Anai Điệp njauk ngak hagait siam di abih ka dom anek saih

Tuk bahrau mai sang bac, anai gru Điệp roh duah bac megru akhar Braille (lac janih akhar ndong tagok brei ka urang sup meta) luac labaih sa bilan. Dom harei akaok meti pato bac di sang bac biak karei ini oh lac mbuan ngan haong anai gru tuk dom adei pak ini oh hu umo thun praong sit karei gauk. Abih di nyu lac hu anaik saih umo 15 thun bahrau tame tal 1. Anai gru Điệp hadar veik: "Adei sup meta meng sit mai min oh nao iek ruak meng avar, gaok rilo kan kandah piah ngak randap saong bac hu akhar Braille. Yau nan min, meng hatai kham merat di gru saih luac 3 bilan, adei thau hu dak harei dak siam jang. Biak bui sambai kayua anek saih nan hu tagok tal 2".

Anai brei thau: "Dahlak saneng lac drei njauk ngak hagait siam di abih ka dom anek saih, ba ilamu siam gheih piah pato veik ka dom adei, dom adei meng sit mai oh patuah, oh hu bac da-a yau dom ayut karei. Meng dom cambuai klao chreih chai di dom adei nyu ngak ka sa-ai hu pren khang pambuak pagam suai lavik, yam tapa gam bruk ngak, nan lac hatai anit ranam".

Meng hu ilamu chuyên môn glaong, anai Điệp hu brei dang pato môn vật lý pakat THCS. Vật lý lac môn khoa học pambuak pagam haong bruk ngak anak meta, bruk tok bac lý thuyết saoh bo oh taom gaok haong bruk biak di nyu ye biak kan piah bac siam, abih di nyu lac dom adei sup meta. Kayua yau nan ye, anai Điệp tuk halei jeng saneng duah jalan atau ilamu pato siam laghaih, mbuan pato tacei, mbuan pathram ngak saong pakhang pakajap ilamu ka dom adei.

Anai Điệp brei thau anek saih sup meta biak bui sambai tuk meng tangin di drei hu ngak iek. Anai cih sơ đồ nổi, dom adei pasang iek saong eng drei pagam mạch điện. Abih di nyu lac, anai Điệp hu pandar siam phần mềm Quicktac - ứng dụng cih hình nổi angaok komputer – piah cih sơ đồ mạch điện daong ka dom adei sup meta bac siam môn vật lý.

Luac 31 thun kak kajap haong Sang bac phổ thông biak karei Nguyễn Đình Chiểu, meng hatung hatian di drei, langiu di pato dalam sang bac, anai  Điệp daok taduan mek tài liệu, đề cương, đề thi sap Anh meng akhar in tapa akhar Braille.

Meda lac bruk sup meta oh ka tuk halei pacang hu takai yam di dom adei angaok jalan bac megru ilamu. Kadha ini daok pachreih anai Điệp tuk halei jeng caong khin caik abih hatai ranam di drei brei ka bruk pato bac. Lac ayut sahabat haong anai gru  Hồng Điệp jaik 10 thun, anai Tuyết Loan – gru pato di sang bac phổ thông biak karei Nguyễn Đình Chiểu – khan lac: "Anai Điệp salut mbut, gheih ghang saong pato naih jioy di rilo gah. Thun dahlau sang bac kurang gru pato uranaih jaoh jo, anai jeng tui iek saong tacei pato abih drei ka yaok adei. Urak ini anai gru padeih hưu blaoh min tuk sang bac hu bruk hagait khin daong, anai tuk halei jeng abih hatai daong brei. Taong abih dom bruk hu peih ngak dalam sang bac anai jeng abih drei iew, jak ba manuac sia hu mbaok tame".

Urak ini, haniem phul prong abih ngan haong anai gru Hồng Điệp nan lac mong mboh dom anek saih di drei hu jeng manuac jeng urang saong jak jeng dalam rai diuk. Anek saih sup meta di anai, rilo adei bac tamat cao đẳng, đại học saong thạc sĩ, hu bruk ngak tani tanat. Langiu di bac megru naih jioy, dom adei daok hu mbaok tame ma-in padhih saong meblah mek hu rilo giải thưởng di dom môn yau pakacah judo, caoh mbal dit blaong, cờ vua. Bui sambaih abih di urang "pala asal" oh njauk lac tok mek hu "baoh jamen" bo daok lac di taong abih vaktu, lac tuk mong mboh dom adei prong tagok, naih gheih piah mek hu jak jeng yau harei ini./.

Urang lang: Jasi – 23/11