Ong Lữ Cẩm Khường, Phaok akaok Sở Ngak nong saong patagok palei pala tỉnh An Giang brei thau, tal tukvak ini, mblang taneh padai Hè thu di tỉnh hu yuak blaoh. Vụ Thu đông ini, dalam tỉnh trun pajaih hu jaik 111 ribau ha padai; dalam nan huyện Tri Tôn labaih 8.430 ha, saong di bal Long Xuyên hu 350 ha daok langiu ar pacang, saong tui bruk aia ndik yau urak ini, dom mblang hamu ini meda njauk aia dauk tuk halei oh thau. Taphia di nan, dom mblang hamu daok dalam ar pacang jeng mbuan njauk ia dauk: “Meng di tuk akaok mereip, tỉnh Ủy, Ủy ban, dom ngành, abih di nyu lac Sở Ngak nong saong patagok palei pala hu ginum biai haong dom jabat pambuak pagam tal, dom labik mbuan dauk ia lac oh trun pajaih; Bruk njauk biai nan lac thun ini, akaok bilan ia ndik mbiah yau dom thun dahlau saong dom panuac khan harei nyaom thủy lợi gah Meraong ye brei thau thun ini aia ndik sit, tui nan, urang nong ndom lac aia ndik sit yau thun blaoh nan ye ngak. Bloh hajan mai, bloh aia angaok halau tuh trun avan jang, bo daok samar tra  nan ye dom mblang taneh langiu ar pacang njauk khat lahik biak rilo”.

        Tui panuac khan di Pasak Dự báo Khí tượng Thủy văn Trung ương, dom harei anak tal aia akaok halau kraong Cửu Long daok tagok samar. Tal harei 15/9, aia glaong abih di Tân Châu meda daok di tanut 4,40m; di Châu Đốc di tanut 3,90m, ala báo động III 0,10m; tal puac bilan 9 saong akaok bilan 10 aia di Châu Đốc saong Tân Châu meda tagok meng 4,5m tal 4,8m. Yau nan meng ini tal akaok bilan 10, aia akaok halau kraong Cửu Long saong bhum pak kieng Long Xuyên meda tagok jang meng 0,6m tal 0,8m. Tui ong Nguyễn Ngọc Hùng, phaok akaok Chi cục thủy lợi, Sở Ngak nong saong patagok palei pala tỉnh An Giang, bruk ini biak duh hatai, kayua urak ini dalam tỉnh An Giang hu labaih 60 jalan ar pacang njauk pasiam veik, pacang cakak aia nduac nao tapa meng meda pacang khik hu siam ka dom mblang taneh pala drak. Kayua yau nan ye, mbuan hu aia dauk di dom bhum ghaong, labik biar saong biak mbuanglut jaleih ar pacang: “Meyah  tagok báo động III,  lac biak nguy hiểm; kayua urak ini di Châu Phú, Châu Thành... ralo labik aia si ndik tapa, bo ini lac vụ 3. Meyah oh hu jalan ngak ka bhum ini lac vụ 3 nan biak mbuan si lihik abih; nan oh ka ndom tal labaih 8 ribau ha di Tri Tôn meyah oh hu jalan daong ye biak mbuan si dauk abih”.

Anak bruk ia ndik glaong ndik samar yau nan, dom harei tapa Tỉnh ủy, Ủy ban bhap bani tỉnh An Giang hu tacei pato dom puk palei ba tabiak dom jalan ngak piah pacang caga; peih ngak siam bruk 4 di labik piah pacang khik siam mekre mblang taneh ngak padai Hè thu jeng yau mblang taneh padai Thu đông meda njauk ia dauk, abih di nyu lac di labik gah langiu ar pacang, labik hu dom ar pacang oh khik hu khang kajap. Kham merat abih drei piah pacang khik dom mblang taneh padai vụ 3 langiu ar pacang labik gah Barak kênh Vĩnh Tế di huyện Tri Tôn.

Jeng pambuak tal bruk aia ndik di akaok halau, kapul urang ngak bruk di  Tổng cục Thủy lợi, Mentri ngak nong saong patagok palei pala pandar: Tỉnh An Giang njauk pataom tame dom jalan ngak piah pacang khik labaih 8.000 ha padai vụ klau di huyện Tri Tôn, tui jalan ngak lac “hijao sang siam jang taha hamu” yuak dahlau harei 15/9; saong pataom tame pacang khik mblang taneh trun pajaih vụ Thu đông 2018; karja dom puk palei saong mikva urang nong bhian pasang iek, samar pasiam veik ar pacang, mbraong ribaong piah patrun khat lahik di tanut biar di abih kayua aia ndik. Ong Đỗ Văn Thành, Phaok akaok Tổng cục Thủy lợi, Mentri Ngak nong saong patagok palei pala tacei lac: “Urak ini tui kuhria tal harei 15 ia  daok tagok tra, nan ye nyu ngak  kan kandah tal bruk pala drak. Puk palei njauk peih ngak khang dom bruk yau ini: Kasa tui iek dom dự báo di khí tượng thủy văn piah tacei pato. Dom mblang padai si tasak ye tacei pato mikva yuak dahlau di harei 15 piah khik hu siam mekre. Ka dua tra lac, padai daok cakrok bo daok hijao, ye tui iek dom ar pacang labik halei biar brei pok paglaong, bruk ini lac bruk di karja puk palei, njauk pok paglaong oh caik ka nyu jaleih ar. Urak ini hajan angin jeng daok prong, labik halei hajan dauk ye tacei pato  bơm njuk aia tabiak oh  caik ka nyu khut padai saong njam patam.

Kapul urang ngak bruk di Tổng cục thủy lợi jeng hu panuac lac, suai livik, An Giang jeng yau dom tỉnh karei dalam bhum taneran kraong Cửu Long njauk ngak khang jang bruk tacei pato pala drak; oh caik ka bhap bani trun pajaih di labik langiu ar pacang, labik hu ar pacang min oh khik hu siam mekre piah patrun khat lahik ka mikva urang nong. Taphia di nan, njauk pathau khan, tacei pato ka mikva pala phun mbang baoh gah dalam dom ar pacang khang kajap, tui njauk bruk ba tabiak./.