Dom harei tapa, nao tal dom xã gah angaok di tỉnh An Giang ye Nhơn Hội, Phú Hội, Vĩnh Hội Đông,... pak halei jeng gaok mikva yuak padai nduac di ia ndik; rilo libik mikva njauk tram drei tame ia gluh piah kaoh mek dom padai tasak daok laik sambo màu jhuk, mbau bruk. Ông Võ Văn Gin, daok di ấp Phú Trung, xã Nhơn Hội khan lac:“Thun ini ia mai aval jang duk saong dom thun dahlau jaik 20 harei, yau nan ye ngak padai oh ka sumu, yuak daok hijao, yuak dahlau oh hu yau nan ye meng padeih veik cang tal tuk ia trun, min oh trun bo nyu daok tagok dauk abih. Iek tui dom thun lac ngak hu mbang, thun ini oh sahneng lac nyu yau ini. Ia tagok harei labaih sa tấc, dua tấc sraiy tapa ar, dom saai lin tame daong, pluh dom urang tame srong hu hadom lac sraong, daok veik ngak oh hu lac klaak.”

Tuk hu tanyi sua ka bruk hu halei oh panuac brei thau dahlau di karja puk palei, dom sang bhapbini jeng taduan mek hu panuac kakei di gah chức năng, min dom sang bhapbini jeng trun pajaih pala drak. Jeng oh karei hagait ông Gin, Ông Đỗ Văn Lũy, daok di ấp Bắc Đai, xã Nhơn Hội, huyện An Phú brei thau, bilan hè thu ini sang ông drak 3,5 ha, tui kuhria yuak hu jaik 24 tấn. Min, thun ini kayua hajan hamiet gam saong ia mai aval, yau nan ye sang ông tok yuak hu 3 tấn, daok veik lac lihik abih mbon, khat lihik jaik 30 triệu đồng.“Taneh ini meng jaik labaih 10 thun ini mai ngak hu abih, thun ini ia glaong ndik tagok ar yau nan ye oh samu caga hu hagait. Dom adei saai yuak dahlau hu dua klau harei ye pablei hu, daok 3-5 harei hadei lac yuak brei ka menuk, ada mbang oh pablei hu’

Tui Sở ngak nong saong patagok palei pala tỉnh An Giang, labaih 7 rabau 5 ratuh hecta padai daok jaik si yuak saong njam patam di mikva dalam tỉnh daok gaok kan kandah. Min, urak ini bruk daok duh hatai di abih lac 14 rabau hecta padai saong njam patam libik lingiu ar pacang, yaom lac hu panuac kakei di gah ngak nong saong karja puk palei, min dom sang bhapbini jeng trun pajaih pala drak bilan ini, oh pang tui panuac kakei di gah chức năng lac jhui ngak.

Ông Trần Anh Thư, GĐ Sở ngak nong saong patagok palei pala brei thau, urak ini An Giang barau yuak hu labaih 20 rabau ha padai Hè Thu, hu 8,8% taneh hu trun pajaih. Anak bruk hajan ribuk, ia gah angaok kraong tagok samar yau urak ini, gah ngak nong meda pambuak bruk saong dom huyện, ban sit patagok bruk pathau khan ka mikva urang nong bhian tui maong tanut ia, samal yuak di dom taneh padai tasak bloh ngan saong kadha “ hijao sang siam jang taha hamu” yau Yuan lac “ “xanh nhà hơn già đồng” piah trun takik khat lihik. Bhian tui iek catang bruk ia ndik, ia xua piah drah samal brei thau, hu jalan caga siam, khik kajap bruk pala drak saong bruk mbang huak daok dang di urang bhapbini hu siam dalam bilan hajan ia xua. Ông Trần Anh Thư daok brei thau lac:“Suai livik drei rami ramik veik bilan pala, oh ngak tui jalan ngak ini tra; drei tok ngak sa vụ padai đông xuân min, daok veik drei salih tapa phun njam patam hu yaom glaong, maong tui taneh riya piah patabiak bruk ngak mbang…yau nan lac oh gaok kan kandah. Daok gah hạ tầng, hệ thống thủy lợi...piah plaih bruk thun halei ia ndik mai aval, ia ndik praong lac nao daong, nao pasang iek…nyu siam lagaih jang lac brei hu dom ar pacang ia ndik akaok vụ rah tui jalan biên giới, libik halei pambuak pagam hu haong jalan khik iek biên giới lac pasir libik nan.

Piah caga dom mbang ia tagok kayua triều cường saong kayua lingik tasik oh lagaih ngak kan kandah tal pala drak saong ngak mbang daok dang di urang bhapbini, Tỉnh ủy saong uy mban bhapbini tỉnh An Giang hu nao duah thau bruk di dom puk palei. Hadei di tuk nao iek, amuk Võ Thị Ánh Xuân, Bí thư tỉnh ủy An Giang pandar, yaom lac mikva urang nong oh ngak tui bruk kakei di gah ngak nong, min kayua raidiuk di urang bhapbini; dom gah chuyên môn njauk roh duah, pasang iek saong hu số liệu tổng hợp, ba tagok dom kapat hu thẩm quyền pasang iek daong ka mikva tui adat hukum. Amuk Võ Thị Ánh Xuân tacei pato:“dahlak tacei gah ngak nong saong karja puk palei njauk ngak khang jang saong bhapbini dalam bruk pala drak lingik libik ar pacang saong libik pala drak oh lagaih piah ngak habal drei caga hu ia xua siam jang. Bruk di karja, hệ thống chính trị dom pakat, dom gah pakat tỉnh... kol drei njauk hu trach nhiem saong gauk min iek tui pren bhapbini, pren bhapbini lac praong jhui caik ka bhapbini pagam pambak tame karja bo urang bhapbini njauk eng drei kham merat pala drak, kham merat sahaneng kuhria ka raidiuk saong eng drei khik caga drei, karja tok tacei jalan ngak saong daong min, kol drei njauk pamaong tal bruk nan, oh caik ka urang hu akaok sahaneng pagam pambak tame karja.

Anak bruk ia gah angaok di kraong Mê Kong daok tuh mai glaong ngan saong  bruk lingik tasik rah tabiak oh lagaih, ngak kan kandah ka pala drak ngak nong saong raidiuk di urang bhapbini, lingiu jalan ngak di karja puk palei, njauk hu bruk sahneng mboh di urang bhapbini dalam bruk caga bala di lingik tasik./.