Pasang iek, khik ramik dom urang nao saong mai meng dom taneh ia hu njom mbak biến chủng Omicron

Anak bruk biến thể Omicron mbuan njom tame Viet Nam, Mentri Y tế hu harak payua Akok UB bhap bini dom tỉnh, ban ka patagok bruk peih ngak dom jalan pacang caga jit Cobid-19. Dalam nan, ieu dom tỉnh ban ngak siam dom bruk lac: 5 paka gam haong klauk vaccine, jru taong ruak gam cong nghe saong akok sahaneng di bhap bini; Brei padang ngak dom bruk, dom jalan ngak piah caga dom bruk rah tabiak di jit Covid-10 dalam labik di drei; paglong ilamu, prein ngak bruk di gah y tế palei, caga ginup jru, pandap, mac jamriah y tế tui jalan 4 di labik saong ba urang nao ngak bruk, pabak prein ka gah y tế; patui veik bruk ngak di Kapol Covid bhap bini, Balai Y tế nao mai, oh luai rah tabiak bruk urang ruak oh pambuak hu haong balai y te, oh hu tacei pato, oh hu brei jru taong ruak. Akok Mentri Y tế jeng ieu dom tỉnh, ban patagok bruk pasang iek, khik ramik dom urang meng negar langiu tame, abih di nyu nan lac dom urang nao saong mai meng dom taneh ia, bhum taneh hu njom mbak biến chủng Omicron.

Mesup ni, HĐ bhap bini ban raya.HCM mbang X peih mbang nyaom ka 4. Ni lac mbang nyaom puac thun piah ginum biai , brei tapa rilo sarak prong ka bruk kinh tế - ilamu – xã hội thun 2021 song bruk ngak di thun 2022; bruk patagok kinh tế - xã hội ban raya 5 thun 2021 – 2025. Tacei pato di mbang nyaom, Uỷ viên mintri Chính trị, Bí thư Thành uỷ TP.HCM Nguyễn Văn Nên cong HĐND sangka ginum biai song brei panuac ka bruk dak padang song peih ngak bruk y tế, prong di abih lac pakhang bruk y tế cơ sở song y tế pacang caga; patagok menuac ngak gah y tế; paglong hatai sahneng di xã hội, ngak ka dom pakat, dom gah, jabat, kapul nyaom, đơn vị song yaok rahra lac sa labik piah pacang caga jit COVID-19. Jeng dalam mesup ni, Bí thư Thành ủy TP.HCM Nguyễn Văn Nên brei thau, urang pal akaok TP.HCM hu ginum biai song pasang iek bruk brei padeih bruk anek saih tal sa nao bac tuk hu rilo boh sang suh sah oh njauk hatai brei anek bhik nao bac meng harei 13/12 tui bruk batabiak.

Piah daong ka dom huyen taphia negar hu jalan khik iek urang meng negar Campuchia tame An Giang, Sở Y tế An Giang hu panuac caong UB bhap bini tỉnh brei ngak dom jalan pasang iek, dut iek, brei daok karei piah pacang caga jit Covid-19 ngan saong urang meng negar Campuchia tame An Giang. Dalam nan, brei daok karei tui iek y tế dalam 7 harei saong patui iek y tế dalam 7 harei hadei di nan ngan saong urang tame negar bo dut iek mboh âm tính saong SARS-CoV-2 dalam 72 tuk dahlau di tuk tame Viet Nam; hu klauk jru vaccine pacang caga Covid-19 saong hu harak lac klauk jru blaoh atau bhian njom SARS-CoV-2.

Dalam bilan Đông Xuân 2021 – 2022, urang nong dom huyện, ban dalam bhum danak dak ia taba Gò Công gah timun tỉnh Tiền Giang trun pajaih hu jiak 22.000 ha. Piah khik ka bilan pala bahrau pabak veik dom khat lahik kayua jit COVID-19, tuk vak tapa, Công ty trách nhiệm hữu hạn một thành viên peih ngak danak dak krong ribong Tiền Giang hu pasang iek veik dom cống, dom ar pacang, gam haong bruk peih ia ka nyu lagaih, khik kajap ia pruh duh ka bruk pala drak, gam paglong siam lagaih bruk pacang caga pandiak bhang, ia mbak, khik caga bruk pala drak song rai duik.

Tuk mong 11 melam blaoh, apui khuah khang di sa labik pablei khan ao di pasak pablei salih Ba Hòn, ban sit kiên Lương, huyện Kiên Lương, tỉnh Kiên Giang ngak ka 4 urang dalam sa baoh sang metai. Hadei di tuk taduan hu panuac khan lac hu pui khuah, gah padam pui brei rilo radaih padam pui haong cảnh sát mai padam khuah. Yau nan min, tal mong 2 melam nan, apui meng padam hu. Apui khuah ngak brei 4 urang dalam sa baoh sang di labik pablei khan ao metai. Tapa duah thau camereip mboh lac khuah kayua điện. Hu 3 baoh sang taphia nan jeng njauk apui mbang abih, khat lahik tui kuhria oh ka ginup abih mboh tagok tal rilo tỷ đồng.

Gah Y tế dunya (WHO) bahrau tabiak panuac kakei oh brei pandar huyết tương di dom urang abih ruak Covid-19 piah taong ruak ka dom urang daok njom ruak, kayua huyết tương oh meda daong klah di metai saong oh ngak patrun bruk pandar jamriak suah yava. Dahlau di nan, rilo panuac lac bruk pandar huyết tương di dom urang abih ruak hu dom kháng thể meda pacang hu virus. Jiak di ni, sa bruk ngak iek di Mỹ brei padeih di bilan 3 hadei di tuk mboh lac huyết tương oh dong ka urang ruak Covid-19 njauk ruak hajuan tal mbiah. WHO jeng hu panuac lac jalan iek ruak ni abih rilo jien ndo song abih rilo tuk vak piah ngak.

Urang ngak praong di di rajaei Mỹ brei thau, tui bruk ba tabiak, harei ini 7/12, Tổng thống Joe Biden iew phone meyai saong Tổng thống Vladimir Putin. Dalam nan, Tổng thống Mỹ meda brei ka Tổng thống Nga thau dahlau ka dom bruk kan kandah trak gah kinh te meyah Nga peih bruk taong meblah mek Ukraine. Mỹ hu ginum biai saong dom taneh ia châu Âu ka sa bruk cagar veik khang meyah bruk mesruh meblah rah tabiak, dalam nan Nga njauk khat lahik trak gah kinh te. Langiu di nan, Mỹ pachreih Nga gilac veik ndem biai tapa dom jalan ngoại giao, tui thỏa thuận Minsk.

Menuac metai lahik dalam bruk ceik pui Semeru angaok palao Java, Indonesia pruh gam gam tagok rilo. Kuhria tal mesup ni (7-12), negar ni hu 22 urang metai, 22 urang dok lahik song 56 urang njauk rambuac. Jabat patrun bala meng langik tasik Indonesia brei thau, hu tal 5.200 rahra gaok kan kandah meng ceik pui pruh tabiak, dalam nan hu labaih 2.000 urang njauk tabiak truh sang song urak ni dok duik di 19 labik dong . Karja huyện Lumajang dok ramik rilo sang bac jeng labik dok ka rahra, piah klah bruk bak menuac dalam tuk jit ruak Covid-19./.

Urang lang: Hani Pha – Bhumi – 07/12