Rilo radaih pajeng pandap njauk gar veik di rilo harei 

Bruk ndem biai nao mai tapa online ka padang mbang ngui saong Salih birau hadah karah di bhum Taneran kraong Cuu Long mbang 2 ngan saong kadha “Padang mbang ngui salih birau hadah krah – Pambak tame dom siam lagaih, ngak jeng jalan patagok" kayua Sở KH saong CN Cần Thơ pambuak haong Cục patagok darak pasar saong Doanh nghiệp khoa học - công nghệ di Mentri Khoa học saong Công nghệ, haong Thành đoàn Cần Thơ pambuak gauk peih ngak di harei 28/12, di Ban Cần Thơ. Hu 1.000 urang lambaok ka dom kapol nyaom, menuac urang, D.N, viện, sang bac, dom jabat khik iek, dom kapol nyaom daong padang mbang ngui salih birau hadah krah hu mbaok tame var ndem biai nao mai. Dom urang ilamu langyah saong ba tabiak dom jalan ngak piah cak rok patagok bruk padang mbang ngui salih birau hadah krah, diukrai salamat, sami samar saong lagaih haong bruk jit ruak Covid-19; Pabak prein jhul pakhang D.N salih birau hadah krah palagaih haong jit ruak praong; drap ar ka Startup Mekong pasiam veik, cak rok patagok hadei di jit praong.

Anak bruk pandap panda gar veik biak rilo oh tapa hu pabah mbang negar jalan radaih di Việt Nam - Trung Quốc, gam haong bruk kham merat lang talaih di dom mintri, do gah, dom tỉnh ban pambuak tal,  Thứ trưởng Mintri Ngoại giao Nguyễn Minh Vũ hu ieu phone ndom biai haong Trợ lý akaok Mintri Ngoại giao Trung Quốc Ngô Giang Hạo, ginum jalan jhul patagok bruk pajeng ba pandap panda tapa pabha mbang negar di dua taneh ia. Di mbang ndom biai tapa phone nan, dua gah mboh lac bruk gar pandap panda yau nan nyu ngak khat lahik praong ka bhap bini saong doanh nghiệp yaok taneh ia, ngak kan kandah tapak tal bruk pambuak gauk pablei salih di dua gah saong bruk pabak pandap dalam bhum. Tui jalan pambuak gauk, ba gauk pasiam dom kan kandah, dua gah njauk hatai brei khik ramik bruk pablei salih nao mai khang kajap, kham merat pachreih ba dom bộ ngành, tỉnh ban dua taneh ia pambuak gauk, samar duah jalan samar lang talaih bruk gar pandap panda yau urak ini; gam haong nan, brei patagok bruk pambuak gauk dalam pacang caga, pasang iek jit ruak di labik pabah mbang negar Việt Nam - Trung Quốc.

Biar harei 28/12, 60 urang lambaok ka 700 ribau urang công đoàn saong 1,2 trieu urang ngak di tỉnh Đồng Nai hu mbaok di nyaom biai ndem meyai nao mai saong Bí thư Tỉnh ủy Đồng Nai Nguyễn Hồng Lĩnh. Di nyaom biai, rilo panuac di urang công đoàn saong urang ngak hu brei thau dom bruk pambak tal sarak padang ngak sang daok ka urang ngak hu jien mek tame takik dalam tỉnh. Rilo urang brei thau ka dom bruk kan kandah  tuk ngak harak gal apah, blei sang daok xa hoi ka urang ngak dalam tukvak  tapa saong ba tabiak jalan ngak brei pasiam. Bruk ndem biai nao mai tapak hu ngak brei cambaic laic, dân chủ, tapak hatai tui jalan ba mai kein laba ka urang ngak. Bí thư Tỉnh ủy Đồng Nai Nguyễn Hồng Lĩnh hu caik hatai tui pang saong tacei pato dom jabat ba tabiak dom jalan pasiam veik dom bruk daok labaih kurang, kan kandah, tavak tavaiy.

