Di labik Núi Dài, dalam xã An Phú, huyện Tịnh Biên, dom mblang hareik tamuh ala takai phun glai dalam tukvak ini daok salih tapa sambo màu kanjik katam thu lagu. Ong Nguyễn Văn Phố, sa urang daok di labik ini brei thau, sang hu 2,5 ha taneh glai, tukvak ini, kayua tua riya pandiak bhang dui atah, ong saong dom baoh sang daok pak ini tuk halei jeng caik hatai mong iek tal bruk pacang caga khuah glai: “Dalam bilan ini, drei khik piah aia, pandar patak pataom piah pacang khuah padam khuah, thun ini mboh pandiak rilo jang nan ye mbuan rah tabiak khuah, nan ye drei njauk paglaong hatai sangka, dahlak hu caga 3 bồn ia, yaok bồn jaik 10 khối, drei caik pak nan piah padam khuah. Tukvak ini bo drei ngak ẩu  hasit ye nyu khuah chip. Drei bhian nao mai, tuk gaok manuac urang nao baha rilo ye drei kakei mikva juai njuk pakao saong cuh nhang bal glai bal klo".

Ong Lý Vĩnh Định, akaok hạt kiểm lâm liên huyện Tri Tôn-Thoại Sơn brei thau, Hạt khik iek labik prong, hu gam glai di taneran saong glai di bhum ceik, anak bruk langik tasik tua riya pandiak bhang, ngak tui tacei pato di Chi cục kiểm lâm, Hạt hu peih ngak rilo jalan pacang khuah padam khuah di dom labik mbuan khuah glaong; khik iek luac harei melam, pasang iek catang manuac sia nao tame dom labik glai mbuan khuah, patrun patakik bruk pandar apui; samar mboh labik khuah; tacei pato tuai damuai di dom labik mbon rah tabiak khuah. Ong Lý Vĩnh Định daok brei thau lac: "Lingik harei ini tagok tal 35-36 paje, biak mbuan rah tabiak khuah. Mboh lac bilan thu thun ini biak pandiak, thu lagu, thun ini tui kuhria mboh gah taneran mbuan khuan jang bhum ceik kayua mbaok aia ala haluk biak biar. Min meyah gah taneran nyu khuah nan lac biak samar, tok tapa hasit ye khuah abih dom rituh héc ta , bhum ceik  khuah suai min kan padam. Urak ini, caik hatai dahlau di abih lac urang nao mek dangko saong  mikva nao baha cuh nhang nan lac makna ba tal khuah, min nguy hiểm di abih jeng lac dom urang nao mek dangko, nan ye khaol dahlak daok brei menuac di drei hu mbaok pak nan piah tui iek. Ba dom pandap padam khuah nao caga pak labik nan".

  Tỉnh An Giang hu mblang glai saong taneh glai jaik 17 ribau ha, kuhria gam mbon ciek saong bhum taneran. Dalam nan, labik mbuah khuah pakat 5 nan lac labaih 7.200 ha meblah labaih 43% taong abih mblang taneh pataom rilo di dom huyện yau: Tịnh Biên, ban sit Châu Đốc, huyện Tri Tôn, huyện Thoại Sơn…

Anak bruk langik tua riya pandiak bhang, piah pacang caga khuah glai, Chi cục Kiểm lâm An Giang hu pambuak haong dom gah chức năng ba tabiak 35 jalan ngak piah pacang khuah padam khuah glai meng pakat huyện tal pakat xã; pabak 4 sruh radaih pajeng duh ka bruk pajeng manuac urang tuk rah tabiak khuah; 65 sruh ghe gilai, labaih 130 mac padam khuah pasiam veik, jaik 11 ribau dom pandap yau: thùng padang aia, bình xịt, can padang caik aia, gai jan padam apui,… ba brei dom phương tiện, máy móc saong pandap panda thô sơ duh ka bruk pacang khuah padam khuah tui jalan 4 di labik. Taphia di nan, ngak jalan pacang apui; cuh  pacang caga apui mbang pambak ngan haong mblang taneh praong abih tih 23 ha yau: labik Tịnh Biên, Tri Tôn, Thoại Sơn… Langiu di nan, di dom labik glai mbuan khuah glaong; pathau khan ka bruk pacang caga khuah glai ka bhap bani daok pak dom labik hu rilo tuai damuai mai rivang ma-in, tauai damuai hành hương; patagok mbang pathau khan angaok dom đài truyền thanh di dom xã, phường, bal sit dom labik hu rilo tuai damuai du lịch piah ka tuai damuai jeng yau bhap bani thau cambaih saong abih hatai dalam bruk pacang caga khuah glai. Ong Trần Phú Hoà, Akaok Chi cục Kiểm lâm An Giang daok brei thau lac: "Anak bruk langik pandiak bhang, abih di nyu lac mbaok aia di dom glai bhum taneran trun biar dut haong tukvak ini thun dahlau. Piah khik siam bruk pacang khuah padam khuah glai, Chi cục kiểm lâm hu ba tabiak  dom jalan ngak pacang khik glai, pacang khuah padam khuah glai di labik; Khoanh vùng labik mbuan khuah glai; gah kiểm lâm pambuak haong công an, quân sự xã peih bruk pasang iek di dom labik mbuan rah tabiak khuah; pathau khan pato pakai dalam bhap bani, papar sap lưu động, tual dom bảng pa nô, áp phích piah kham merat oh caik rah tabiak bruk khuah glai, meyah khuah ye ieu pataom dom gah piah samar padam khuah, patrun patakik  dom khat lahik kayua khuah glai".

Urak ini daok lac tukvak tabung glaong di bilan thu, langik dak harei dak pandiak, độ ẩm biar, mbuan ngak brei khuah glai. Piah khik kajap bruk pacang caga khuah glai, langiu di bruk kham merat di dom gah chức năng, brei hu bruk sangka paglaong akaok sahneng di bhap bani, meng nan meng patrun hu bruk mbuan khuah glai dalam bilan thu thun ini./.