Urang lin rong pabui patagok kinh tế 

Hu mbaok saong ngak bruk rilo di bhum tapen negar, yaom lac raidiuk di urang jakar, urang lin BĐBP pak ini daok rilo kan kandah, kurang rilo janih min meng 6 thun dahlau, dom urang lin “quân hàm hijao” hu dom danak dak, dom bruk ngak daong ka dom adei sit sang kan kandah hu nao tal sang bac. Tal urak ini, Bộ chỉ huy BĐBP tỉnh Gia Lai saong tỉnh Kon Tum hu taduan raong, daong ka dom adei hu mbang bac di đơn vị lac 30 kamuan, anek bhik di urang bangsa takik sang biak kan kandah, dalam danak dak “Anek raong đồn biên phòng”, daong ka labaih 250 kamuan bac da-a (yaom daong 500.000 đồng yaok kamuan sa bilan) tui danak dakn“Veih takai adei tal sang bac”; 40 kamuan tui mô hình “Ging mbang anit ranam”. Ta-eng tỉnh Gia Lai, meng bilan 8-2019, Bộ đội biên phòng hu taduan 11 adei mai ngak “anek raong đồn biên phòng”. Dom kamuan hu brei labik daok lagaih, hu labik bac da-a, hu pandap pandar, hu urang jakar iek glang, pato pakai, tacei ba dom kamuan bac da-a. Hadei di tuk dom đồn taduan anek raong, Bộ chỉ huy BĐBP tỉnh hu kaoh tabiak meng kadung jien di drei daong ka yaok kamuan 5 triệu đồng saong blei brei yaok kamuan 1 sruh radaih juak nao bac.

Nao tal bhum tapen negar huyện Ia Grai (Gia Lai), kol dahlak hu Trung tá Ngôn Ngọc Cương, Đồn trưởng Đồn Biên phòng 719 brei thau: urang jakar, urang lin di đồn lac ame raong, sa-ai raong di dom kamuan anek saih sang kan kandah. Đồn hu taduan raong 2 kamuan lac Rơ Lan Tuen (12 thun), bac tal 6 haong Ksor Hội (11 thun), bac talmetui ame, daok haong amaik di palei Nú 1 (Ia Chía), min amaik oh hu bruk ngak tani tanat; daok Tuen metui amaik, ame klaak nao tok diuk karei. Dua kamuan hu đơn vị ramik brei labik mbang, daok, labik me-in, labik bac da-a di kapul công tác cơ sở. Sa bilan jien buh tabiak brei ka 2 anek raong lac jaik 5 triệu đồng, yaom jien ini hu urang jakar, urang lin pak ini halan hatian rik daong.

Biar harei sup jeng lac tuk Lê Đại Vĩ abih  maong bac mai veik “baoh sang biên phòng”. Oh padauk hu bui sambai, Vĩ khan lac: Mai labik daok bahrau, hu bilik karei, hu tu caik khan ao, hu bàn bac bahrau, hu khgaiy ndih bahrau... adei daok hu dom sa-ai raong di Đồn Biên phòng 721 (Cửa khẩu Quốc tế Lệ Thanh, Gia Lai) pajeng nao blei khan ao, tapuk, siphau, katap, takhaok... piah nao bac. Jeng dreih yau nan, adei A Bặc (13 thun, bangsa Giẻ Triêng) daok di palei Bung Tôn, xã Đắc Plô, huyện Đắc Glei, tỉnh Kon Tum brei thau: “Hu ngak anek raong di dom urang ame biên phòng di Đồn Đắc Plô (Bộ chỉ huy BĐBP tỉnh Kon Tum), adei mboh drei biak patuah. Ame lahik tuk anek oh ka ndih tapui tabiak, daok amaik kamlo haong tangaoh nan ye adei hu amuk pajeng amaik ba mai raong. Hatai caong di adei lac hu jeng bộ đội biên phòng, nan ye meng tuk ini, adei kham merat bac da-a, pasram megru biak siam”.

Ndom biai haong dom kamuan hu BĐBP daong saong raong mbang bac, kol dahlak dak mboh iek praong jang dom bruk ngak biak mekre di dom urang jakar, urang lin biên phòng bhum tapen negar. Hadei ini tuk praong tagok, dom adei tuk halei jeng hadar tal dom hatung hatian anit ranam praong dalam bo dom cei bộ đội "quân hàm hijao" brei ka drei meng di tuk daok sit./.

Urang lang: Mousaphuong -1/3