Huyện Tri Tôn urak ini hu labaih 40 rabau ha taneh ngak nong, dalam nan hu 2 rabau ha yaok thun tok ngak hu sa vụ, kayua dom taneh ini daok jaik ceik oh bơm ia pruh hu. Urak ini, kayua pandiak bhang dui atah yau nan ye di dom kraong ribaong nyu biar, ngak ka jaik 1 rabau ha padai hè thu daok gaok kan kandah ka ia pruh. Ông Mai Thanh Tuấn, Phó trưởng phòng ngak nong saong patagok palei pala huyện Tri Tôn brei thau: "Thun ini, ia biar jang thun dahlau meng 2 tal 3 tấc. Urak ini hu dom libik taneh, urang nong bơm 2,3 harei ye thu abih. Akaok mereip libik dom trạm bơm, drei bơm rilo mbang jang; daok dom ribaong drei kuac mek gluh baok. Meyah ia biar jang drei njauk ngak bơm phụ di lingiu piah bơm pabak tame"

Tui Sở ngak nong saong patagok palei pala tỉnh An Giang, bilan hè thun ini, tỉnh An Giang kuhria trun pajaih jaik 230 rabau hecta padai saong labaih 830 hecta njam patam; tal urak ini, dalam tỉnh trun hu pajaih padai labaih 52 rabau ha, samu 22,86%. Dalam abih tih taneh pala padai vụ ini hu 80 rabau hecta mbuan gaok pandiak bhang saong ia mbak njom tame. Tal tukvak ini, hu jaik 60 rabau ha daok gaok kan kandah ka ia pruh; tabhia nan, kayua pandiak bhang dui atah jeng ngak ka jaik 20.000 menuac gaok kan kandah ka ia pandar, ralo meng lac di dom puk palei dalam bhum Bảy Núi.

        -Ông Lưu Văn Ninh, Giám đốc Đài Khí tượng Thủy văn tỉnh An Giang brei thau, urak ini dom huyện akaok halau ia daok thu lagu. Tame tukvak ia thu, ia trun biar jang thun dahlau. Dalam tuk nan, độ mbak di dom trạm dalam mbalng hamu bhum pak kieng Long Xuyên di tỉnh An Giang jeng glaong jang thun bloh. Meng bilan 3 tal ini, nhiệt độ trung bình dalam tỉnh An Giang bhain glaong jang tanut trung bình rilo thun 1 độ C. Ông Lưu Văn Ninh khan lac, dom harei puac bilan 4 ini, pandiak bhang dui atah hu tuk glaong jang 36 độ C, abih di nyu nan lac dom huyện hu mbon, ceik gaok rilo kan kandah dalam bruk bơm ia piah ngak padai. Taphia nan, kayua ia biar yau nan ye dom puk palei taphia tỉnh Kiên Giang mbuan si hu ia mbak njom tame ralo: "Urak ini, ia gah angaok kraong  Mekong di tanut glaong, min gah la meng Campuchia  mai akaok tabung bhum taneran kraong CL ye ia di dom trạm jaik si biar jang thun 2017 tal tukvak ini. Sahaneng lac, kayua tabung glaong di pandiak bhang puac bilan 4, di bhum glaong huyện Tịnh Biên, Tri Tôn saong sa binah bhum ceik huyện Thoại Sơn lac kurang ia"

        -Piah caga bruk ini, gah ngak nong tỉnh An Giang, daok hu rilo jalan ngak piah khik caga taneh ngak nong, abih di nyu nan lac taneh padai hè thu. Tui nan, tỉnh brei kuac mek gluh, ramik pasiam ar pacang saong dom cống, binek, danao padang ia…pacang caga pandiak bhang, ia mbak njom tame ngan saong 350 công trình praong sit. Abih tih jien piah ngak jaik 232 tỷ đồng.  Ông Trần Anh Thư, Giám đốc sở ngak nong saong patagok palei pala tỉnh An Giang brei thau, di taneh oh ginup ia pala padai ye salih tapa phun pala karei pandar takik ia jang saong tukvak katut jang duk saong pala padai. Daok taneh oh hu caga hu ia ye padheih pala drak.

Meng bruk kuhria caga dahlau di gah ngak nong tỉnh An Giang, gam saong thau pandar ia patak pataom di bhap bini, An Giang meda pacang caga siam bruk thu ligu urak ini./.

Thúy Linh