Dalam baoh sang bahrau saong ginup abih pandap panda, ong Thông Sâm bui sambai ndom meyai haong khaol dahlak. Ong lac: “Urang Cam di palei ini dahlau mai tok thau pala pa-aok bleit, pala bei kayau saong ngak padai. Min kayua oh chủ động hu halau aia nan ye bilan njauk, bilan lahik. Bhian kurang mbang tuk cang bilan paik yuak. Kayua mikva pak ini ralo lac baoh sang kathaot, gam haong bruk oh khang hatai buh jien tame ngak mbang, salih janih phun pala, anek athur raong ka nju lagaih haong bruk di sang drei nan ye kathaot rambah tuk halei jeng ndam gam tui mikva. Hadei ini, mai meng hu Sarak 04 di Tỉnh uỷ Bình Thuận, mikva hu daong phun jien, hu brei taneh piah ngak mbang pala drak, meng nan dom baoh sang khang hatai salih jalan ngak mbang, dalam nan hu sang dahlak.”

Ong khan lac, meng phun jien mesre hu di gilang pariak, ong ba nao blei mac njuk aia piah pandar ka bruk ngak padai di sang drei. Caga hu aia pruh, yaok thun ong ngak 3 vụ padai angaok taneh prong labaih sa ha. Daok taneh pala pa-aok bleit ong salih tapa pala thanh long. Ngan haong jalan ngak mek katut raong atah, urak ini bruk ngak mbang di ong hu grap tanat.

Mboh hu kein laba mai meng phun thanh long, ong Sâm patui bruk bac megru ilamo meng urang Yuan ka ilamu truac gom pachreih thanh long tabiak biangu karei bilan saong buh tabiak labaih 100 triệu đồng hạ áp điện brei ka bruk pala thanh long. Kuhria tal urak ini, baoh sang ong hu labaih 4.000 gheng thanh long, dalam nan hu 2.400 gheng truac gom brei baoh karei bilan. Yaok thun, tok ta-eng thanh long, baoh sang ong mek tame hu jaik 5 rituh triệu đồng.

Mblah tui jalan ngak mbang di ame drei, 8 urang anek di ong urak ini thei thei jeng hu bein thanh long, ralo ye 1.000 gheng, takik ye jeng hu 500 gheng. Oh lac tari tareng dalam bruk ngak mbang, tukvak daok saoh ong Thông Sâm daok hu mbaok gam haong urang jakar palei, xã nao jak ba mikva ngak tui jalan ba di Đảng saong Karja ka rai diuk ilamu di labik daok, paglaong hatai gul pataom bangsa, hu mbaok tame dom bruk ngak xã hội di puk palei. Ndom tal ong Thông Sâm, amuk Lâm Cúc – sa urang daok pak palei Hiệp Hoà, xã Tân Thuận lac: Ong Thông Sâm jak ba mikva ngak mbang ka nyu siam piah kaya meda yau urang Yuan. Dalam palei meyah thei kan kandah ye ong daong jien piah ngak mbang. Ong nan lac urang ba akaok nao dahlau dalam palei ini. Thei kan kandah bruk hagait jeng duah tal ong.

Oh lac daneiy angan dalam bruk ngak mbang, bo grauk dom palei angaok, puk ala dalam xã Tân Thuận ini, thei thei jeng thau tal ong Thông Sâm. Sa-ai Nguyễn Duy Ninh – Phaok Phòng Bangsa huyện Hàm Thuận Nam, tỉnh Bình Thuận brei thau: Ong Thông Sâm nan lac sa dalam dom urang hu UB bhap bani tỉnh palih ruah lac urang hu angan je dalam palei Cam Tân Thuận. Langiu di nan, ong daok lac urang ngak mbang naih jioy, ong nao dahlau dalam bruk pala thanh long, ong pala 2ha hu labaih 2 ribau 4 rituh gheng saong hạ 2 bình piah truac gom ka thanh long tabiak baoh karei bilan. Taphia di nan ong daok daong phun jien ka mikva kan kathaot dalam palei cakrok patagok phun thanh long piah ka mikva yam tapa kan kathaot. Ong nan lac urang hu angan je, ong biai ye dalam palei thei thei jeng pang tui.)

Yaom lac "ralo anek ralo taco", yaom lac hu ginup meda min ong Thông Sâm jeng oh ka pabak hatai caong khin di drei. Harei harei ong jeng gam haong dom urang anek, dom urang taco tabiak hamu iek padai, tabiak bein mong thanh long, jeng daok tari tareng tagok palei angaok, puk ala piah bac megru ilamu ka pajaih phun pala. Ong brei thau, tapa thun 2014, baoh sang ong meda tut angan tame tổ ngak thanh long VietGap saong patui bruk buh jien tame ka danak dak ngak tabiak thanh long karei bilan, ba mai ralo kein laba../.