam rilo thun dahlau, gaok tuk tagok tal 230 ribau đồng sa kilo, kein laba galong tal 3 mbang, 4 mbang duk saong pala caphe, pa-ok blait…ba tal bruk dom urang ngak nong pala amriak kalu di Dak Lak jeng yau dom tỉnh Tay Nguyen oh caik hatai tal panuac kakei di karja palei saong di dom gah kakei, ba gauk peih praong taneh pala anriak kalu langiu quy hoach, nan ye amriak kalu hu baik rilo, pablei oh abih, ini jeng lac sa dalam dom makna  ngak ka amriak kalu trun yaom. Ong Huỳnh Quốc Thích, Phó Akok Sở Ngak nong saong patagok palei pala tỉnh Dak Lak lac:

“Njauk lac bruk pala sit sot di mikva bo bhian di nyu lac pala nduac tui yaom kaom darak pasar ba tal kan kandah biak rilo. Yaom lac, gah ngak nong hu quy hoach min bruk taong phat bruk pala tui hatai oh ngak hu kayua yaok urang nong sahaneng lac taneh di drei, drei khin pala hagiat hu laba ye dre ipala  mboh kein laba galong yau nan ye mikva  pala rilo.”

Urak ini Đak Lak hu 28.000 hecta taneh pala amriak kalu, jaik dua mbang duk saong bruk quy hoach tal thun 2020. Amriak kalu trun yaom, dom urang birau mesre phun jien buh tame pala dom thun jaik ini urak ini daok having akaok./.