Jaik 5 thun ndam gam
haong puk palei pak Sang bac mầm non Huổi Lếch, huyện Mường Nhé (Điện Biên),
anai gru Phùng Thị Huyền ndih tapui thun 1990, urang bangsa Mường kham merat
yam tapa dom kan kandah, ba akhar huroh mai ka anek kamuan urang bangsa takik,
caik veik hatai anit ranam, iek praong iek glaong ngan haong bhap bani labik
ini. Meng blaoh, dalam danak dak "Klah rabha haong anai gru cei gru", 64 gru pato
naih gheih kak kajap haong palei hu pok meyaom Phùng Thị Huyền lac urang daok
ranaih di abih.
Sang bac mầm non Huổi Lếch hu 7 labik bac, yaok labik atah gauk
meng 4 - 5 km jalan glai, nao mai biak kan kandah. Hadar veik dom harei akaok
mereip mai pato di labik ini, Huyền khan lac, labik pato di anai daok pak bản
Cây Sạch. Bilan thu, khin blei pandap hagait, njauk nao jalan atah 20 km tabiak
bal sit. Daok bilan hajan, jalan nao gluh bok, taphia di nan lac vực sâu atah
dalam, anai oh nao hu, gaok tuk mai anai eik. Mbang akaok meti dang pato, Huyền
oh ka randap bruk, mong mboh dom adei khan ao taik tahak, daok dalam tal bac tabung
tauk gak oh hu daning, tuk hu hajan dom adei pataom tame gah plaih hu hajan,
Huyền haok aia meta…
Huyền khan lac, akaok mereip bahrau mai pak ini, kadha kan kandah
di abih nan lac jak ba dom adei tame sang bac. Kayua akaok saneng biar, ralo
amaik ame oh ka jia tame, oh brei ka anek di drei nao bac. Taom gaok dom adei
lac kan, taom gaok amaik ame jeng oh mbuan, kayua mikva pak ini nao ngak hamu
ngak apuh, tal biar harei sup meng mai sang. Min jak ba sa mbang, dua mbang oh
hu, ye Huyền nao tal klau, pak mbang. Mboh anai gru Huyền salut mbut, ndom puac
bingi pang bo daok abih hatai haong bruk ngak, tari tareng, nan ye amaik ame di
dom adei jia tui, payua anek tame sang bac “caik ka anai gru raong”. Yau nan
hamiat, sa drei anai gam pato bac, gam tahanek lisei ngak mbang huak ka dom
adei dalam jaik 5 thun.
Pren khang daong ka anai Huyền yam tapa dom kan kandah nan njauk
lac urang pasang di anai. Pasang di anai – cei gru Hà Trung Thành, jeng lac
urang bangsa Mường, daok dalam palei haong gauk, menek tabiak pak Tân Sơn (Phú
Thọ), lac gru pato tiểu học “cắm bản” dalam xã Huổi Lếch. Labik ngak bruk di
diuk pasang anai Huyền atah di gauk 5km, min gao tuk mai luac sa adit jeng oh
taom gauk hu... Huyền lac “Tuk mboh having akaok anak bruk biak ralo, adei
taduan hu brukpachreih ba di pasang, ngak ka adei mboh haniem phol, hu pren
kham merat ngak bruk”. Piah hu sahanang hatai ngak bruk, 5 thun tapa, dahlak
njauk payua anek daok veik Tân Sơn piah amaik di pasang raong.
Dahlau di tuk trun Hà Nội hu mbaok tame bruk pok angan 64 gru pato
“cắm bản” naih gheih, Huyền iew phon nyim tahama ba taco tabiak bal ine piah ka
dua anek amaik hu taom gaok gauk hadei di jaik meteh thun anek amaik atah gauk.
Huyền khan lac: “Mai tal Hà Nội, bal ine bak manuac urang, dahlak mboh biak
anit ranam anek saih di drei jang. Yaok harei nao bac mai, dom kamuan oh taom
gaok haong thei langiu di amaik ame saong gauk gar dalam bản, yau nan ye sap
phổ thông ndom oh cambaih. Dut haong dom
ayut sahabat de umo daok pak bhum taneran, dom kamuan daok kurang biak rilo
janih! Mai veik Huổi Lếch, dahlak kham merat jang dalam bruk ngak, piah pabak
ralo jang ka dom adei bangsa takik daok pak labik ini…”./.
Viết bình luận