Anai Hà Ánh Phượng jeng hu pok meyaom nan lac 1 dalam 10 urang ranaih umo Việt Nam naih gheih thun 2020

Dom anek saih bangsa takik hu thau ndom sap Enkrit cambaih laih yau nan meng kham merat di anai gru bangsa Mường angan Hà Ánh Phượng, sang bac THPT Hương Cần, tỉnh Phú Thọ. Ngan haong tal bac tapa negar, anai Phượng hu daong ka anek saih gam bac hu dom janih Toán, Lý, Hóa, sajarah gam ndom biai nao mai tapak haong ayut sahabat di 40 taneh aia mai meng grauk labik angaok dunya piah paglaong ilamu ndom biai nao mai meng sap Enkrit. Adei Đinh Thị Nga anek saih sang bac THPT Hương Cần khan lac: “Adei mboh biak chreih chai ngan haong tal bac sap Enkrit kayua lac adei meda ndom biai nao mai hu haong urang negar langiu, meyaih khan ilamo di Việt Nam saong bac megru hu rilo jang dom ilamo di dom negar ayut..”

Hadei di tuk bac tamat đại học haong blah bằng di Sang bac Đại học Hà Nội, anai gru Hà Ánh Phượng klaak tapa dom labik ngak hu jien bilan biak glaong piah tui bac thạc sỹ gah Sư phạm sap Enkrit saong mai veik palei ngak bruk tui hatai caong khin di drei nan lac dang pato meng thun 2016. Anai gru Hà Ánh Phượng roh duah hu mbaok tame nyaom gru pato sahneng duah bahrau di Microsoft saong pandar tui “Tal bac tapa negar” pambuak pagam haong tal bac di dom taneh aia karei, piah ka anek saih hu ilamu jang. Anai gru Hà Ánh Phượng brei thau: “Dahlak mboh lac drei daok pabak hatai pachreih biak prong ka anek saih, abih di nyu lac dom anek saih bangsa takik thau lac daok di labik halei meyah dom adei thau kham merat ye labik nan mek hu rilo kadha siam mekre.”

Jalan bac sap Enkrit di anai gru Hà Ánh Phương biak mbuan. Tok hu sa baoh jamriak teik tangin, sa tài khoản skype saong hu mbaok tame nyaom gru pato dunya gam haong sa jalan ba internet tani tanat lac meda pambuak pagam haong yaok ribau gru pato, anek saih grauk labik angaok dunya. Hadei di sa thun bac tui jalan ini, anek saih di anai gru Phượng oh daok mboh melau bo ndom biai nao mai biak gheih haong dom ayut sahabat negar langiu. Dom tuk bac sap Enkrit, anek saih hu mong iek biak rilo saong rivang ma-in tapa màn hình sit. Sa anek saih di Mỹ, sa anek saih di Ấn Độ, sa anek saih di Việt Nam... Karei sambo màu kalik, daok atah bayah min jeng meda mong mboh mbaok gauk yaok harei, ndom biai nao mai saong khan brei gauk thau dom dalikan ndom ka ilamo, bac megru saong rai diuk yaok harei. Gru Nguyễn Đức Phong, Phaok Akaok Sang bac THPT Hương Cần taong yaom: Dom hatai saneng salih bahrau, sahneng duah bahrau dalam tal bac tapa negar di anai gru hu pambak kadha siam tal dom môn bac karei dalam sang bac: “Jalan pato pakai di anai Phượng nyu ngak brei pambak kadha siam mekre dalam sang bac, sang bac peih pato dom môn cơ bản saong dom anek saih biak chreih chai ngan haong jalan pato ini.”

Oh lac abih hatai haong bruk pato angaok tal bac, dalam tukvak laneng lanoi anai gru Hà Ánh Phượng daok trun tal puk palei piah pato ilamu bac sap Enkrit ka dom adei bangsa takik caong khin hu bac. Gam haong nan, anai Phượng daok pambuak bruk haong dom anai gru pato sap Enkrit di châu Á, châu Phi, châu Âu saong Mỹ piah pambuak gauk pato oh mek jien ka dom anek saih urang bangsa takik saong anek saih kathaot di dom negar karei angaok dunya. Ngan haong dom hatai kham merat dalam bruk pato pakai di drei, thun 2020 anai gru Hà Ánh Phượng lac sa gru pato di Việt Nam hu Mentri Ngoại giao Hoa Kỳ palih ruah dalam danak dak urang dang akaok Đông Nam Á saong lac sa anai gru di Việt Nam hu tame top 10 gru pato naih gheih abih angaok dunya kayua kapul Varkey Foundation daok di Luân Đôn (Anh) palih ruah.

Dalam bilan dam dara thun ini, anai Hà Ánh Phượng jeng hu pok meyaom nan lac 1 dalam 10 urang ranaih umo Việt Nam naih gheih thun 2020. Yaom lac mek hu dom jak jeng yau nan, anai gru oh ka tuk halei hu hatai sahneng padeih kham merat, kayua ngan haong anai gru, urang pato bac njauk lac urang oh hu tuk halei padeih bac./.

Urang lang: Jasi – 26/04