UBND tỉnh Thanh Hóa haong Tập đoàn Sun Group bahrau peih bruk padang ngak labik padeih padei Sun Beauty Onsen Thanh Hóa di xã Quảng Yên, huyện Quảng Xương (Thanh Hóa). Labik padang ngak nan praong jaik 100 ha, hu dom dịch vụ me-in bui sambai, giải trí, du lịch ilamu, iek glang prein yava, piah ba pandar saong paglaong yaom ia khoáng pandiak Quảng Yên. Meng bruk buh tabiak 7 rabau tỉ đồng padang ngak labik padeih padei ia khoáng pandiak Sun Beauty Onsen, Tập đoàn Sun Group daok ngak ti jalan ba Thanh Hoá jeng pasak du lịch paka glaong dit dunya saong dalam taneh ia.

Jabat Cảnh sát hình sự (PC02), Công an TPHCM birau chap mek hu kapol co blah yaok ribau drei asaw  kayua Lê Anh Hào ndih tapui thun  2004, daok di huyện Hóc Môn pan kaok. Tapa duah thau, kapol nan khan lac hu labaih 1.200 mbang co blah athur raong, rilo meng lac asaw di urang daok di quận 12, Gò Vấp, huyện Hóc Môn… Hadei di tuk co blah hu, kol nyu pabei ka dom labik sik ngak rilo asaw di quận 12 mek jien parabha gauk cai, me-in mbia. Jabat Cảnh sát hình sự, Công an TPHCM daok peih praong bruk duah thau saong iew dom urang njauk kol nan co blah mek saw pambuak saong Jabat PC02 di jalan Trần Hưng Đạo, quận 1 piah pabak ka bruk duah thau, ngak brei cambaic laic.

Phần Lan saong Đức  daok ngak catang dom jalan pasang iek piah pacang caga bruk njaom mbak di Omicron - biến thể bahrau di virus SARS-CoV-2 ba tal ruak COVID-19.  Rajaei Phần Lan harei 28/12 khan lac oh brei tame negar dom tuai oh ka klauk vaccine pacang COVID-19.  Jeng dalam harei nan, rajaei Đức jeng ba tabiak ngak catang dom bruk dalam negar, kuhria gam menuac hu klauk jru blaoh saong  hu siam veik hadei di tuk njauk ruak COVID-19, piah pacang, patakik bruk njaom mbak di biến thể Omicron.  Tui bruk bahrau tabiak ini, dom bruk pataom gauk di dom menuac hu klauk jru blaoh atau hu siam ruak hadei di tuk njauk ruak COVID-19 oh brei tapa 10 urang. Dom urang oh ka klauk jru meda pataom gauk haong rilo di abih lac 2 urang karei langiu menuac dalam sang drei.. Langiu di nan, bruk pataom gauk tuk palao thun klak, raok thun bharau saong cuh phao bingu dalam dom harei puac thun oh brei ngak dalam taneh ia.

Tui sa roh duah di negar Anh, bruk mbuan si njauk ruak viêm cơ tim hadei di tuk klauk jru caga ruak Covid-19 takik jang dom bruk mbuan njauk Covid-19 trak meyah ohn klauk jru. Nan lac panuac ba tabiak  di dom urang ilamu hadei di tuk duah thau tapa 42 trieu urang Anh umo meng 13 thun tagok saong klauk 3 mbang vaccine. Ruak viêm cơ tim hu mboh ralo jang di urang ranaih umo saong urang likei.  Yau nan min, kayua mbon ruak viêm cơ tim glong jang hadei klauk jru mbang 2 dut saong mbang 1, nan ye dom urang ilamu brei taong yaom bruk klauk jru mbang 3 dalam danak dak klauk jru pabak daok hu peih ngak di angaok dunya piah pacang caga biến thể Omicron.

Sa harei hadei di mbang ginum biai ka 8 ka bruk daong dui veik thỏa thuận hạt nhân 2015 hu pambuak veik, dom urang ginum biai di Nga haong Iran harei kabroi mboh lac, ginum biai tuk camereip mboh hu dom siam lagaih saong daok nao tui jalan siam mekre. Bruk ginum biai mbang ini hu maong lac praong saong njauk ngak chip. Tui Mintri Ngoại giao Nga, hatai kham merat di dom gah lac ngak tabiak dom văn bản di taong abih dom harak gar ka thỏa thuận di harei hadei piah ba tabiak hu dom bruk hu abih dua gah njauk hatai pachreih tui dalam tukvak katut panak./.

Urang lang: Ái Nghiêm- Mousaphuong -29/12